ލުބްނާންގެ ވެރިރަށް ބެއިރޫތަށް ޔަހޫދީންގެ ނިރުބަވެރި ވައިގެ ސިފައިން ޙަމަލާދީ، 31 މީހުން ޝަހީދުކޮށްލައިފިއެވެ.
ޔަހޫދީން ލުބްނާނަށް އަނެއްކާވެސް ބޮން އަޅަން ފަށާފައިމިވަނީ، ލުބްނާންގައި ޙަރަކާތްތެރިވާ މުޖާހިދުންގެ ޖަމާޢަތް، ޙިޒްބުﷲއިން ޔަހޫދީ އިސްރާއީލުގެ އުތުރުގައި ހުރި އަސްކަރީ މަރުކަޒަށް ޑްރޯނާއި މިސައިލް ޙަމަލާދީފައިވަނިކޮށެވެ.
ޙިޒްބުﷲއިން ޔަހޫދީން ޙަމަލާދިނީ، އެމެރިކާ އާ ގުޅިގެން ޔަހޫދީން އީރާނަށް ޙަމަލާދީ، އެ ޤައުމުގެ ރޫޙީ ވެރިޔާ އާޔަތުالله ޚާމަނާއީ ޝަހީދުކޮށްލުމުގެ ބަދަލުހިފުމުގެ ގޮތުންނެވެ.
ޚާމަނާއީ އަކީ މުސްލިމު އުއްމަތުގެ އިސް ވެރިއެއްގެ ގޮތުގައި ސިފަކޮށް، ޚާމަނާއީ ޝަހީދުކޮށްލުމުގެ ބަދަލު ވަރުގަދައަށް ހިފާނެކަމުގެ އިންޒާރު ޙިޒްބުﷲއިން ވަނީ އެމެރިކާ އާއި ޔަހޫދީންނަށް ދީފައެވެ.
ފެބްރުއަރީ 28ގައި އީރާނަށް ޙަމަލާދޭން ފެށުމާ ގުޅިގެން، ޙިޒްބުﷲއިން ނެރުނު ބަޔާނެއްގައި ވަނީ، ޔަހޫދީންގެ ނިރުބަވެރި ދަޢުލަތުގެ ޖަރީމާތަކާ ދެކޮޅަށް ތެދުވާނެކަމަށް ބުނެފައެވެ. އަދި ލުބްނާންގެ ސަރަޙައްދުތަކަށް ޔަހޫދީން އަތްގަދަކޮށްގެން ތިބޭއިރު، އަމިއްލައަށް ދިފާޢުވުމުގެ ޙައްޤު އޮންނާނެކަމަށް ވެސް ޙިޒްބުﷲއިން ބުނެފައިވެއެވެ.
ޔަހޫދީން ބެއިރޫތަށް ދިން ޙަމަލާތަކުގައި މިހާތަނަށް 31 މީހުން ޝަހީދުވެ، 140އަށް ވުރެ ގިނަ މީހުން ޒަޚަމްވެފައިވާކަމަށް ލުބްނާންގެ ދަޢުލަތުގެ މީޑިޔާއިން ބުންޏެވެ.
ޙިޒްބުﷲއިން ދިން ޙަމަލާއާ ގުޅިގެން، ޚާމަނާއީ އެކޭ އެއްގޮތަށް ޙިޒްބުﷲގެ އިސް ވެރިޔާ ނަޢީމް ޤާޞިމް ވެސް ޝަހީދުކޮށްލާނެކަމުގެ އިންޒާރު ޔަހޫދީން މިހާރު ވަނީ ދީފައެވެ.
ފާއިތުވި ދެ އަހަރުގެ ތެރޭގައި ޔަހޫދީން ޙިޒްބުاللهއަށް އަމާޒުކޮށް ދީފައިވާ ޙަމަލާތަކުގައި އެ ޖަމާޢަތުގެ ގިނަ ޢަދަދެއްގެ އިސްވެރިން ޝަހީދުކޮށްލާފައިވެއެވެ. އޭގެ ތެރޭގައި އެ ޖަމާޢަތުގެ ކުރީގެ އިސްވެރިޔާ ޙަސަން ނަސްރުاللهއާއި ޙިޒްބުاللهއަށް ނިޞްބަތްވާ 5،000އެއްހާ މުޖާހިދުން ހިމެނެއެވެ. އެ ޙަމަލާތަކުގެ ސަބަބުން ޙިޒްބުاللهގެ ހަތިޔާރަށް ބޮޑެތި ގެއްލުންތައް ލިބި، ހަތިޔާރު ހުނި މިންވަރު ވަނީ ވަރަށް ބޮޑަށް މަދުވެފައެވެ.