ފުރަތަމަ ފަހަރަށް ބާއްވާ ސާފް ފުޓްސަލް ޗެމްޕިއަންޝިޕުގެ ތަށްޓާއި އަތްލެވޭހައި ކައިރީގައި ހުރި ނަމަވެސް، ޕޮއިންޓު ތާވަލަށް ބަލައިގެން މެޗުތަކުގައި ނަތީޖާ ނެރެން ނުވިސްނާ ކަމަށާއި، ބޭނުންވަނީ ހުރިހާ މެޗަކުން މޮޅުވާން ކަމަށް ޤައުމީ ޓީމުގެ ކޯޗު، އުޒްބެކިސްތާންގެ ފާރޫކް ޒަކީރޯވް ބުނެފިއެވެ.
މުބާރާތުގައި އިންޑިއާ އަތުން ހޯދި ބޮޑު މޮޅަށްފަހު ކޯޗު ބުނީ، އިންޑިއާ އާ ދެކޮޅަށް ނުކުތީ އެއީ މޮޅު ޓީމެއްކަން ދަނެގެން ކަމަށެވެ. ޚާއްސަކޮށް އިންޑިއާއިން މި މުބާރާތަށް ވަރަށް ބޮޑަށް ތައްޔާރުވެފައި ވާތީ، އެ ޓީމާ ދެކޮޅަށް ކުޅެން އުނދަގޫވާނެކަން ދަނެގެން މެޗާ ކުރިމަތިލިކަމަށް ކޯޗު ބުންޏެވެ.
ކަން މިހެން އޮތް ނަމަވެސް، އިންޑިއާ އަތުން ވެސް ރާއްޖެއިން ބޮޑު މޮޅެއް ހޯދައިފައި ވަނީ، ޓީމުގެ ކުޅުންތެރިން ދެއްކި ހިތްވަރާއި، މޮޅު ކުޅުމުގެ ސަބަބުން ކަން ކޯޗު ފާހަގަކުރިއެވެ.
މުބާރާތުގައި ރާއްޖެ ހިމެނޭހެން ގިނަ ޓީމުތަކުން ތިން މެޗު ކުޅެފައިވާއިރު ބަންގްލަދޭޝްއާއި ޕާކިސްތާނުން ހަތަރު މެޗު ކުޅެފައިވެއެވެ. ޕޮއިންޓް ތާވަލަށް ބަލާލާއިރު، ރާއްޖެއަށް ބާކީ އޮތް ތިން މެޗުން، ފަސް ޕޮއިންޓު ހޯދައިގެން މުބާރާތް ކާމިޔާބުކުރެވެން އެބައޮތެވެ.
ކަން މިހެން އޮތް ނަމަވެސް، މީގެކުރިން ވެސް އަދި ކުރިއަށް އޮތް ތަނުގައި ވެސް މެޗުތަކަށް ނުކުންނާނީ ތާވަލު އޮތް ގޮތަށް ބަލައިގެން، ފަސޭހަގޮތް ހޯދައިގެން ނޫން ކަމަށާއި ރާއްޖޭގެ އަމާޒަކީ ސައްތައިންސައްތަ މޮޅުވުމުގެ ރެކޯޑަކާއެކު މުބާރާތް ނިންމާލުން ކަމަށް ކޯޗު ފާރޫކް ބުންޏެވެ.
"ކުރިން ވެސް މިހާރު ވެސް، ޕޮއިންޓް ތާވަލަށް ބަލައިގެނެއް ނޫން މެޗަށް ތައްޔާރުވަނީ. މިއީ ހަ މެޗު ކުޅެން ޖެހޭ މުބާރާތެއް. ކަނޑައަޅާފައިވާ ޓާގެޓަކީ ހުރިހާ މެޗަކުން މޮޅުވެ މެކްސިމަމް ޕޮއިންޓު ހޯދުން. މުބާރާތް ފެށިއިރު ވެސް ޓާގެޓަކަށް ވީ މޮޅުވުން، މިހާރު ވެސް އެ ވިސްނުމުގައި މި ހުރީ. އަހަރެން ބޭނުންވަނީ ހުރިހާ މެޗަކުން ވެސް މޮޅުވާން". ކޯޗު ފާރޫކް ބުންޏެވެ.
ކުޅުނު ތިން މެޗުވެސް ކާމިޔާބުކޮށް ރާއްޖެއިން ތާވަލުގެ އެއްވަނައިގައި އޮތްއިރު، މުބާރާތުގެ ޗެމްޕިއަންކަން ކަށަވަރުކުރަން ރާއްޖެއަށް ބޭނުންވަނީ ތިން މެޗުން ފަސް ޕޮއިންޓެވެ.
ރާއްޖެއިން މުބާރާތުގައި ކުޅުނު ފުރަތަމަ މެޗުގައި ޕާކިސްތާން އަތުން 1-7 އިން މޮޅުވެފައިވާއިރު ދެވަނަ މެޗުގައި ބަންގްލަދޭޝް އަތުން ވަނީ 1-6 އިން މޮޅުވެފައެވެ. އަދި އިންޑިއާ އަތުން 0-5 އިން މޮޅުވެފައިވާއިރު ރާއްޖެއިން ދެން ކުޅެން ޖެހޭނީ ނޭޕާލާއެވެ.
ނޭޕާލް އަކީ އަދި މިހާތަނަށް ކުޅުނު ތިން މެޗުގެ ތެރެއިން އެއް މެޗުން މޮޅުވެ، އަނެއް ދެ މެޗުން އެއްވަރުވެފައިވާ ޓީމެކެވެ.
ރާއްޖެއާއި ނޭޕާލް ބައްދަލުކުރާ މެޗު ފަށާނީ ބުރާސްފަތި ދުވަހުގެ މެންދުރު 12:00 ގައެވެ.
މި މުބާރާތުގެ ދެ ޑިވިޝަނުގެ ވެސް ހުރިހާ މެޗެއް، ޕީއެސްއެމްގެ ޔެސް ޓީވީ އިން ވަގުތުން ގެނެސްދޭނެއެވެ.