އިންޑިއާ އާއި ވިލާތުގެ އިއްތިހާދާ ދެމެދު ވިޔަފާރީގެ ވަރުގަދަ އެއްބަސްވުމެއް

ދުނިޔޭގެ ވިޔަފާރިއަށް ކުރަމުންދާ ލޮޅުންތަކުގެ ތެރެއިން، އިންޑިއާ އާއި ވިލާތުގެ ޤައުމުތަކުގެ އިއްތިޙާދު، އީޔޫ އާދެމެދު ވިޔަފާރީގެ ވަރުގަދަ އެއްބަސްވުމެއް އެކުލަވާލައިފިއެވެ.

ގިނަ އަހަރުތަކެއްގެ މަޝްވަރާތަކަށްފަހު، މި އެއްބަސްވުމުގައި ސޮއިކޮށްފައިމިވަނީ، އެމެރިކާއަށް ގިނަ ޤައުމުތަކުން އެތެރެކުރާ މުދަލުން އެތައް ގުނައަކުން ޑިޔުޓީ ބޮޑުކުރުމާއެކު ދުނިޔޭގެ ވިޔަފާރިއަށް ބޮޑެތި ލޮޅުންތަކެއް އަރަމުންދާ ދަނޑިވަޅެއްގައެވެ.

މި އެއްބަސްވުމުގައި، އީޔޫއަށް އެތެރެކުރާ އިންޑިއާގެ މުދަލުންނާއި، އިންޑިއާއިން އީޔޫއަށް އެކްސްޕޯޓުކުރާ މުދަލުގެ ގިނަ ބާވަތްތަކުން ޑިޔުޓީ ކުޑަކުރަން ނޫނީ މަޢާފުކުރަން ވަނީ ހިމަނައިފައެވެ.

އީޔޫން ބުނީ، މި އެއްބަސްވުމަކާއެކު 2032ވަނަ އަހަރާ ހަމައަށް، އެ އިއްތިޙާދުގެ ޤައުމުތަކުން އިންޑިއާއަށް ބޭރުކުރާ މުދާ ދެ ގުނައަށް އިތުރުވާނެ ކަމަށެވެ. މިގޮތަށް ބޭރުކުރާ މުދަލުގެ ގާތްގަނޑަކަށް 96.6 އިންސައްތައިގެ މުދަލުން ޑިޔުޓީ ކުޑަކުރުމުގެ ސަބަބުން، އީޔޫގެ ކުންފުނިތަކަށް 4.75 ބިލިއަނެއްހާ އެމެރިކާ ޑޮލަރު ސަލާމަތްކުރެވޭނެކަމަށް އީޔޫން ބުންޏެވެ.

އިންޑިއާގެ ވިޔަފާރިއާ ބެހޭ ވުޒާރާއިން ނެރުނު ބަޔާނެއްގައި ބުނީ، ކުރިއަށް އޮތް ހަތް އަހަރަށް ބަހާލައިގެން، އިންޑިއާއިން އީޔޫއަށް އެކްސްޕޯޓުކުރާ 99.5 އިންސައްތަ މުދަލުން ޑިޔުޓީ ކުޑަވާނެ ކަމަށެވެ. އަދި އަންނައުނާއި، ރަބަރު، ކެމިކަލް، ރަންރިހި އަދި ދަގަނޑުގެ ބާވަތްތަކުން ޑިޔުޓީ މަޢާފުކުރަން އީޔޫން އެއްބަސްވެފައިވާ ކަމަށް އެ ވުޒާރާއިން ބުންޏެވެ.

މިދިޔަ އަހަރުގެ މާޗު މަހާ ހަމައަށް، އިންޑިއާ އާއި އީޔޫއާ ދެމެދު 136.5 ބިލިއަން ޑޮލަރުގެ ވިޔަފާރިކޮށްފައިވާއިރު، އިންޑިއާ އާއި އެމެރިކާއާ ދެމެދު ކުރެވުނު ވިޔަފާރީގެ އަގު 132 ބިލިއަން ޑޮލަރަށް އަރައެވެ. ނަމަވެސް، ބޭރުން އެތެރެކުރާ މުދަލުން ޑިޔުޓީ ބޮޑުކުރަން، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ތަންފީޒުކުރަން ފަށާފައިވާ ސިޔާސަތުގެ ދަށުން، އެމެރިކާއަށް އިންޑިއާއިން އެތެރެކުރާ މުދަލުގެ ގިނަ ބާވަތްތަކުން 50 އިންސައްތައާ ހަމައަށް ވަނީ ޑިޔުޓީ ބޮޑުކޮށްފައެވެ.

އިންޑިއާއިން ބުނީ، އީޔޫއާ ދެމެދު މި އެއްބަސްވުމުގައި ރަސްމީކޮށް ސޮއިކުރާނީ، ޤާނޫނީ މަރުޙަލާތައް ނިމުމަކަށް އައުމަށްފަހުގައި ކަމަށެވެ. އެކަމަށް ހަ މަހެއްހާ ދުވަސް ހޭދަވާނެކަމަށް ލަފާކޮށްފައިވާއިރު، އެއްބަސްވުމެއްގައި ސޮއިކުރާތާ އެއް އަހަރުގެ ދުވަހުގެ ތެރޭގައި، ޢަމަލުކުރަން ފަށާނެކަމަށް އިންޑިއާއިން ބުނެފައިވެއެވެ.