ދިވެހިރާއްޖައަށް ސާފް ފުޓްސަލް ޗެމްޕިއަންޝިޕް ހޯދައިދިނުމުގައި އެންމެ މުހިއްމު ދައުރެއް އަދާކުރި ފަރާތަކީ ހަމަގައިމުވެސް ޓީމުގެ ކޯޗު ފާރުކް ޒަކިރޯވް ކަމާމެދަކު ޝައްކެއް ނެތެވެ.
ޤަައުމީ ފުޓްސަލް ޓީމު ތައިލެންޑުގައި ކުޅެމުންދާ މުބާރާތުގެ ހަބަރުތައް ގެނަސްދިނުމަށް ނޫސްވެރިއެއްގެ ގޮތުގައި އަޅުގަނޑު މިކުރަމުންދާ މަސައްކަތުގައި އެކަން ވަރަށް ގާތުން ތަޖުރިބާ ކުރެވިއްޖެއެވެ.
ޓީމުގެ ކޮންމެ ކުޅުންތެރިއަކާ ވާހަކަ ދައްކާލިޔަސް ކޯޗުގެ މޮޅު ވާހަކަ ބުނެދެއެވެ. ކޯޗު ކޮށްދިން މަސައްކަތުގެ ވާހަކައެވެ. ދަސްކޮށްދިން އެއްޗެހޭގި ވާހަކަތަކެވެ. ޓީމުގެ ކުޅުންތެރިންނަށް ހޯދައިދިން އިތުބާރާއި މިމުބާރާތް ކާމިޔާބުކުރެވޭނެ ކަމުގެ ޔަގީންކަށް ހުރިހާ ކުޅުންތެރިންނަށް ދިން ގޮތުގެ ވާހަކަތަކެވެ.
އެންމެ ފުރަތަމަ ރާއްޖޭގެ ޓާފް ދަނޑުގައި ކުރި މަސައްކަތްތަކާއެކު މޫވްމަންޓާއި ކޯޗު ބޭނުންވާ ގޭމަށް ފަރިތަކުރަމުންދިޔައެވެ. އެއަށްފަހު ޗައިނާއަށް ކުރި ޓްރެއިންގ ކޭމްޕު ވެގެންދިޔައީ ޓާފް ދަނޑުގައި ފަރިތަކުރަމުންދިޔަ މޫވްތަކާއި ގޭމް އިންޑޯ ދަނޑެއްގައި ތަޖުރިބާކޮށްލަން ލިބުނު ފުރުސަތަކަށެވެ. އެދަތުރާއެކު ދިވެހި ކުޅުންތެރިންނަށް ކޯޗު ފާރޫކް ދަސްކޮށްދިން އެއްޗެއްގެ ބޭނުން ހިފައިގެން ސަރަހައްދީ މުބާރާތުގެ ތަށި ނެގިދާނެކަން ޔަގީންވެގެން ދިޔައެވެ.
ޗައިނާގައި ފާރޫކް ބޭނުންވި ގޭމް ކުޅެވުމުން ޓީމުގެ ކުޅުންތެރިން ތިބީ ވަރަށް ޔަގީންވެފައެވެ. ޗައިނާ ޤައުމީ ޓީމާއެކު ކުޅުނު މެޗުތަކުގައި ނެރެވުނު ނަތީޖާ އާއި ދެއްކުނު ކުޅުމާއެކު ހުރިހާ މެމްބަރުންނަށްވެސް ޔަގީންވެގެންދިޔައީ ސަރަހައްދީ ޓީމުތައް ކައިރީ ތަފާތު ދެއްކޭނެކަމެވެ.
ކޯޗު ފާރޫކް އާއި ވާހަކަ ދައްކާލަން ލިބުނު ފުރަތަމަ ފަހަރުވެސް ކޯޗު ހުރިހާ ވަރަށްވެސް ހަމަޖެހިފައެވެ. ކެރިގެން ބުނީ ބޭނުންވަނީ 18 ޕޮއިންޓުކަމަށާއި އެކަން ކުރާނެ ކަމަށެވެ. އެއީ މުބާރާތުގައި ކުޅޭ 6 މެޗު ކާމިޔާބުކުރަން ބޭނުންވާ ވާހަކައެވެ. މިހާރު މިވަނީ 5 މެޗު ނެގިފައެވެ. ޗެމްޕިއަންކަން ލިބިފައެވެ. އެހެންނަމަވެސް އަދި ކޯޗު ބޭނުންވި ޓާގެޓް ހާސިލްއެއް ނުވެއެވެ. މިއީ ދިވެހިންނަށް ވަރަށް ތާރީހީ މުބާރާތެކެވެ. ދިވެހިން ބޭނުންވީ ތައްޓެވެ. އެކަން ވެއްޖެއެވެ. އެހެންނަމަވެސް ކޯޗު ބޭނުންވަނީ ހަމަ އެކަނި ތައްޓެއް ނޫނެވެ. މުބާރާތުގެ ހުރިހާ ޓީމެއްވެސް ބަލިކޮށް ސަތޭކަ ޕަސެންޓު ރެކޯޑެކެވެ.
އުޒްބަކިސްތާނުގެ ޤައުމީ އަންހެން ފުޓްސަލް ޓީމުގެ ކޯޗުގެ މަގާމު މިހާރުވެސް އަދާކުރަމުންދާ ފާރޫކް ދިވެހި ޓީމާއި ހަވާލުވީ 3 މަސް ދުވަހުގެ ކޮންޓްރެކްޓެއްގައި ހަމަ އެކަނި ސާފް ފުޓްސަލް މުބާރާތަށެވެ. އެހެންނަމަވެސް ކޯޗު ޓީމު ދޫކޮށްލަނީ ރާއްޖޭގެ ފުޓްސަލްގައި މުޅިން އާ ސޮފުހާއެއް ލިޔެލަދީފައެވެ.
ފާރޫކް މިވަނީ 3 މަސް ތެރޭގައި ދިވެހި ފުޓްސަލް މުޅިން ބަދަލުކޮށްލަދީފައެވެ. ދިވެހި ކުޅުންތެރިންނާއި ކޯޗުންނަށް ފުޓްސަލް ރަނގަޅަށް ދަސްކޮށްދީފައެވެ. ކޯޗު ފާރޫކް ބުނީ ދިވެހިރާއްޖޭގައި ކުޅެމުން އައީ ފުޓްސަލްއެއް ނޫންކަމަށެވެ. ރާއްޖޭގައި ކުޅެމުންދިޔައީ މިނީ ފުޓްބޯޅަ ކަމަށާއި ފުޓްސަލް އަކީ ވަރަށް ތަފާތު ކުޅިވަރެއްކަން ކޯޗު ބުންޏެވެ. އެކަން އޭނާ ދައްކުވައިދީފިއެވެ. ދިވެހި ކުޅުންތެރިންނަށް ފުޓްސަލް ދަސްކޮށްދީ މި ކުޅިވަރުން ދިވެހި ހިނގަންވީ މަގު ދައްކުވައިދީފިއެވެ.
ޔުޒްބަކިސްތާނުގެ އަންހެން ޤައުމީ ޓީމުގެ އިތުރުން އެޤައުމުގެ ފުޓްސަލް ލީގުގެ ޓީމެއްކަމުގައިވާ ނެފްޗީގެ ހެޑް ކޯޗުގެ މަގާމާއިވެސް ހަވާލުވެގެން ހުރީ ފާރޫކްއެވެ. އެފްއޭއެމުން ފާރޫކްގެ ރިލީސް ކްލަބާއި ވާހަކަދައްކައިގެން ހޯދިނަމަވެސް އެކްބަލުން މިހާރު ހުރީ ތަޖުރިބާކާރު ކޯޗުގެ އިންތިޒާރުގައެވެ. އެއީ ކޯޗު ނެތި ކުޅުނު އެއްވެސް މެޗުން މޮޅުނުވާތީއެވެ. ކޯޗުވެސް ހުރީ އެނބުރިޤައުމަށް ދާން ލަސްވެފައެވެ.
ދިވެހި ކުޅިވަރަށް ލޯބިކުރާ މީހެއްގެ ހައިސިއްޔަތުން ބުނެލަން ބޭނުންވަނީ ދިވެހި ކުޅިވަރަށް ފާރޫކް ތި ކޮށްދެއްވި މަސައްކަތަކީ އަގުނުކުރެވޭނެ މަސައްކަތެކެވެ. ތިއަޅައިދިނީ ކުރިއަށްދާން ވަރުގަދަ ބިންގަލެކެވެ.
ކޯޗު ފާރޫކްއަށް ވަރަށް ބޮޑަށް ޝުކުރިއްޔާ!