އިންޤިލާބީ ބަދަލުތަކާއެކު ޞިއްޙީ ދާއިރާއަށް އައު އުއްމީދެއް
-
އަތޮޅުތަކުގެ ޞިއްޙީ ޚިދުމަތްތައް ފުޅާކުރުމަށް ދަނީ މަސައްކަތްކުރަމުން
-
ވަސީލަތްތައް ޤާއިމުކުރަން 5 ބިލިޔަން ރުފިޔާގެ މަސައްކަތް މިހާރުވެސް ކުރިއަށް
ޤައުމެއްގެ ކުރިއެރުމާއި، ތަރައްޤީގެ އެންމެ މުހިންމު ބިންގަލަކީ އެ ޤައުމެއްގެ ރައްޔިތުންގެ ޞިއްޙީ ދުޅަހެޔޮކަމެވެ. ރައްޔިތުންގެ ޞިއްޙީ ދުޅަހެޔޮކަން ކަށަވަރުނުކޮށް، އިޤްތިޞާދީ ގޮތުންނާއި އިޖުތިމާޢީ ގޮތުން ލިބޭނެ އެއްވެސް ކުރިއެރުމެއް ނެތެވެ. ޞިއްޙީ ދާއިރާ ހަރުދަނާކޮށް، ޒަމާނީ ވަސީލަތްތަކާއެކު މި ޚިދުމަތް ފުޅާކުރުމަކީ ހަމައެކަނި އަސާސީ ބޭނުމެއް ފުއްދައިދިނުމެއް ނޫނެވެ. އެއީ މުޅި ޤައުމުގެ ކުރިމަގާއި، އަންނަން އޮތް ޖީލުތަކުގެ ސަލާމަތަށްޓަކައި ކުރެވޭ އެންމެ ބޮޑު އެއް އިންވެސްޓްމަންޓެކެވެ.
މި މުހިންމު މަޤްޞަދުގައި، ރާއްޖޭގެ ޞިއްޙީ ނިޒާމަށް މިއަދު މިވަނީ ކުރިން ދުވަހަކުވެސް ނުފެންނަ ފަދަ އައު ދިރުމެއް ލިބެން ފަށާފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޒަޢާމާތާއި ހަވާލުވެވަޑައިގަތުމަށްފަހު، ޞިއްޙީ ދާއިރާ ކުރިއެރުވުމަށް ދެއްވި އިސްކަމާއި ކުރެއްވި މަސައްކަތުގެ ސަބަބުން މިއަދު މިވަނީ މި ދާއިރާއަށް އިންޤިލާބީ" ބަދަލެއް ގެނެސްދީފައެވެ. މީގެ ކުރިން ދުވަހަކުވެސް ތަޖުރިބާނުކުރާ މިންވަރަށް މި ދާއިރާ ކުރިއެރުވުމަށް ކުރެވޭ މަސައްކަތްތަކުގެ ފޮނި ނަތީޖާ، ދިވެހި މުޖުތަމަޢުން މިއަދު ފެންނަމުންދާކަމީ ދެބަސްވެވެން ނެތް ހަޤީޤަތެކެވެ.
"މިއީ ރައްޔިތުންގެ ޞިއްޙީ ކަންބޮޑުވުންތައް ބޮޑު ލުޔެއް ލިބިގެންދާނެ 5 އަހަރު. އެކަން އަޅުގަނޑަށް ކަށަވަރުވާ ސަބަބަކީ ސިޔާސަތުތައް ވަރަށް ރަނގަޅަށް ތަރުތީބުކޮށް ލިޔެވިފައި ހުރީތީވެ. މިކަަމަށް ބޭނުންވާ ބަޖެޓު ސަރުކާރުން ހަމަޖައްސަވައިދެއްވަމުން ގެންދަވާތީ. މިކަމަށް ބޭނުންވާ ނިޒާމުތައް ހަމަޖައްސަވައިދެއްވަމުން ގެންދަވާތީ. ގާތުން ރައީސުލްޖުމްހޫރިއްޔާ ބައްލަވަމުން ގެންދަވާތީ. ވަރަށް ގާތުން އަޅުގަނޑުމެންނަށް އިންސްޓްރަކްޝަން ގެންދަވަމުން ގެންދަވާތީ. އެެެހެންވެ އަޅުގަނޑަށް ކަށަވަރު ވެގެންދަނީ މި ސިޔާސަތުތައް ތަންފީޒުވެގެންދާނެކަން." ދ. އަތޮޅު ހޮސްޕިޓަލުގައި ޑަޔަލިސިސްގެ ޚިދުމަތް ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޞިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވިއެވެ.
މާލެ ސަރަޙައްދުގެ އިތުރުން، އަތޮޅުތަކުގެ ޞިއްޙީ ޚިދުމަތްތައް ފުޅާކުރުމަކީ މި ސަރުކާރުގެ ޚާއްޞަ ސިޔާސަތެކެވެ. ހަމައެކަނި މާލެއަށް ބަރޯސާވެފައި އޮތް އޮތުން ނިމުމަކަށް ގެނައުމަށްޓަކައި، ރާއްޖޭގެ އެކި ސަރަޙައްދުތަކުގައި ޓަރޝަރީ ފެންވަރުގެ ހޮސްޕިޓަލްތައް ތަރައްޤީކޮށް، ޒަމާނީ ވަސީލަތްތައް ޤާއިމުކުރުމުގެ މަސައްކަތް ބާރުދުވެލީގައި ދަނީ ކުރިއަށެވެ. މީގެ ކުރިން ރަށްރަށުގެ ރައްޔިތުންގެ ހުވަފެނަކަށްވީ އެތައް ޚިދުމަތްތަކެއް މިއަދު އެ ރައްޔިތުންނަށް މިވަނީ ލިބެންފަށާފައެވެ. މީގެ ސަބަބުން، އަތޮޅުތަކުގެ ރައްޔިތުން ކުދިކުދި ކަންކަމުގައި މާލެއަށް ކުރަންޖެހޭ ދަތުރުތައް މަދުވެ، އަމިއްލަ ރަށާ ގާތުން ފެންވަރު ރަނގަޅު ޞިއްޙީ ފަރުވާ ލިބުމުގެ މަގު މިވަނީ ތަނަވަސްވާން ފަށާފައެވެ.
"ޞިއްޙީ ދާއިރާއަކީ ކުއްލިއަކަށް ކަންކަން ދިމާވާ ދާއިރާއެއް. މީހުންގެ ފުރާނައާ ގުޅިފައިވާ ކަންކަން މި ހުރީ. އެފަދަ ހާލަތްތަކުގައި އެންމެ އެކަށީގެންވާ ގޮތުގައި ޚިދުމަތް ފޯރުކޮށްދެވޭނެ ޖާގަ ނެތުމަކީ ރައްޔިތުން ވަރަށް ކަންބޮޑުވާ ކަމެއް. އެހެންނަމަވެސް މި ކަންކަމަށް ނިމުމެއް މި އަންނަނީ ކުދި ކުދި ރަށްރަށަކީވެސް ރަށްތަކެއް ކަމުގައި ބަލައިގަނެ އަދުގެ ރައީސް މި ގައުމުގެ ޒައާންމަތާ ހަވާލުވެ ޚިދުމަތްތައް ފުޅާކުރުމަށް ކުރާ މަސައްކަތްތަކުން މި ޚިދުމަތްތައް އަޅުގަނޑުމެންނަށް މި ލިބެންފެށީ. މިއީ މިއަދު ހަމައެކަނި އަޅުގަނޑު ދައްކާ ތޯތޯ ވާހަަކައެއް ނޫން. މިއީ މިއަދުގެ ހަގީގަތް." ދ. ރިނބުދޫ ޞިއްޙީ މަރުކަޒަށް އަލަށް އިތުރުކުރެވޭ އިމާރާތުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަދައްކަވަމުން ރިނބުދޫ ކައުންސިލްގެ ރައީސް އަޙުމަދު އިޤްބާލް އަބްދުލް ގައްޔޫމް ވިދާޅުވިއެވެ.
ރައީސް ޑރ. މުޢިއްޒުގެ ސަރުކާރުން ގެންގުޅުއްވާ ހަރުދަނާ ސިޔާސަތުތަކުގެ ސަބަބުން، ޖަޒީރާ ރަށްތަކެއްގެ މައްޗަށް އެކުލެވިގެންވާ މި ކުޑަކުޑަ ޤައުމުގެ ޞިއްޙީ ނިޒާމަށް ރައްޔިތުން ކުރާ އިތުބާރު ކުރިއަށްވުރެ އެތައް ގުނައެއް މިވަނީ ބޮޑުވެފައެވެ. ބޭސްފަރުވާއަށް ސަލާންޖެހުން ހުއްޓުވުމަށާއި، ކޮންމެ ރައްޔިތަކަށްވެސް ހަމަހަމަކަމާއެކު ޚިދުމަތް ލިބޭނެކަމުގެ ޔަޤީންކަން މިއަދު އޮތީ އާލާވެފައެވެ. ޚާއްޞަކޮށް، އެއަރ އެމްބިއުލާންސްގެ ޚިދުމަތް ފަދަ އިންގިލާބީ ބަދަލުތަކުން ދޭހަކޮށްދެނީ، ރައްޔިތުންގެ ފުރާނަ ސަލާމަތްކުރުމަށް މި ސަރުކާރުން ދޭ އަހައްމިއްޔަތުކަމެވެ.
ރައްޔިތުންގެ ލާބަޔާއި މަންފާއަށްޓަކައި ފަށާފައިވާ މަސައްކަތްތައް މެދުނުކެނޑި ކުރިއަށްދާނެކަމުގެ ފުރިހަމަ ޔަޤީންކަން މިހާރު ރައްޔިތުންނަށް މިވަނީ ލިބިގެންގޮސްފައެވެ. ޞިއްޙީ ދާއިރާގެ ޢުމްރާނީ ވަސީލަތްތައް ޤާއިމުކުރުމަށް އެކި މަރުހަލާތަކުގައި 5 ބިލިޔަން ރުފިޔާގެ މަސައްކަތް މިވަގުތުވެސް ކުރިއަށްދާކަން މިއަދު ރައްޔިތުންނަށް އިހުސާސްކުރެވެން މިވަނީ ފަށާފައެވެ.
"މިއަދު މި ފެނިގެންދަނީ އަޅުގަނޑުމެންގެ ލޮބުވެތި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަޅުގަނޑުމެން ރައްޔިތުންގެ ޞިއްޙީ ދުޅަހެޔޮކަން ކަށަވަރުކޮށްދެއްވުމަށްޓަކައި އެމަނިކުފާނު ކުރަމުންގެންދަވާ މަސައްކަތުގެ ނަތީޖާ." ދ. އަތޮޅު ހޮސްޕިޓަލުގައި ޑައިލިސިސްގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން އެ ހޮސްޕިޓަލުގެ މެނޭޖަރު ވިދާޅުވިއެވެ.
ކޮންމެއަކަސް، ރައީސް ޑރ. މުޢިއްޒުގެ ޒަޢާމަތުގައި ޞިއްޙީ ދާއިރާއަށް މި އަންނަނީ ރަންޒަމާނެކެވެ. މިއީ ހަމައެކަނި ޢިމާރާތްތަކެއް އެޅުމެއް ނޫނެވެ. މިއީ ދިވެހި ކޮންމެ ރައްޔިތަކަށް، އަދި ދިވެހި ކޮންމެ އާއިލާއަކަށް އުފާވެރި، ދުޅަހެޔޮ އަދި ބާއްޖަވެރި މުސްތަޤްބަލެއް ކަށަވަރުކޮށްދިނުމަށް ކުރެވޭ މާތް މަސައްކަތެކެވެ.