ދިރޭ މަސް އެކްސްޕޯޓްކުރުމުގެ ހުއްދަ ދޫކުރުން ދިރޭތަކެއްޗާ ބެހޭ ވުޒާރާއަށް

މޯލްޑިވްސް ފުޑް އެންޑް ޑްރަގް އޮޓޯރިޓީން ދޫކުރަމުން ދިޔަ ދިރޭ މަސް އެކްސްޕޯޓް ކުރުމުގެ ހުއްދަ އަދި ދިރޭ މަސް ޝިޕްމެންޓަށް ދޫކުރާ އިންޓަނޭޝަންލް ވެޓެރިނަރީ ހެލްތް ސަރޓިފިކެޓް ދޫކުރަމުން ގެންދަނީ ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ކަމަށް ވިދާޅުވެއްޖެއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީގެ ދަށުން ކުރަމުންދިޔަ ދިރޭ މަސް އެކްސްޕޯޓްކުރުމުގެ އެންމެހާ ކަންތައްތައް ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ ދަށަށް ބަދަލު ކުރުމުން ރާއްޖެއިން ދިރޭ މަސް އެކްސްޕޯޓްކުރުމުގެ ހުއްދަ އަދި ދިރޭ މަސް ޝިޕްމެންޓަށް ދޫކުރާ އިންޓަނޭޝަންލް ވެޓެރިނަރީ ހެލްތް ސަރޓިފިކެޓް ދޫކުރަމުން ގެންދަނީ އެ ވުޒާރާއިންނެވެ.

ދިރޭތަކެއްޗާ ބެހޭ ވުޒާރާއިން ވިދާޅުވީ އެ ވުޒާރާގެ އޮންލައިން ޕޯޓަލް (aos.egov.mv) މެދުވެރިކޮށް އެކްސްޕޯޓް ހުއްދައަށް އެދެވޭނެ ކަމަށެވެ.

ހުއްދައަށް އެދުމުގެ ކުރިން ނުވަތަ ހުއްދައަށް އެދޭ އިރު ސަމާލުކަންދޭންވީ ކަންކަން:

* އަލަށް ހުއްދައަށް އެދޭކުންފުންޏެއް ކަމުގައި ވަނީނަމަ، އެ ކުންފުންޏަކާއި ހުއްދައަށް އެދޭ ފަރާތުގެ އީފާސް ލިންކް ކުރެއްވުމަށް، ކުންފުނީގެ ރަޖިސްޓަރީއާއި، ހުއްދައަށް އެދޭ ފަރާތުގެ އައިޑީ ކާޑު ކޮޕީ އެވުޒާރާއަށް މެއިލްކުރުން.
* އެކްސްޕޯޓް ހުއްދަ ދޫކުރެވޭނީ 2-3 ރަސްމީ ދުވަސްތެރޭގައި ކަމަށް ވުމުން، ދުރާލާ އެކްސްޕޯޓް ހުއްދައަށް އެދެން.
* ހުއްދައަށް އެދޭ އިރު އެކްސްޕޯޓްކުރެވޭނެކަމަށް ލަފާކުރެވޭނެ ބާވަތްތަކާއި އަދަދު ހިމެނުން.

ދިރޭތަކެއްޗާއި ބެހޭ ވުޒާރާއިން ވިދާޅުވީ އިންޓަނޭޝަނަލް ވެޓެރިނަރީ ހެލްތް ސަރޓިފިކެޓް ދޫކުރެވޭނީ އެވުޒާރާގެ ވެޓެރިނޭރިއަން އެއް އެއަރޕޯޓަށް ހާޒިރުވެ، ޝިޕްމެންޓް އިންސްޕެކްޓް ކުރުމަށްފަހުގައިކަމަށެވެ. އެހެންކަމުން، ޝިޕްމެންޓް ތައްޔާރުކުރުމުގެ މަދުވެގެން 6 ގަޑިއިރު ކުރިން އެވުޒާރާއަށް އަންގަންވާނެކަމަށް ވަނީ ވިދާޅުވެފައެވެ. އަދި ވެލާނާ އިންޓަނޭޝަނަލް އެއަރޕޯޓަށް ޝިޕްމެންޓް ގެންދެވޭނެ ކަމަށް ލަފާކުރެވޭ ވަޤުތު މެއިލްއަކުން އަންގަންވާނެކަމަށް ވަނީ ބުނެފައެވެ.

އެހެންކަމުން ދުރާލާ އެކްސްޕޯޓް ހުއްދަ ނެގުމާއި، ޝިޕްމެންޓް ނޮޓިފިކޭޝަން ފޮނުވުމަކީ އެވުޒާރާގެ ވަރަށް ބޮޑު އެދުމެއްކަމަށް ވަނީ ބުނެފައެވެ. ނަމަވެސް، ދުރާލާ އެކްސްޕޯޓް ހުއްދަ ނުހޯދާ ނުވަތަ ޝިޕްމެންޓް ނޮޓިފިކޭޝަން ނުފޮނުވާ ޝިޕްމެންޓްތަކަށް އިންޓަނޭޝަނަލް ވެޓެރިނަރީ ހެލްތް ސަރޓިފިކެޓް ދޫކުރުމުގައި ދަތިތަކެއް ކުރިމަތިވާނެކަމާއި މިފަދަ ހާލަތުގައި ބަލާފާސްކުރުން ލަސްވުމުގެ ސަބަބުން އެކްސްޕޯޓްކުރާ ޝިޕްމެންޓްތަކަށް ލިބޭ ގެއްލުމުގެ ޒިންމާ އެވުޒާރާއިން ނުނަގާނެ ކަމަށްވެސް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ވަނީ ބުނެފައެވެ.