އިންތިޚާބަށް ފޯމު ހުށަހެޅުމުގެ ވަގުތު 2 ގަޑިއިރަށް އިތުރުކޮށްފި

ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ވާދަކުރަން ފޯމު ހުށަހެޅުމަށް ކޮންމެ ދުވަހަކުވެސް ހުޅުވާލާ ވަގުތު 2 ގަޑިއިރަށް އިތުރު ކުރުމަށް އިލެކްޝަންސް ކޮމިޝަނުން ނިންމައިފިއެވެ.

އިންތިޚާބަށް ވާދަކުރުމަށް ފޯމު ހުށަހަޅަން ޖެހެނީ، އިލެކްޝަންސް ކޮމިޝަންގެ މައި ޕޯޓަލް މެދުވެރިކޮށެވެ. ފޯމު ހުށަހެޅުމުގެ ފުރުޞަތު މި މަހުގެ 17ވަނަ ދުވަހު ހުޅުވާލާފައިވާއިރު، ޕޯޓަލް މެދުވެރިކޮށް ފޯމު ބަލައިގަންނަ ވަގުތު ކަމުގައި ކަނޑައަޅާފައިވަނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން މެންދުރު 15:30އަށެވެ. އަދި ހުކުރު ދުވަސްތަކުގައި މެންދުރު 15:30 އިން 18:00 އަށެވެ.

އިލެކްޝަންސް ކޮމިޝަނުން ވިދާޅުވީ، އިންތިޚާބުގައި ވާދަކުރުމަށް ކުރިމަތިލުމަށް އެދޭ ފަރާތްތަކުގެ ފޯމު އޮންލައިންކޮށް ކޮންމެ ދުވަހަކު ހުށަހެޅޭނެ ވަގުތު މިހާރު ދެ ގަޑިއިރަށް އިތުރުކޮށްފައިވާ ކަމަށެވެ. އެގޮތުން އަންނަ ހަފުތާގެ އާދީއްތަ ދުވަހުގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 05:30 އަށް އަދި ހުކުރު ދުވަހު މެންދުރުފަހު 03:30 އިން ރޭގަނޑު 08:00 އަށް ޕޯޓަލް މެދުވެރިކޮށް ފޯމު ބަލައިގަންނާނެ ކަމަށް އެ ކޮމިޝަނުން ވިދާޅުވިއެވެ.

އިލެކްޝަންސް ކޮމިޝަނުން މި ބަދަލު ގެންނެވީ، މައި ޕޯޓަލް މެދުވެރިކޮށް ފޯމު ހުށަހަޅަން ހުޅުވާލާ ވަގުތަކީ އެކަށީގެންވާ ވަގުތެއް ނޫންކަމަށް ބައެއް ސިޔާސީ ޕާޓީތަކުންނާއި ސިޔާސީ ފަރާތްތަކުން ބުނެފައިވަނިކޮށެވެ.

އިންތިޚާބުގައި ވާދަކުރަން 10 ދުވަހުގެ ތެރޭގައި 2،254 ފޯމު ވަނީ ހުށަހަޅާފައެވެ. އެއީ، ކައުންސިލްތަކަށް ވާދަކުރުމަށް ހުށަހެޅި 1،276 ފޯމާއި، އަންހެނުންގެ ކޮމިޓީތަކަށް ވާދަކުރުމަށް ހުށަހެޅި 978 ފޯމެވެ. ނަމަވެސް މީގެ ތެރެއިން ފޯމު ބަލައިގަނެ ކެންޑިޑެސީ ޤަބޫލުކޮށްފައިވަނީ 1857 މީހުންނެވެ.

ކެންޑިޑެސީ ޤަބޫލުނުކުރާ މައިގަނޑު ސަބަބުތަކަކީ، ކުށާއި ދަރަނީގެ ރެކޯޑު އުމުރަށް ހުށަހަޅާފައި ނެތުމާއި، ކުށެއް ނުވަތަ ދަރަންޏެއް އޮތްނަމަ އެކަމުގެ ތަފްސީލު ހުށަހަޅާފައި ނެތުމެވެ. އަދި ކަރެކްޝަނަލް ސަރވިސްއިން ފުރިހަމަކޮށް، ހުށަހަޅަންޖެހޭ ކުށުގެ ރެކޯޑު ބައެއް ފަރާތްތަކުން ހުށަނާޅާ އޮތުމަކީވެސް ކެންޑިޑެސީ ޤަބޫލުނުކުރާ ސަބަބެއް ކަމަށްވެސް އެ ކޮމިޝަނުން ވިދާޅުވެއެވެ.

އެހެންކަމުން ފޯމު ހުށަހަޅާ ފަރާތްތަކުން މިކަންކަން ސަމާލުވުމަށް އިލެކްޝަންސް ކޮމިޝަނުން ޢިލްތިމާސްކުރައްވައެވެ.