އީރާނުން އެމެރިކާއާއެކު މަޝްވަރާގެ މޭޒުގެ ދޮށަށް އައުމަށް ދެކޮޅު ހަދައި އެ ޤައުމުގެ ނިއުކްލިޔަރ މަޝްރޫޢުއާ ގުޅޭ އެއްބަސްވުމަކާ ހަމައަށް ނާންނަ ނަމަ ނަަމަ އެމެރިކާއިން އެ ޤައުމަށް ދެން ދޭ ޙަމަލާ މީގެ ކުރިން ދީފައިވާ ޙަމަލާއަށްވުރެ އެތައް ގުނައެއް ވަރުގަދަ ވާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.
މީސްމީޑިޔާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ އީރާނުން ވަރަށް އަވަހަށް މަޝްވަރާގެ މޭޒުގެ ދޮށަށް އަންނާނެ ކަމަށް އުންމީދު ކުރައްވައި ކަމަށެވެ. އަދި ހުރިހާ ބައިވެރިންނަށްވެސް އިންސާފުވެރި އަދި ހަމަހަމަ އެއްބަސްވުމަކާ ހަމައަށް އާދެވޭނެ ކަމަށް އުންމީދުކުރައްވާ ކަމަށެވެ. އީރާނުން ނިއުކްލިޔަރ ހަތިޔާރު ނުގެންގުޅުމަކީ އެންމެ ފައިދާ ބޮޑު ގޮތް ކަމަށް ވެސް ޓްރަމްޕް ވިދާޅުވެފައިވެއެވެ. އަދި ވަގުތު ހިނގަމުންދާ ކަމަށާއި މި ޙާލަތުގައި ވަގުތު ވަރަށް މުހިންމު ކަމަށް ވެސް އޭނާ ވިދާޅުވިއެވެ. އިންޒާރުތަކަކަށް ފަހު މިދިޔަ އަހަރުގެ ޖޫން މަހުގެ ތެރޭގައި އެމެރިކާއިން އީރާނަށް ދިން ވަރުގަދަ ޙަމަލާތައް ހަނދާންކޮށްދެމުން ޓްރަމްޕް ވިދާޅުވީ ދެން ދޭ ޙަމަލާއެއް އެއަށްވުރެ ވަރުގަދަ ވާނެ ކަމަށެވެ. އަދި އީރާނުން އެ ގޮތަށް ކަން ހިންގިޔަ ދީގެން ނުވާނެ ކަމަށް ވެސް އޭނާ ވިދާޅުވިއެވެ.
ޓްރަމްޕްގެ އިންޒާރުތަކާ ގުޅިގެން އީރާނުގެ ރޫޙީ ވެރިޔާ، އާޔަތުالله ޚާމަނާއީގެ މުޝީރެއް ކަމަށްވާ ޢަލީ ޝަމްޚާނީ ވިދާޅުވީ އެމެރިކާއިން އެ ޤައުމަށް ޙަމަލާއެއް ދީފިނަމަ އެމެރިކާއަށާއި ޔަހޫދީންނަށާއި ދެ ބައި މީހުންނަށް ވާގިވެރިވާ ޤައުމުތަކަށް ރައްދުގައި ޙަމަލާ ދިނުމަށް އީރާނުން ތައްޔާރަށް އޮތް ކަމަށެވެ.
އީރާނުގެ ޚާރިޖީ ވަޒީރު، ޢައްބާސް ޢަރާޤްޗީ ވެސް އެކްސްގައި ކުރެއްވި ޕޯސްޓެއްގައި ވިދާޅުވީ އީރާނާ ދެކޮޅަށް އެއްވެސް ވަރަކަށް ބާރު ދައްކައިފި ނަމަ އެ ކަމަށް ވަރުގަދަ ރައްދެއް ވަގުތުން ދިނުމަށް އީރާނުގެ ހަތިޔާރު އެޅި ބާރުތަކުން ތައްޔާރަށް އޮތް ކަމަށެވެ. ކަން އެހެން އޮތް ނަމަވެސް އީރާނުން އަބަދު ވެސް ދެ ފަރާތައް ފައިދާހުރި، އިންސާފުވެރި އަދި ހަމަހަމަ ނިއުކްލިޔަރ އެއްބަސްވުމަކަށް މަރުޙަބާ ކިޔާ ކަމަށް އޭނާ ފާހަގަ ކުރެއްވިއެވެ. ނަމަވެސް އެ ފަދަ އެއްބަސްވުމަކާ ހަމައަށް އައުމުގައި ބިރުދެއްކުމާއި އިންޒާރު ދިނުމަކީ ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ. އަދި އެ ފަދަ އެއްބަސްވުމަކުން ޞުލްޙަވެރި ނިއުކްލިޔަރ މަޝްރޫޢުއެއް ކުރިއަށް ގެންދިޔުމަށް އީރާނަށް ލިބިފައިވާ ހައްޤު ކަށަވަރުވާން ޖެހޭނެ ކަމަށް ވެސް އޭނާ ވިދާޅުވިއެވެ.