ބޯކޮށް ވާރޭވެހުމުގެ ސަބަބުން ބިންގަނޑު ކަނޑައިގެން ގޮސް، އިޓަލީވިލާތުގެ ސިސިލީގެ އަވަށެއް ކަމަށްވާ ނިޝްޝޭމީގައި ފަރުބަދަ މަތީގައި ހުންނަ ބައެއް ގޭގެ ދެންމެދެންމެ ވެއްޓުމުގެ ފުރުޞަތު އޮތް ކަމަށް އެ ޤައުމުގެ މަދަނީ ރައްކާތެރިކަމާބެހޭ އިސްވެރިޔާ ވިދާޅުވެއްޖެއެވެ.
25،000 މީހުންގެ އާބާދީއެއް އޮންނަ ނިޝްޝޭމީ އަކީ އުސް ޕްލެޓޫއެއްގެ މަތީގައި އޮންނަ އަވަށެކެވެ. ބިންގަނޑު ކަނޑައިގެން ދިޔުމުގެ ސަބަބުން އެ ޕްލެޓޫގެ ބައިބައި މަޑުމަޑުން ދަނީ ވެއްޓެމުންނެވެ. ޕްލެޓޫގެ ބޮޑެތި ތަންތަންގަނޑު ނެއްޓެމުންދާއިރު އެ ސަރަޙައްދާ އިންވެގެންވާ އިމާރާތްތަކުގެ އެއްބައި މިހާރު ވެސް އޮތީ ބޭރަށް އެލިފައެވެ. މިހާ ތަނަށް 1،500 މީހުން ވަނީ ރައްކާތެރި ސަރަޙައްދުތަކަށް ގެންގޮސްފައެވެ.
މަދަނީ ރައްކާތެރިކަމާބެހޭ އިސްވެރިޔާ ފޭބިއޯ ސިސިލިއާނޯ ވިދާޅުވި ބިންގަނޑު ކަނޑައިގެން ދިޔުމުގެ އަސަރުކޮށްފައިވާ ސަރަޙައްދުތަކުގައި ދިރިއުޅޭ މީހުން ދާއިމީ ގޮތަކަށް އެހެން ސަރަޙައްދުތަކަށް ބަދަލުކުރާނެ ކަމަށެވެ. އެ ސަރަޙައްދުގައި ހުރި ގެ ތަކަކީ މީހުން ދިރިއުޅެން އެކަށީގެންވާ ތަންތަން ނޫން ކަމަށް އޭނާ ވިދާޅުވިއެވެ. އަދި ބިންގަނޑު ކަނޑައިގެން ދިޔުން މަޑުޖެހުމުން ޙާލަތު އިތުރަށް ވަޒަން ކުރާނެ ކަމަށް އޭނާ ވިދާޅުވިއެވެ.
މިދިޔަ ހަފްތާގެ ތެރޭގައި އެރި ތޫފާނުގެ ސަބަބުން އެންމެ ބޮޑަށް އަސަރުކޮށްފައިވާ ސިސިލީއާއި ސާޑިނިޔާއާއި ކެލެބްރިޔާގައި އިޓަލީވިލާތުގެ ސަރުކާރުން ވަނީ ކުއްލި ނުރައްކަލުގެ ޙާލަތު އިޢުލާނުކޮށްފައެވެ. އިޓަލީވިލާތުގެ ސަރުކާރުން ވަނީ ފަހުގެ ތޫފާނުގައި އެންމެ ބޮޑެތި ގެއްލުން ލިބުނު ސަރަޙައްދުތަކަށް އެހީތެރިވުމަށް 100 މިލިޔަން ޔޫރޯ ހަމަޖައްސަައިފައެވެ. ނަމަވެސް ލިބިފައިވާ ގެއްލުމުގެ އަގު އެއް ބިލިޔަން ޔޫރޯއަށް އަރާނެ ކަމަށް އިދާރާތަކުން ވަނީ ލަފާކޮށްފައެވެ.
މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ބޮޑެތި ހާދިޘާތައް އިޓަލީވިލާތަށް ކުރިމަތިވާ މިންވަރު ފާއިތުވި އަހަރުތަކުގައި ވަނީ ވަރަށް ބޮޑަށް އިތުރުވެފައެވެ. އެ ޤައުމުގެ އެކި ސަރަޙައްދުތަކުގައި ފެން ބޮޑުވުމުގެ ހާދިޘާތައް ހިނގައި، އެތައް ބަޔަކު މަރުވެފައިވެއެވެ. އާންމުގޮތެެއްގައި އެ ފަދަ ހާދިޘާތައް ނުހިނގާ ސަރަޙައްދުތަކުގައި ވެސް ބިންގަނޑު ކަނޑައިގެން ދިޔުމާއި ފެން ބޮޑުވުމުގެ ހާދިޘާތައް ހިނގާފައިވެއެވެ.