އެމެރިކާއާއި އީރާނާ ދެމެދު އެއްބަސްވުމެއް އެކުލަވައިލުމާ ގުޅޭ ގޮތުން މަޝްވަރާތައް ފެށުމަށް ވިސްނަވަމުން ގެންދަވާ ކަން އެމެރިކާގެ ރައީސް ޑޮނަލްޑް ޓްރަމްޕް ހާމަކުރައްވައިފިއެވެ. އޭނާ މިމޭރުމުން ވިދާޅުވެފައި މި ވަނީ، އަސްކަރީ އިތުރު މަނަވަރެއް އީރާން ކައިރިއަށް ފޮނުވުމުގެ މަސައްކަތް އެމެރިކާއިން ފަށާފައިވާ ދަނޑިވަޅެއްގައެވެ. އީރާނަށް ޙަމަލާއެއް ދޭން ޖެހިދާނެ ކަމުގެ އިންޒާރު ޓްރަމްޕް ކުރިން ދެއްވާފައިވާއިރު، އޭނާގެ އަމުރަށް އެމެރިކާގެ އަސްކަރީ މަތިންދާބޯޓު އުފުލާ މަނަވަރު، ޔޫއެސްއެސް އެބްރަހަމް ލިންކަނާއި، އިތުރު މަނަވަރުތައް ހިމެނޭ ލަޝްކަރެއް ވަނީ އީރާން ކައިރިއަށް ފޮނުވާފައެވެ.
އީރާނަށް ޙަމަލާ ދޭން ޖެހިދާނެ ކަމުގައި ވިދާޅުވެ ޓްރަމްޕް އިންޒާރު ދެއްވާފައި ވަނީ، އީރާންގެ ނިއުކްލިޔަރ ހަކަތަ އުފެއްދުމުގެ ޕުރޮގުރާމުގެ ކުރިމަގާ ގުޅޭ ގޮތުން އެމެރިކާއާ އެކު އެއްބަސްވުމެއް އެކުލަވައިލުމަށް އީރާނަށް ބާރު އަޅައި، މަޖުބޫރު ކުރުވުމުގެ ގޮތުންނެވެ. ނަމަވެސް، އީރާނުން ވަނީ ޓްރަމްޕްގެ ބަހުގެ ޙަމަލާތަކަށް ރައްދު ދީފައެވެ. އެ ޤައުމުގެ ޚާރިޖީ ވަޒީރު ޢައްބާސް ޢަރާޤިޖީ ވިދާޅުވީ، އެމެރިކާއިން އީރާނަށް ޙަމަލާ ދީފި ނަމަ، ރައްދުގައި ޙަމަލާ ދިނުމަށް އީރާންގެ ހިތްވަރުގަދަ އަސްކަރިއްޔާގެ ލަޝްކަރުތަކުން ތައްޔާރީ ހާލަތުގައި އޮތް ކަމުގައެވެ.
ނަމަވެސް، ޖަނަވަރީ 29ވަނަ ދުވަހު ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވީ، އީރާނާ އެކު މަޝްވަަރާތައް ފެށުމަށް އޭނާ ވިސްނަވަމުން ގެންދަވާ ކަމަށާއި، އެ ކަމަށް ތައްޔާރުވަމުންދާ ކަމުގައެވެ. އެ މަޝްވަރާތައް ފަށާނެ ތާރީޚާއި ވަގުތުގެ އިތުރުން މަޝްވަރާތަކުގައި ވޮޝިންގްޓަން ތަމްސީލު ކުރާނީ ކޮން ފަރާތަކުން ކަން ޓްރަމްޕް ހާމަކުރައްވާފައެއް ނުވެއެވެ. ނަމަވެސް، އެމެރިކާގެ ދިފާޢީ ވަޒީރު ޕީޓް ހެގްސެތު ވިދާޅުވީ، ޓްރަމްޕް ނިންމަވާ ގޮތަކަށް އަމަލު ކުރުމަށް އެ ޤައުމުގެ އަސްކަރިއްޔާއިން ތައްޔާރީ ހާލަތަކަށް ގެނެސްފައިވާ ކަމުގައެވެ.
"އާދެ، އަޅުގަނޑު މި ދަނީ އެ ކަމަށް [މަޝްވަރާތައް ފެށުމަށް] ތައްޔާރުވަމުން،" ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވިއެވެ. "ވަރަށް ބޮޑެތި، އަދި ބާރުގަދަ މަނަވަރުތަކެއް އެ ދަނީ އީރާން ކައިރިއަށް ދަތުރު ކުރަމުން، އަދި އެންމެ އެކަށޭނަ ގޮތަކަށް ވާނީ އެ މަނަވަރުތަކުގެ ބޭނުން ހިފަން ނުޖެހުން."
އެމެރިކާ ސަރުކާރުގެ އޮފިޝަލުން ބުނީ، އީރާނަށް ޙަމަލާ ދިނުމާ މެދު ޓްރަމްޕް ވިސްނަވަމުން ގެންދެވި ނަމަވެސް، އެ ފަދަ އަމަލެއް ހިންގުމަށް އޭނާ ނިންމަވާފައި ނުވާ ކަމުގައެވެ. އީރާނަށް ޙަމަލާއެއް ދޭން ޖެހިދާނެ ކަމުގައި ޓްރަމްޕް އެންމެ ފަހުން ވިދާޅުވެފައި ވަނީ، އީރާންގެ ސަރުކާރާ ދެކޮޅަށް އަޑުއުފުލުމަށް އެ ޤައުމުގެ އެތަކެއް ހާސް ބަޔަކު މުޒާހަރާ ކުރަން ފެށުމާ ގުޅިގެންނެވެ. އަދި، އެ މުޒާހަރާތައް ހުއްޓުވުމުގެ ނަމުގައި މުޒާހަރާގެ ބައިވެރިންނަށް ޙަމަލާދީ، އޭގެ ތެރެއިން ބަޔަކު މަރަމުންދާ ކަމުގެ ޚަބަރުތައް ފެތުރެން ފެށުމާ ގުޅިގެންނެވެ. ޓްރަމްޕް ވިދާޅުވެފައި ވަނީ، މުޒާހަރާގެ ބައިވެރިން މެރުން ހުއްޓައިނުލައިފި ނަމަ، އީރާންގެ ދާޚިލީ މައްސަލައިގެ ތެރެއަށް އެމެރިކާއިން ވަންނާނެ ކަމުގައެވެ. އީރާނަށް ޓްރަމްޕް އިންޒާރު ދެއްވި ފަހުން އީރާންގެ މަސްރަޙު ވަނީ ފިނިވެފައެވެ. އަދި، މުޒާހަރާތައް ވަނީ މަޑުޖެހިފައެވެ.