"2.4 ބިލިޔަން ރުފިޔާގެ ބޮންޑު އިންވެސްޓްކުރާނީ އެއްވެސް ގެއްލުމެއް ނުވާނެހެން"

ސަރުކާރުން ހުށައަޅާފައިވާ 2.4 ބިލިޔަން ރުފިޔާގެ ބޮންޑު އިންވެސްޓްކުރުމަށް ނިންމާފައިވަނީ އެއްވެސް ގެއްލުން ނުވާނެ ގޮތަށްކަމަށް ޕެންޝަން އޮފީހުން ވިދާޅުވެއްޖެއެވެ.

ޕެންޝަން އޮފީހުން ނެރެފައިވާ ނޫސް ބަޔާނެއްގައި ވިދާޅުވީ މިއިންވެސްޓްމަންޓާއި ގުޅިގެން ބޭރު ފައިސާ ގަންނަން ނުޖެހި، އިންވެސްޓަމަންޓްގެ ތެރެއިން ޕެންޝަން ފަންޑުގައި ބޭރު ފައިސާގެ ރިޒާވެއް އުފެދިގެންދާނެއެވެ.

މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ފަރާތުން ޕެންޝަން އޮފީހަށް ހުށައަޅާފައިވާ 2.4 ބިލިޔަން ރުފިޔާގެ ޓްރެޜަރީ ބޮންޑް އިންވެސްޓްމަންޓާއި ގުޅޭގޮތުން ނެރުނު ނޫސްބަޔާނުގައި ޕެންޝަން އޮފީހުން ވިދާޅުވީ، ދިވެހި ރުފިޔާއިން އަދި ބޭރު ފައިސާއިން ބޮންޑުގެ ރިޓަރން ލިބޭގޮތަށް އިންވެސްޓުކުރުމަށް ހަމަޖެހިފައިވާކަމަށެވެ. ޕެންޝަން ފަންޑުގެ ލިކުއިޑިޓީއަށް ރިޢާޔަތްކޮށް މި އިންވެސްޓްމަންޓްގެ ފައިސާ ހޯދުމަށް ހަމަޖެހިފައިވަނީ މޯލްޑިވްސް ރިޓަޔަރމަންޓް ޕެންޝަން ސްކީމުން މިހާތަނަށް އިންވެސްޓްކޮށްފައިވާ ޓްރެޜަރީ ބޮންޑުތަކުގެ ތެރެއިން 2.4 ބިލިޔަން ރުފިޔާގެ ބޮންޑު ސެކަންޑަރީ މާކެޓުގައި ވިއްކާލުމަށްފަހު ލިބޭ ފައިސާއިންކަމަށް އެއޮފީހުން ވިދާޅުވެއެވެ.

ދިވެހި ރުފިޔާ އާއި އެމެރިކާ ޑޮލަރުން ފައިދާ ލިބޭ ޓްރެޜަރީ ބޮންޑުގައި އިންވެސްޓް ކުރުމާ ގުޅޭ

ލިންކް: https://t.co/JK28d4vmmF pic.twitter.com/riqSGOSxr3

— Pension Office (@PensionOffice) February 3, 2026

އެއޮފީހުން ވިދާޅުވީ، މިގޮތަށް އިންވެސްޓްކުރުމަށް ޕެންޝަން އޮފީހުގެ ބޯޑުން ނިންމާވައިވަނީ ސެކަންޑަރީ މާކެޓުގައި ވިއްކާލަންޖެހޭ ބޮންޑުތައް ވިއްކުމުގައި ޕެންޝަން ފަންޑަށް އެއްވެސް ގެއްލުމެއް ނުވާނެ ފަދަ ގޮތަކަށް ކަމަށެވެ. އަދި މޯލްޑިވްސް ރިޓަޔަރމަންޓް ޕެންޝަން ސްކީމުގެ ދުރު ރާސްތާގެ އިންވެސްޓްމަންޓް ސްޓްރެޓެޖީ ހެދުމުގައި ލިބިފައިވާ ކޮންސަލްޓަންޓުންގެ ލަފައާއި އެއްގޮތަށް އިންވެސްޓަމަންޓުތައް ސިންދަފާތުކޮށް ފަންޑުގެ ވިލުންތެރިކަން ހަރުދަނާ ކުރުމުގެ ގޮތުން ކަމަށް އެބަޔާނުގައިވެއެވެ. އަދި އިންވެސްޓްމަންޓުތަކުގެ ފައިދާ ޑޮލަރުން ލިބޭ ބޮންޑެއްގައި އިންވެސްޓު ކުރުމާއި، އިންވެސްޓްކޮށްފައިވާ އެސެޓުތަކުގެ އެވްރެޖް ޑިއުރޭޝަން ދިގު ކުރުމާއި، ޕޯޓްފޯލިއޯ ރިޓަރން އިތުރު ކުރުމަށް ކަމަށް ޕެންޝަން އޮފީހުގެ ބަޔާނުގައިވަނީ ފާހަގަކޮށްފައެވެ.

މިއާއެކު ބާޒާރުގައި ބޭރު ފައިސާ ގަންނަން ނުޖެހި އިންވެސްޓްމަންޓެއްގެ ތެރެއިން ޕެންޝަން ފަންޑުގައި ބޭރު ފައިސާގެ ރިޒާވެއް އުފެދިގެންދާނެ ކަމަށް ވިދާޅުވިއެވެ. މީގެއިތުރުން ޕެންޝަން ފަންޑުން މިހާތަނަށް އިންވެސްޓްކޮށްފައިވާ ޓްރެޜަރީ ބިލްތަކުގެ ތެރެއިން ބައެއް ދިގުމުއްދަތުގެ ޓްރެޜަރީ ބޮންޑަށް ބަދަލު ކުރުމުގެ ފުރުސަތުވެސް މިމުޢާމަލާތުން ލިބިގެން ދިޔުމާއެކު ޕޯޓްފޯލިއޯ ރިޓަރން އިތުރު ކުރެވޭނެ ކަމަށް އެއޮފީހުން ވިދާޅުވެއެވެ.

ޕެންޝަން އޮފީހުން ވިދާޅުވީ އެއޮފީހުގެ ކަންކަން އިންތިޒާމުކުރަނީ ޕެންޝަން ފަންޑުގެ ބައިވެރިންގެ މަސްލަޙަތު އިސްކޮށް މެމްބަރުންނަށް އެންމެ ފައިދާހުރި ގޮތަކަށް ކަމަށެވެ. އަދި ސަރުކާރުން ހުށައެޅި 2.4 ބިލިޔަން ރުފިޔާގެ ޓްރެޜަރީ ބޮންޑު ވިއްކުމުގެ ކަންކަން ކުރިއަށް ގެންގޮސްފައިވަނީ، ޕެންޝަނާ ބެހޭ ޤާނޫނާއި ގަވާއިދުގެ ތެރެއިން ކަމަށްވަނީ ބަޔާންކޮށްފައެވެ.