ފުވައްމުލަކު މަގު ހެދުން: ކޮންކްރީޓް މަސައްކަތުގެ ބޮޑުބައި ނިމިއްޖެ

ފުވައްމުލައް ސިޓީގެ މަގުތަކުގައި ތާރުއެޅުމުގެ މަސައްކަތުގެ 2ވަނަ ފިޔަވަހީގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިކް ކޮންޕެނީ، އެމްޓީސީސީއާއި ހަވާލުކޮށްގެން ދަނީ ކުރަމުންނެވެ. މި މަސައްކަތުގެ ދަށުން މިވަގުތުވެސް 14 މަގެއްގެ މަސައްކަތް ދަނީ ކުރަމުންނެވެ.

ފުވައްމުލައް ސިޓީގެ މަގުތަކުގައި ތާރުއެޅުމުގެ މަސައްކަތުގެ 2ވަނަ ފިޔަވަހީގެ ދަށުން 52 މަގެއްގައި ތާރު އެޅުމަށް ވަނީ ހަމަޖެހިފައެވެ. މަގު ހެދުމަށް މަސައްކަތުގެ ދަށުން ކޮންކްރިޓް މަސައްކަތުގެ %65 މިހާރު ނިމިފައިވާކަމަށް އެމްޓީސީސީން ވިދާޅުވެއެވެ.

އެމްޓީސީސީގެ އެސޯސިއޭޓް ސައިޓް މެނޭޖަރ މުޙައްމަދު އަޒްމަތު ވިދާޅުވީ، މިވަގުތު އެންމެ އިސްކަމެއްދީގެން ކުރިއަށްދަނީ ކާސްޓިންގެ މަސައްކަތްކަމަށެވެ. އެގޮތުން ކޮންކްރިޓް މަގުތަކަށް ބޭނުންވާ ކޭބަލް ޖަންގްޝަނާއި، ސެޓްލްމަންޓް ޓޭންކާއި، ކާބް ސްޓޯން ތައްޔާރުކުރުމުގެ މަސައްކަތް ކުރިއަށްދާކަމަށް އޭނާ ވިދާޅުވިއެވެ. އަދި ކޮންކްރިޓް މަސައްކަތުގެ %65 އަށްވުރެ ބޮޑު އަދަދެއް މިހާރު ނިމިފައިވާކަމަށް އޭނާ ވިދާޅުވިއެވެ. މަސައްކަތް ކުރިއަށްގެންދަނީ އާންމުންނަށް ދަތި ނުވާނެ ގޮތަކަށްކަމަށް އޭނާ ވިދާޅުވިއެވެ.

"މިފަހަރު މަސައްކަތް ކުރިއަށްދާއިރު ކުރީ ފަހަރުތަކާއި ޚިލާފަށް މި ބަލަނީ މަގުތަކައް ކޮނެފައި ގިނަ ދުވަހު ނުބާއްވާ އެ މަގެއް ކޮނެފައި ޖެހިގެން އަންނަ ދުވަހު ހެނދުނު އެ މަގެއްގައި ކާރު އެއްޗެހި ދުއްވާލެވޭވަރަށް އެ މަގެއް ސާފުކޮށްފައި ޖަންގްޝަން ވަޅުލައި ހޮޅި އަޅައި ބެކް ފިލްކޮށް ނިންމާފައި އެދުވަހަކު ދިހައެއް އެގާރަ ޖެހިއަސް ގެއަށްދާގޮތަށް މިއިންނަނީ". އަމްޒަތު ވިދާޅުވިއެވެ.

މި ސަރުކާރު ހަވާލުވިއިރު ފުވައްމުލަކު ސިޓީގެ 2ވަނަ ފިޔަވަހީގެ މަގު ހެދުމުގެ މަސައްކަތް އޮތީ ހުއްޓިފައެވެ. ނަމަވެސް މިހާރު ސަރުކާރުން މި މަސައްކަތް ފަށައިގެން އަންނަނީ ކުރިއަށް ގެންދަމުންނެވެ. ފުވައްމުލައް ސިޓީގެ މަގުތައް ޒަމާނީ ފެންވަރަށް ތަރައްޤީވެގެން ދިއުމަކީ އެރަށުގެ ރައްޔިތުންނަށް އޭގެ ސަބަބުން ބޮޑު ފަސޭހައެއް ލިބިގެންދާނެކަމެއްކަމަށް އާންމު ރައްޔިތުން ވަނީ ބުނެފައެވެ.

ފުވައްމުލައް ސިޓީގެ މަގު ހެދުމުގެ 3ވަނަ ފިޔަވަހީގެ މަސައްކަތްވެސް މިހާރު ވަނީ އެމްޓީސީސީއާއި ހަވާލުކޮށްފައެވެ. މިވަގުތު ކުރިއަށްދަނީ މިކަމަށް ބޭނުންވާ ދިރާސާތައް ކުރުމުގެ މަސައްކަތެވެ.