މާލެއިން ބޭރުގައި ފުރަތަމަ ކެތުލެބް އައްޑޫސިޓީގައި

އައްޑޫ އިކުއެޓޯރިއަލް ހޮސްޕިޓަލުގެ ކެތު ލެބުގެ ޚިދުމަތް ފަށައިފިއެވެ.

މިއީ، މާލެއިން ބޭރުގައި ޤާއިމްކުރި ފުރަތަމަ ކެތު ލެބެވެ.

އައްޑޫގައި ކެތު ލެބުގެ ޚިދުމަތް ފެށުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ. ރައީސްގެ ވަޢުދާ އެއްގޮތައް ކެތު ލެބު ޤާއިމުކުރުމަށް އިމާރާތަށް ގެންނަންޖެހޭ ބަދަލުތައް ގެނެސް، މެޝިނަރީސް އިންސްޓޯލްކޮށް ޚިދުމަތް ވަނީ ފަށާފައެވެ. އެގޮތުން މިހާތަނަށް 7 މީހަކު ވަނީ ފަރުވާ ހޯދާފައެވެ. ކެތު ލެބުގެ ޚިދުމަތް ފަށާފައިވަނީ، އައްޑޫ އެކުއެޓޯރިއަލް ހޮސްޕިޓަލާއި އައިޖީއެމްއެޗާއި ގުޅިގެންނެވެ.

ކެތު ލެބުގެ ހިދުމަތް ފެށުމާއި ގުޅިގެން އޭއީއެޗު އަދި އައިޖީއެމްއެޗާއި ގުޅިގެން ވަނީ ނޫސްވެރިންގެ ބައްދަލުވެއް ބާއްވާފައެވެ. މި ބައްދަލުވުމުގައި ވާހަކަ ދައްކަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، ކެތު ލެބުގެ ޚިދުމަތް ފެށުމަށްޓަކައި ގިނަ މަސައްކަތްތަކެއް ކޮށްފައިވާ ކަމަށެވެ. އަދި އައްޑޫ ސިޓީގައި ކެތު ލެބުގެ ޚިދުމަތް ފެށިގެން މިދިޔައީ ސަކޭތަ އިންސައްތަ ދިވެހިންނާއި އެކުގައި ކަމަށް ވިދާޅުވިއެވެ. ޚަލީމް ވިދާޅުވީ، ބޭނުންވަނީ ދިވެހިންގެ އަތްމަތީގައި ބާއްވައިގެން ޞިއްޙީ ޚިދުމަތްތައް ފުޅާކުރުން ކަމަށްވެސް ޙަލީމް ވިދާޅުވިއެވެ.

ޙަލީމް ވިދާޅުވީ، މި ޚިދުމަތް ފެށުމަކީ ސަރުކާރުން އަތޮޅު ތެރޭގެ ޞިއްޙީ ޚިދުމަތް ފުޅާކުރުމަށް ކުރިޔަށްގެންދާ މަސައްކަތްތަކަށް ލިބުނު ބޮޑު ކުރިއެރުމެއް ކަމަށެވެ.

" ކެތް ލެބުގެ މަސައްކަތް ފެށިގެން މިދިޔައީ އަޅުގަނޑުމެން ފުރަތަމަ ކެތު ލެބެެއް ފެށިގެން ދިޔަ މޮޑެލްގައި. އޭރު ބޭރު ކުންފުންޏަކާއި އެކީގައި ޚިދުމަތް ފެށިގެން ދިޔަ އުސޫލުން މިފަހަރު ބޭރުގެ ކުންފުންޏެއް ނެތި 100 ޕަރސެންޓު ދިވެހި ޑޮކްޓަރުންގެ ބެއްލެވުމުގެ ދަށުން އައްޑޫ އިކުއިޓޯރިއަލް ހޮސްޕިޓަލުގައި ޚިދުމަތް ފެށިގެން މިިދިޔައީ" ޙަލީމް ވިދާޅުވިއެވެ.

އައްޑޫ އިކުއެޓޯރިއަލް ހޮސްޕިޓަލުގެ ސީއީއޯ އިބްރާހިމް ޔާސިރު ވިދާޅުވީ، އައްޑޫގައި ކެތު ލެބު ޤާއިމްކުރީ 2023 ގައި ކަމަށެވެ. އެހެންނަމަވެސް ޚިދުމަތް ނުފެށި ގިނަ ދުވަސްތަކެއް ވެފައިވާ ކަމަށާއި، މި ސަރުކާރުން ކުރެއްވި މަސައްކަތުން ކެތު ލެބުގެ މަސައްކަތް ފެށުމަކީ، މުޅި ދެކުނުގެ އަތޮޅުތަކަށްވެސް ލިބުނު ކުރިއެރުމެއް ކަމަށެވެ. އޭނާ ވިދާޅުވީ، އައިޖީއެމްއެޗާއެކު މި މަސައްކަތް ފެށުމަކީވެސް ލިބުނު ކުރިއެރުމެއް ކަމަށާއި، ދެ ހޮސްޕިޓަލް ގުޅިގެން އަދިވެސް ގިނަ މަސައްކަތްތަކެއް ކުރަން އެބަހުރި ކަމަށެވެ.

އެ ހޮސްޕިޓަލުގެ މެޑިކަލް ޑިރެކްޓަރ ޑރ. ފާތިމަތު އަމާނީ ނަސީރު ވިދާޅުވީ، އެމަރޖެންސީގައި އައްޑޫއިން މާލެ ފޮނުވާ ބަލި މީހުންގެ ތެރެއިން ކޮންމެ 5 މީހަކުން އެކަކަކީ، ހިތުގެ ކޮންމެވެސް ކަމެއް ހުރެގެން މާލެ ފޮނުވާ މީހެއް ކަމަަށެވެ. މީގެ އިތުރުން އިމަރޖެންސީ ނޫން ގޮތްގޮތަށް މާލެއަށް ނުވަތަ ރާއްޖެއިން ބޭރަށް ހަފްތާއަކު 5 މީހުން ފޮނުވަން ޖެހޭ ކަމަށްވެސް ވިދާޅުވިއެވެ.

"މި އަދަދުތަކަށް ބަލާލާއިރު ބަލި މީހުންނަށާއި އާއިލާތަކަށްވެސް ސީދާ ގޮތުންނާއި ނުސީދާ ގޮތުން ވަރަށް ބޮޑެތި ލުއިފަސޭހަތަކެއް ލިބިގެންދާނެ ކަމެއް ކެތް ލެބުގެ ޚިދުމަތްތައް އައްޑޫ އިކުއެޓޯރިއަލް ހޮސްޕިޓަލުގައި ފެށިގެން ދިޔުމަކީ" އަމާނީ ވިދާޅުވިއެވެ.

އައްޑޫ އިކުއެޓޯރިއަލް ހޮސްޕިޓަލުގައި މި ޚިދުމަތް ފަށާފައިވަނީ، އައިޖީއެމްއެޗުގެ ކާޑިއެކް ސެންޓަރާ ގުޅިގެންނެވެ. މިވަގުތު އައިޖީއެމްއެޗުގެ ޑޮކްޓަރުންނާއެކު ސާރޖަރީތައް ހެދުމުގައި ހަރަކާތްތެރިވި ނަމަވެސް ކުރިއަށް އޮތްތަނުގައި ތަމްރީންތަކަށްފަހު އައްޑޫ އިކުއެޓޯރިއަލް ހޮސްޕިޓަލުގެ ޑޮކްޓަރުންނާއި ނަރުހުން ބަލި މީހުންނަށް ފަރުވާދިނުމުގައި ހަރަކާތްތެރިވާނެ ކަމަށްވެސް އައިޖީއެމްއެޗުން ވިދާޅުވިއެވެ.