ދެކުނުގެ 4 އަތޮޅު ވައިގެ ދަތުރުން ގުޅާލައިފި
-
މި ދަތުރުތައް ފެށުމަށް ހަމަޖެހިފައިވަނީ ފެބްރުއަރީ 1ގައި
-
މި ދަތުރުތަކަށް ބުކިން ހެދުމަށް މިހާރު ވަނީ ހުޅުވާލާފައި
ރާއްޖޭގެ ދެކުނުގެ 4 އަތޮޅު ވައިގެ ދަތުރު ފަތުރުގެ ނިޒާމަކުން ޤައުމީ އެއާލައިން، މޯލްޑިވިއަންއިން ގުޅާލައިފިއެވެ.
މި ދަތުރުތައް ފެށުމަށް ހަމަޖެހިފައިވަނީ 1 ފެބްރުއަރީން ފެށިގެންނެވެ.
ރާއްޖޭގެ އެންމެ ދެކުނުން އައްޑޫ އަތޮޅާއި، ފުވައްމުލަކާއި، ގއ.އަތޮޅު އަދި ގދ. އަތޮޅު މޯލްޑިވިއަނުން މިވަނީ ވައިގެ މަގުން ގުޅާލާފައެވެ. މިކަމަށްޓަކައި ގަން އިންޓަރނޭޝަނަލް އެއަރޕޯޓުގައި ވަނީ ޚާއްޞަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ، ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީންއެވެ. މީގެ އިތުރުން މި ރަސްމިއްޔާތުގައި ކެބިނެޓުގެ ގިނަ ވަޒީރުންނާއި މޯލްޑިވިއަންގެ އިސްބޭފުޅުން ބައިވެރިވެ ވަޑައިގެންނެވިއެވެ.
މި ރަސްމިއްޔާތުގައި ވާހަކަދައްކަވަމުން އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާޙީމް އިޔާސް ވިދާޅުވީ، މި އޮޕަރޭޝަންގެ ބޭސްއަކަށް ހަދާފައިވަނީ ގަން އިންޓަރނޭޝަނަލް އެއާޕޯޓް ކަމަށެވެ. އަދި މިއީ އައިލެންޑު އޭވިއޭޝަންގެ ތާރީޚުގައި ވެލާނާ އިންޓަރނޭޝަނަލް އެއާޕޯޓު ފިޔަވައި އިތުރު އޮޕަރޭޝަން ބޭސްއެއްގެ ގޮތުގައި ކަނޑައެޅި ފުރަތަމަ އެއާޕޯޓް ކަމަށްވެސް ވިދާޅުވިއެވެ. މީގެއިތުރުން އިޔާސް ވަނީ، ފުރޮޅުލީ ޓްވިން އޮޓަރ މަތިންދާ ބޯޓުގައި ޝެޑިއުލް ކޮމާރޝަލް ފްލައިޓުގެ ޚިދުމަތް ފަށާ ފުރަތަމަ އެއާލައިނަކީ މޯލްޑިވިއަންކަންވެސް ފާހަގަކުރައްވާފައެވެ.
އިޔާސް ވިދާޅުވީ، އައްޑޫއަކީ ފަތުރުވެރިކަމުގައިވެސް ފާހަގަކޮށްލެވޭ ސަރަޙައްދަކަށްވާތީ ވައިގެ މަގުން 4 އަތޮޅު ގުޅާލުމަކީ، މި ސަރަޙައްދުގައި ފަތުރުވެރިކަން އިތުރަށް ކުރިއަރައިގެންދާނެ ކަމެއް ކަމަށެވެ. އަދި މި މަސައްކަތާއެކު މި ސަރަޙައްދުގެ ރަށްތަކަށް ދަތުރު ކުރުމުގައި ދިމާވާ ދަތިތައް ޙައްލުވެގެންދާނެ ކަމަށްވެސް އިޔާސް ވިދާޅުވިއެވެ.
" މޯލްޑިވިއަންއިން މިހާރުވެސް ހަފްތާއަކު 2 ދުވަހު ގަން މާލެއަށް ދަތުރުކުރޭ. މި އިފްތިތާޙުކުރެވޭ ޚިދުމަތާއެކު ދެކުނުގެ ހުރިހާ އަތޮޅުތަކެއް ގުޅާލެވިގެންދާނެ. މި ސަރަޙައްދުގެ ރައްޔިތުންގެ ގުޅުން ބަދަހިވެ، އިޖުތިމާޢީ ގޮތުން ކުރިއެރުން އަންނާނެ. މި ސަރަޙައްދަކީ ފަތުރުވެރިކަމުގައިވެސް ފާހަގަކޮށްލެވޭ ސަރަޙައްދަކަށް ވުމާއެކު މި ދަތުރުތަކާއެކު މި ސަރަޙައްދަށް ފަތުރުވެރިކަން އިތުރަށް ކުރިއަރާނެ" އިޔާސް ވިދާޅުވިއެވެ.
މި ހަތަރު އަތޮޅުގެ 4 އެއާޕޯޓު ވައިގެ މަގުން އެއް އެއާޕޯޓު އަނެއް އެއާޕޯޓާއި ގުޅުވާލައި ދަތުރުތައް މިހާރު ފަށާފައިވާއިރު، މި ދަތުރުތަކަށް ބުކިން ހެދުމަށް މިހާރު ވަނީ ހުޅުވާލާފައެވެ. މޯލްޑިވިއަނުން ވަނީ، މި ދަތުރުތަކުގެ އަގުތައްވެސް ހާމަކޮށްފައެވެ.
މޯލްޑިވިއަނުން މި ދަތުރުތައް ކުރަން ހަމަޖެހިފައިވަނީ، 5 ސެކްޓަރ ނުވަތަ ރޫޓަށް ބަހާލައިގެންނެވެ. އެއީ، އައްޑޫ ގަމުން ހުވަދު އަތޮޅުގެ ކާޑެއްދޫ އަދި ކޫއްޑޫ އެއާޕޯޓުގެ އިތުރުން ފުވައްމުލަކަށް ދަތުރު ކުރާ ގޮތަށާއި ފުވައްމުލަކުން ކާޑެއްދޫ އަދި ކޫއްޑޫއަށް ދެވޭ ގޮތަށެވެ. ދަތުރުތަކަށް އަގުތައް ކަނޑައަޅާފައިވަނީ 500ރ އިން ފެށިގެންނެވެ.
މޯލްޑިވިއަންގެ ދެކުނުގެ ދަތުރުތަކާއި އަގުތައް
• ގަން - ފުވައްމުލައް - 500ރ
• ފުވައްމުލައް - ކޫއްޑޫ - 650ރ
• ފުވައްމުލައް - ކާޑެއްދޫ - 650ރ
• ގަން - ކާޑެއްދޫ - 900ރ
• ގަން - ކޫއްޑޫ - 900ރ
މި ދަތުރުތައް ކުރުމަށް ހަމަޖެހިފައިވަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓަރ މަރުކާގެ ބޯޓުތަކުގައެވެ. މިއީ، 15 މީހުންގެ ޖާގައިގެ ކުދި ބޯޓުތަކެކެވެ.
މިއީ، ދެކުނުގެ އަތޮޅުތައް ގުޅުވާލުމަށް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ސަރަޙައްދީ ދަތުރުފަތުރު ހަރުދަނާ ކުރުމަށް ގެންގުޅޭ ސިޔާސަތާއި އެއްގޮތްވާ ގޮތުގެ މަތިން ފެށި މަސައްކަތެކެވެ. މިދަތުރުތަކާއެކު މި ސަރަޙައްދުގެ ވައިގެ އުދުހުންތަކުގެ ހަބަކަށް އައްޑޫ ގަން ވެގެންދާނެ ކަމަށް މޯލްޑިވިއަނުން ވިދާޅުވިއެވެ.
މޯލްޑިވިއަނުން ވިދާޅުވީ، މި ދަތުރުތަކާއެކު މި ސަރަޙައްދުގެ ރަށްތަކުގައި ދިރިއުޅޭ ރައްޔިތުންނަށް ލުއިފަސޭހައެއް ލިބިގެންދާނެ ކަމަށެވެ. އަދި އަމިއްލަ ދަތުރުތަކާއި، ތަޢުލީމާއި އެނޫންވެސް ޒަރޫރީ ބޭނުންތަކަށް މި އަތޮޅުތަކުގެ މެދުގައި ކުރާ ދަތުރުތަކަށް ފަސޭހަވާނެ ކަމަށެވެ. މީގެ އިތުރުން ބޭސްފަރުވާއަށް ދަތުރުކުރާ ފަރާތްތަކަށް އައްޑޫ ގަން މެދުވެރިކޮށް ދަތުރު ކުރުމަށް މީގެ ސަބަބުން މަގުފަހިވެގެންދާނެ ކަމަށް މޯލްޑިވިއަނުން ވިދާޅުވިއެވެ.
މިދަތުރުތައް ފެށުމުން މި ސަރަޙައްދުގެ ރައްޔިތުންގެ އިތުރުން ފަތުރުވެރިކަމުގެ ސިނާޢަތަށްވެސް ކުރިއެރުން ލިބޭނެއެވެ. އެގޮތުން ގަމަށް އަންނަ ފަތުރުވެރިން މި ސަރަޙައްދުގެ އެހެން ރަށްތަކަށް ދަތުރު ކުރުމަށް އެއް ވިއުގާއެއްގެ ތެރެއިން މަގުފަހި ވެގެންދާނެއެވެ. މީގެ ސަބަބުން މި ސަރަޙައްދުގެ ރިސޯޓުތަކާއި، ގެސްޓް ހައުސްތަކާއި އަދި ފަތުރުވެރިކަމާއި ގުޅުންހުރި އެހެން ޚިދުމަތްތައް ފޯރުކޮށްދޭ ފަރާތްތަކަށް ފައިދާވާނެ ކަމަށްވެސް މޯލްޑިވިއަނުން ވިދާޅުވިއެވެ.
މޯލްޑިވިއަނުން ދެކުނުގެ ސަރަހައްދުގައި ކުދި ބޯޓުތައް ބޭނުންކޮށްގެން ދަތުރުތައް ފަށާފައިވާއިރު، ސީޕްލޭން ދަތުރުތައް ރޭގަނޑު ނުކުރެވޭ ރަށްތަކަށް ކުޑަ އެއަރސްޓްރިޕެއް މެދުވެރިކޮށް، މި ބޯޓުތަކުގައި ރޭގަނޑު ރައްކާތެރިކަމާއެކު ދަތުރުކުރެވޭނެ ކަމަށް ރައީސުލްޖުމްހޫރިއްޔާ ވަނީ މީގެ ކުރިން ވިދާޅުވެފައެވެ.