ފަލަސްޠީންގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމަށް އެމެރިކާއިން އުފައްދާފައިވާ ސެންޓަރުގެ އިސް ސަފަށް ބަދަލުތަކެއް ގެނެސްފިއެވެ.
މިދިޔަ އޮކްޓޯބަރު މަހު، ޔަހޫދީންނާއި ޙަމާސް ޖަމާޢަތާ ދެމެދު ޙަމަލާތައް ހުއްޓައިލުމުގެ އެއްބަސްވުމުގައި ސޮއިކުރުމާއެކު، އެމެރިކާއިން ސިވިލް މިލިޓަރީ ކޮމާންޑް ސެންޓަރ (ސީއެމްސީސީ)ގެ ނަމުގައި މަދަނީ އަދި އަސްކަރީ އިސްވެރިންތަކެއް ހިމަނައިގެން ސެންޓަރެއް އުފެއްދީ، އެ އެއްބަސްވުމަށް ދެ ފަރާތުން ވެސް އިޙްތިރާމް ކުރޭތޯ ފާރަވެރިވެ، ސުލްޙަ ދަމަހައްޓަން ބާރު އެޅުމުގެ ބޭނުމުގައެވެ.
އެ ސެންޓަރަކީ، އެމެރިކާގެ ރައީސް ޑޮނަލްޑް ޓްރަމްޕް ޣައްޒާގައި ސުލްޙަ ޤާއިމުކޮށް، އަލުން ބިނާކުރުމަށް ހުށަހަޅުއްވާފައިވާ ސުލްޙައިގެ ޕްލޭންގެ ފުރަތަމަ ފިޔަވަހީގައި ހިމެނޭ ކަމެކެވެ. ބައެއް މަސްދަރުތަކާ ޙަވާލާދީ ރޮއިޓަރސް ނޫހުން ބުނި ގޮތުގައި، އެ ސެންޓަރުގެ އަސްކަރީ އެންމެ އިސް ވެރިއެއްގެ ގޮތުގައި ހުންނެވި ޖެނެރަލް ވަނީ މިހާރު ބަދަލުކޮށްފައެވެ. އަދި މަދަނީ އެންމެ އިސްވެރިޔާގެ ގޮތުގައި ހުންނެވި ޚާރިޖީ ދާއިރާގެ ބޭފުޅާވެސް މިހާރު ވަނީ، ޔަމަނުގައި ހުންނަވާ އެމެރިކާގެ ސަފީރުކަމަށް ވަނީ ޢައްޔަނުކޮށްފައެވެ.
މި ސެންޓަރުގެ އިސް ސަފަށް ބަދަލުތަކެއް ގެނެސްފައިމިވަނީ، މުސްތަޤުބަލުގައި، މި ސެންޓަރުން ޣައްޒާގައި އަދާކުރާނެ ދަޢުރާ މެދު ހުޅަނގުގެ އެހެން ޤައުމުތަކުން ސުވާލު އުފައްދަމުންދާ ދަނޑިވަޅެއްގައެވެ.
ޓްރަމްޕްގެ ސުލްޙައިގެ ޕްލޭންގެ ދަށުން، ޣައްޒާ ހިންގުމުގެ ހުރިހާ ކަމަކާ ޙަވާލުވާނީ އެކި ޤައުމުތަކުގެ މަންދޫބުންގެ މައްޗަށް އެކުލެވޭ "ބޯޑް އޮފް ޕީސް"އިންނެވެ. ޓްރަމްޕް އިސްވެ ހުންނަވާ އެ ބޯޑުގައި ބައިވެރިވުމަށް ގިނަ ޤައުމުތަކަށް މިހާރު ވަނީ ދަޢުވަތުވެސް ފޮނުއްވައިފައެވެ. އަދި ބައެއް ޤައުމުތަކުން އެ ދަޢުވަތު ޤަބޫލުކޮށް، އެ ބޯޑުގައި ބައިވެރިވުމުގެ ޝަޢުޤުވެރިކަން ވަނީ ފާޅުކޮށްފައެވެ. މި ބޯޑު، ޣައްޒާ ހިންގުމާ ޙަވާލުވުމުން، ސީއެމްސީސީން ދެން އަދާކުރާނެ ދަޢުރާ މެދު ދަނީ ސުވާލު އުފައްދަމުންނެވެ.