ރާއްޖެ މަގުން އެހެން ޤައުމުތަކަށް މުދާ އުފުލާ މިންވަރު %22 އިތުރުވެއްޖެ

ވެލާނާ އިންޓަރނޭޝަނަލް އެއަރޕޯޓުން ކާގޯ އުފުލި މިންވަރު އަހަރުން އަހަރަށް 10 އިންސައްތަ އިތުރުވެފައިވާ ކަމަށް، ވެލާނާ އެއާޕޯޓުން އާންމު ކުރި ތަފާސްހިސާބުތަކުން ދައްކައިފިއެވެ.

ވެލާނާ އެއަރޕޯޓުން އާންމުކުރި ތަފާސްހިސާބުތައް ދައްކާގޮތުން ނިމިދިޔަ 2025 ވަނަ އަހަރު އެ އެއާޕޯޓު މެދުވެރިކޮށް މުޅި ޖުމްލަ 89,163 ޓަނުގެ މުދާ އުފުލާފައިވެއެވެ. މިއީ 2024 ވަނަ އަހަރާއި އަޅާބަލާއިރު 10 އިންސައްތައިގެ އިތުރުވުމެކެވެ. ވެލާނާ އެއާޕޯޓު މެދުވެރިވެ އުފުލި މުދާ އިތުރުވެފައިވާއިރު، މީގެ ތެރޭގައި ރާއްޖެ އެތެރެކުރި މުދަލާއި، ރާއްޖެއިން ބޭރު ކުރި މުދަލުގެ އިތުރުން ރާއްޖެ މަގުން އެހެންޤައުމުތަކަށް އުފުލާފައިވާ ޓްރާންސްޝިޕްމެންޓް މުދާ ހިމެނެއެވެ.

ތަފާސްހިސާބުތައް ދައްކާގޮތުން މިދިޔަ އަހަރު ރާއްޖެއަށް 66,840 ޓަނުގެ މުދާ އެތެރެކޮށްފައިވެއެވެ. އަދި މިމުއްދަތުގެ ތެރޭގައި ވެލާނާ އެއަރޕޯޓުން 23،323 ޓަނުގެ މުދާ ބޭރުކޮށްފައިވެއެވެ.

ވެލާނާ އެއާޕޯޓުގެ މިދިޔަ އަހަރުގެ ތަފާސްހިސާބުތައް ދައްކާގޮތުން، މިދިޔަ އަހަރު އެއަރޕޯޓުން ދެމުންދާ ކާގޯ ޚިދުމަތުން ކުރިއެރުމެއް އައި ބަޔަކީ، ޓްރާންސްޝިޕްމެންޓް މުދާ ނުވަތަ ރާއްޖެ މަގުން އެހެން ޤައުމުތަކަށް އުފުލާ މުދަލުގެ މިންވަރެވެ. މިމުއްދަތުގައި ޓްރާންސްޝިޕްމެންޓް މުދަލުގެ ގޮތުގައި 16،372 ޓަނުގެ މުދާ އުފުލާފައިވެއެވެ. މިއީ އޭގެ ކުރީ އަހަރާއި އަޅާބަލާއިރު 22 އިންސައްތައިގެ އިތުރުވުމެވެ.

ޓްރާންސްޝިޕްމެންޓް މުދަލުގެ ތެރެއިން އެންމެ ގިނައިން އުފުލާފައިވަނީ ވައިގެ މަގުން އުފުލި މުދަލެވެ. މިގޮތުން ޖުމްލަ 13،180 ޓަނުގެ މުދާ ވައިގެ މަގުން އުފުލާފައިވާއިރު، ސީ-ޓު-އެއަރ ކާގޯ ޚިދުމަތުގެ ތެރެއިން ކަނޑުމަގުން ގެނެސް ވައިގެ މަގުން 3،192 ޓަނުގެ މުދާ އުފުލާފައިވެއެވެ.

ކާގޯ ޚިދުމަތަށް ބޮޑު ކުރިއެރުމެއް އައިސްފައިވާއިރު، ވެލާނާ އެއަރޕޯޓު މެދުވެރިކޮށް ވައިގެ މަގުން މުދާ އުފުލާ ކާގޯ އުޅަނދުތަކުގެ އަދަދުވެސް އިތުރުވެފައިވެއެވެ.

ވެލާނާ އެއަރޕޯޓަށް ދަތުރުކުރާ ކާގޯ އޮޕަރޭޓަރުން:

• އެފްކޮމް
• ފްލައި ވާޔު
• އެމް ޖެޓްސް
• ޤަތަރު ކާގޯ
• ޤައުމީ އެއަރލައިންތައް
• އެއަރ މާސްޓަރ
• އެމްއެންޖީ އެއަރލައިން

މި އޮޕަރޭޓަރުން މެދުވެރިކޮށް ހަމައެކަނި މުދާ އުފުލުމަށް 524 ދަތުރުކޮށްފައިވެއެވެ. އަދި ހަމައެކަނި ކާގޯ އޮޕަރޭޓަރުން އުފުލާފައިވާ މުދަލުގެ ބަރުދަން 4300 ޓަނަށް އަރާ ކަމަށް، ވެލާނަރ އެއަރޕޯޓުން ވިދާޅުވެއެވެ.

ކާގޯގެ ޚިދުމަތައް ހަރުދަނާ ކުރުމަށް ކުރަމުން އަންނަ މަސައްކަތުގެ ތެރެއިން ވެލާނާ އިންޓަރނޭޝަނަލް އެއާޕޯޓު ހިންގާ އެމްއޭސީއެލް ވަނީ ޚިދުމަތް ފުޅާކުރުމުގެ ގޮތުން، ޔޫއެލްޑީ ސްޓޯރޭޖް ނުވަތަ މަތިންދާ ބޯޓަށް މުދާ އެރުވުމުގެ ކުރިން އެޕްރަން މަތީ މުދާ ބަހައްޓާ ސަރަހައްދު ބޮޑުކުރުމަށް ނިންމާފައެވެ. އަދި ރާއްޖެ ގެންނަ މުދާ މުދާ ކްލިއަރ ކުރެވޭ މިންވަރު އަވަސް ކުރުމަށް އިތުރު އެކްސްރޭ މެޝިންތައް ބަހައްޓައި ބައެއް ޚިދުމަތްތައް އޮޓޮމޭޓް ކުރުމުގެ މަސައްކަތްވެސް ކުރަމުންދާ އެމްއޭސީއެލްއިން ވިދާޅުވިއެވެ.