އަދާލަތު ޕާޓީގެ ރައީސަކަށް ޝައިޚް ޝިފާން

ރާއްޖޭގައި މިވަގުތު އޮތް ދެވަނައަށް އެންމެ ގިނަ ދުވަސްވީ ސިޔާސީ ޕާޓީ ކަމަށްވާ، އަދާލަތު ޕާޓީގެ ރައީސަކަށް ޝައިޚް މުޙައްމަދު ޝިފާން އިންތިޚާބުވެއްޖެއެވެ.

އަދާލަތު ޕާޓީގެ 4ވަނަ ދައުރުގެ ރައީސާއި ނައިބު ރައީސް ހޮވުމަށް އިންތިޚާބު ބާއްވާފައިވަނީ މިއަދު އޮންލައިންކޮށެވެ. އެގޮތުން، މި އިންތިޚާބު ބޭއްވުމަށް "ފަހިވިހި"ގެ ނަމުގައި ޚާއްސަ ޕޯޓަލެއް އެ ޕާޓީން ހުޅުވާލިއެވެ.

އިންތިޚާބުގެ ވޯޓުލުން ނިމުނުއިރު %99 މީހުން ވޯޓު ދީފައިވަނީ ޝައިޚް ޝިފާން އެ ޕާޓީގެ ރައީސަކަށް އިންތިޚާބު ކުރުމަށެވެ. ޝިފާނާ ވާދަކުރެއްވި އަލްއުސްތާޛް އިކްރާމް އަބްދުއްސައްތާރަށް ލިބިވަޑައިގެންނެވީ ވޯޓު ލީ މީހުންގެ %1 ވޯޓެވެ.

އަދާލަތު ޕާޓީގެ ރައީސް ކަމަށް ޝައިޚް ޝިފާން އިންތިޚާބުވެވަޑައިގެންފައިވާއިރު ނައިބު ރައީސަކަށް އިންތިޚާބުވެފައިވަނީ ޝައިޚް ޢަބްދުﷲ ރަޝީދުއެވެ.

ޝައިޚް ޝިފާން އާއި ޝައިޚް ޢަބްދުﷲ ރަޝީދު ހޯއްދެވި ކާމިޔާބީއަށް އަދާލަތު ޕާޓީގެ 3ވަނަ ދައުރުގެ ރައީސްކަން ކުރެއްވި ޝައިޚް އިމްރާން ޢަބްދުﷲ ވަނީ މަރުޙަބާ ވިދާޅުވެފައެވެ. އަދި ޢަދާލަތު ޕާޓީގެ ދުސްތޫރާ އެއްގޮތަށް ކޮންގްރެސް ބާއްވާ ދައުރު ބަދަލުކުރުމުގެ އެންމެހައި އިންތިޒާމުތައް ހަމަޖެއްސުމުގައި ފުރިހަމަ އެއްބާރުލުން ދެއްވާނެ ކަމަށްވެސް ވިދާޅުވިއެވެ.

އިލެކްޝަންސް ކޮމިޝަންގެ ސިޔާސީ ޕާޓީތަކުގެ ދަފްތަރުން ދައްކާގޮތުގައި އެ ޕާޓީގައި 8،267 މެންބަރުން ވަނީ ރަޖިސްޓްރީކޮށްފައެވެ.