ނަރުހުންގެ ކޮލިފިކޭޝަން ސެޓްފިކެޓް ހުށަނާޅާނަމަ ދާއިމީ ރަޖިސްޓްރީ ދޫނުކުރާނެ
-
ކޮލިފިކޭޝަން ސެޓްފިކެޓް ހުށަނާޅާކަން ފާހަގަކުރެވިފައިވާކަމަށް
-
އަންނަ މަހުގެ ފުރަތަމަ ދުވަހުން ފެށިގެން އައު އުޞޫލަކަށް ޢަމަލުކުރަން ފަށާނެ
ދިވެހި ނަރުހުން އަލަށް ރަޖިސްޓްރީވުމަށް ކޯސް ނިންމިކަމުގެ ލިއުން ހުށަހެޅިނަމަވެސް ކޮލިފިކޭޝަން ސެޓްފިކެޓް ހުށަނާޅާނަމަ ވަގުތީ ރަޖިސްޓްރޭޝަނެއް ދޭ ގޮތަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ނިންމައިފިއެވެ.
މޯލްޑިވްސް ނާސިން އެންޑް މިޑްވައިފަރީ ކައުންސިލުން ވިދާޅުވީ އެ ކައުންސިލުގައި ދިވެހި ނަރުހުން އަލަށް ރަޖިސްޓްރީވުމަށް ކޯސް ނިންމިކަމުގެ ލިއުން ހުށަހަޅަމުންދިޔަނަމަވެސް ކޮލިފިކޭޝަން ސެޓްފިކެޓް ހުށަނާޅާކަން ފާހަގަކުރެވިފައިވާކަމަށެވެ. އަދި މިހާރު އަމަލުކުރަމުންދާ އުސޫލުގެ ދަށުން، ކޯސް ނިންމިކަމުގެ ލިޔުމަށް ބިނާކޮށް ދާއިމީ ރަޖިސްޓްރޭޝަނަކާއެކު ޕްރޮވިޝަނަލް ލައިސަންސެއް ދޫކުރި ނަމަވެސް އަންނަ މަހުގެ ފުރަތަމަ ދުވަހުން ފެށިގެން އެ އުޞޫލަށް ބަދަލު ގެނައުމަށް ނިންމާފައިވާކަމަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ވިދާޅުވިއެވެ.
އެ ކައުންސިލުން ވިދާޅުވީ އަންނަ މަހުގެ ފުރަތަމަ ދުވަހުން ފެށިގެން ކޯސް ނިންމިކަމުގެ ލިޔުމާއެކު ރަޖިސްޓްރީވުމަށް ހުށަހަޅާ ފަރާތްތަކަށް ދޫކުރެވޭނީ ޕްރޮވިޝަނަލް ރަޖިސްޓްރޭޝަނާއި ޕްރޮވިޝަނަލް ޕްރެކްޓިސިންގ ލައިސަންސްކަމަށެވެ. މީގެ އިތުރުން، ކޮމްޕިޓެންސީ އިމްތިހާނުން ފާސްވެގެން ލައިސަންސް ހޯދުމަށް ހުށަހަޅާ ނަރުހުންނާއި، އިތުރު ކޮލިފިކޭޝަން ހިމަނަން އެދޭ ނަރުހުންވެސް، ކޮލިފިކޭޝަން ސެޓްފިކެޓް ހުށަހަޅަންޖެހޭނެކަމަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ވިދާޅުވިއެވެ.