"ދިރާސީ އައު އަހަރަށް ސްކޫލްތައް ތައްޔާރު"

މީގެ 4 އަހަރު ކުރިން ދިރާސީ އަހަރުގެ ކިޔެވުން އަހަރުގެ މެދުތެރޭގައި ފަށާގޮތަށް އޮތް އޮތުން ބަދަލުކުރުމަށްފަހު މާދަމާއަކީ ފުރަތަމަ ފަހަރަށް ޖެނުއަަރީ މަހުގައި ދިރާސީ އަހަރުގެ ކިޔެވުން ފަށާދުވަހެވެ. ދަރިވަރުންނާއި ބެލެނިވެރިން އަދި މުދައްރިސުންގެ އައު އުންމީދުތަކާއެކު މާދަމާ ކިޔެވުން ފަށާއިރު ކިޔެވުން ފެށުމަށް ވަނީ ތައްޔާރުވެފައެވެ. ސަރުކާރުގެ ސްކޫލްތަކުގެ ދަރިވަރުންނަށް ބޭނުންވާ ޓެކްސްޓް ފޮތްތަކާއި މުދައްރިސުން ވަނީ ހަމަކޮށްފައެވެ. މިކަންކަމުގެ އިތުރުން ޢުމްރާނީ ތަރައްޤީގެ ބައެއް މަޝްރޫޢުތައް ނިންމާ އަދި މި ސަރުކާރުން ތަރައްޤީކުރި ފުރަތަމަ ސްކޫލްގައި މާދަމާ ކިޔެވުން ފަށާނެއެވެ.

މިއަހަރުގެ ދިރާސީ އަހަރުގެ ކިޔެވުން ފަށާއިރު ސަރުކާރުގެ 218އެއްހާ ސްކޫލްގައި 77،000އަށް ވުރެ ގިނަ ދަރިވަރުން ތަޢުލީމް ހާސިލްކުރަމުން ދާނެއެވެ. ދިރާސީ އަހަރު ސަރުކާރު ސްކޫލްތަކުގެ ގްރޭޑު 1ގައި ކިޔެވުމަށް 4790 ދަރިވަރުން އެދިފައިވެއެވެ. މިއަހަރުވެސް އަތޮޅުތަކުން މާލެއަށް 1500 އެއްހާ ދަރިވަރުން ބަދަލުވެފައިވާކަން ތަޢުލީމީ ވުޒާރާއިން ފާހަގަކުރައްވައެވެ. އަތޮޅުތަކުގެ ރަށްތަކުން ގްރޭޑު 1 އަށް 3042 ދަރިވަރުން ވަނުމަށް އެދިފައިވާއިރު މާލެ ސަރަޙައްދުގެ ސްކޫލްތަކުގައި ގްރޭޑު 1 އަށް ވަނުމަށް 1748 ދަރިވަރުންވަނީ އެދިފައެވެ. މިއަހަރު އަތޮޅުތަކުން މާލޭގެ ސްކޫލްތަކަށް 1530 ދަރިވަރަކު ބަދަލުވުމަށް އެދިފައިވާއިރު މާލެއިން ހުޅުމާލޭގެ ސްކޫލްތަކަށް ބަދަލުވުމަށް އެދިފައިވާ 836 ދަރިވަރުންވެސް ބަދަލުކޮށްދެއްވާފައިވާކަމަށް ތަޢުލީމީ ވުޒާރާއިން ވިދާޅުވެއެވެ.

މިއަހަރުގެ ދިރާސީ އަހަރުގެ ކިޔެވުން ފަށާއިރު ދަރިވަރުންނަށް އުނގަންނައިދިނުމަށް ސަރުކާރުގެ ސްކޫލްތަކުގައި 10500 މުދައްރިސުން ހަރަކާތްތެރިވާނެއެވެ. އޭގެ ތެރޭގައި ހިމެނެނީ 8000 ދިވެހި މުދައްރިސުންނާއި ބިދޭސީ 2500 މުދައްރިސުންނެވެ. ދިރާސީ އަހަރަށް ސްކޫލްތަކާއި ތަޢުލީމީވުޒާރާއިން ތައްޔާރުވެފައިވާކަމަށް ތައުލީމީ ވަޒީރު ޑރ. އިސްމާޢީލް ޝަފީޢު ވިދާޅުވިއެވެ. އެގޮތުން އިއްޔެ މުދައްރިސުން ސްކޫލްތަކަށް ނުކުމެ ދަރިވަރުންނަށް ކިޔަވައިދިނުމަށް ތައްޔާރުވާން ފަށާފައިވާކަމަށް ވަޒީރު ވިދާޅުވިއެވެ.

"މާދަމާ ސްކޫލް ފަށަންވާއިރަށް ތަޢުލީމީ ވުޒާރާއިން ކުރަންޖެހޭ ކަންކަން އަދި ސްކޫލްގެ މާހައުލުގައިވެސް ކުރަންޖެހޭ ކަންކަން ފުރިހަމަކަމާއެކު ދަރިވަރުންގެ އުނގެނުމަށް އެއްވެސް ވަރެއްގެ ގޮންޖެހުން ކުރިމަތިނުވާ މިންވަރަށް ތައްޔާރުވެފައިވޭ." ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވިއެވެ.

ތަޢުލީމީ ވަޒީރު ވަނީ މުދައްރިސުން ކެނޑިނޭޅި ކުރަމުންދާ މަސައްކަތްތައް ފާހަގަކުރައްވާފައެވެ. މުދައްރިސުންނަށް އިޙްތިރާމްކޮށް ޤަދަރުކުރުމުގެ ޙަޤީގީ މަސައްކަތަކީ މުޅި މުޖުތަމަޢު ބައިވެރިވެގެން ކުރެވޭނެ ކަމެއްކަމަށެވެ. މުދައްރިސުންނަށް ލޯބިކުރުމަށް ބެލެނިވެރެން ދަރިވަރުންނަށް ބުނެދޭންޖެހޭކަމަށާއި އެކަން ކުރެވިއްޖެނަމަ މުދައްރިސުންނަށް އިޙްތިރާމްކުރުމާއި ޤަދަރުކުރުމަށް ބާރު އެޅިގެންދާނެކަމަށެވެ. އަދި މުދައްރިސުންނަށް އިޙްތިރާމް ކުރުމަށް މުޅި މުޖުތަމަޢު ގުޅިގެން މަސައްކަތް ކުރަންޖެހޭކަން ފާހަގަކުރެއްވިއެވެ.

މިއަހަރުގެ ދިރާސީ އަހަރު ކިޔެވުން ފެށުމުގެ ކުރިން ތަޢުލީމީ ވުޒާރާއިން ވަނީ އެކަމަށް ދުރާލާ ތައްޔާރުވާން ފަށާފައެވެ. ޚާއްސަކޮށް ދަރިވަރުންނަށް ބޭނުންވާނެ ޓެކްސްޓް ފޮތްތައް ސްކޫލްތަކަށް ފޮނުވުމުގެ މަސައްކަތް މިދިޔަ ޑިސެމްބަރު މަހުގެ ތެރޭގައި ވަނީ ފަށާފައެވެ. އަދި މިހާރުވަނީ ސަރުކާރުގެ ސްކޫލްތަކަށް ޓެކްސްޓްފޮތްތައް ފޮނުވާ ނިންމާފައިވާކަމަށް ތަޢުލީމީ ވުޒާރާއިން ވަނީ ވިދާޅުވެފައެވެ. މީގެ އިތުރުން މުދައްރިސުން ހަމަކުރުމުގެ މަސައްކަތްވެސް ކުރައްވާފައިވާކަން ފާހަގަކޮށްލެވެއެވެ.

މާދަމާ ދިރާސީ އަހަރުގެ ކިޔެވުން ފަށާއިރު މިއަހަރު ދަރިވަރުންނަށް ބޮޑު ޗުއްޓީ ލިބޭނީ އިހު އޮތްގޮތަށް ޑިސެމްބަރު މަހުގައެވެ. އެގޮތުން ދަރިވަރުންގެ ބޮޑު ޗުއްޓީ ފެށޭނީ ޑިސެމްބަރު މަހުގެ 17 ވަނަ ދުވަހުގައެވެ. އަދި 2027 ވަނަ އަހަރުގެ ކިޔެވުން ފެށޭނީ ޖެނުއަރީ މަހުގެ 17 ވަނަ ދުވަހުގައެވެ.