ޔަހޫދީންނާއި އެމެރިކާއިން ގުޅިގެން އީރާނަށް ދެމުންދާ ޙަމަލާތަކުގައި އީރާނުގެ ރޫޙީ ވެރިޔާ އާޔަތުالله ޢަލީ ޚާމަނާއީ ވަނީ އަވަހާރަވެފައެވެ. އީރާނަށް އަދިިވެސް ޙަމަލާތައް އަމާޒުވަމުންދާއިރު، މި ދަނޑިވަޅިގައި އެ މަޤާމަށް ވީ އެންމެ އަވަހަކަށް ބޭފުޅަކު ޢައްޔަނު ކުރުން މި ވަނީ މުހިންމުވެފައެވެ. އެ މަޤާމަށް ދެން ޢައްޔަނު ކުރާނެ ކަމަށް ބެލެވެނީ ޢަލީ ޚާމަނާއީގެ ކުރިން އެ މަޤާމު ފުރުއްވި އާޔަތުالله ރޫޙުالله ޚުމައިނީގެ ކާފަދަރިކަލުން، ޙަސަަން ޚުމައިނީއެވެ.
އީރާނުގެ ވެރިންނަށް އަޅާކިޔާނަމަ ނިސްބަތުން މެދުމިނުގެ ބޭފުޅެއްގެ ގޮތުގައި ދެކެވޭ ޚުމައިނީއަކީ އިސްލާހީ ފިކުރަށް ތާއީދުކުރައްވާ ބޭފުޅެކެެވެ. އޭނާއަކީ ޤައުމުގެ އިސްލާހަށް މަަސައްކަތްކުރައްވާފައިވާ ރައީސުންނާ ގާތް ގުޅުމެއް ބާއްވަވާ، އަދި ހަރުކަށި ވެރިކަމާއި ވެރިކަންކުރުމުގައި ހައްދުފަހަނައަޅާ މިންވަރަށް ދީން ބޭނުންކުރުމާމެދު ފާޑުވިދާޅުވާ ބޭފުޅެކެވެ. ފާއިތުވި ޖަނަވަރީ މަހުގެ ތެރޭގައި އީރާނުގެ ރައްޔިތުން ސަރުކާރާ ދެކޮޅަށް ވަރުގަދަ މުޒާހަރާތަކެއް ކޮށްފައިވާއިރު، މެދުމިނުގެ ބޭފުޅަކު ރޫޙީ ވެރިޔާގެ މަޤާމަށް އިސް ކުރުމަކީ ޤައުމަށް އެންމެ ފައިދާ ބޮޑު ގޮތް ކަމަށް އީރާނުގެ ބައެއް ސިޔާސީ ވެރިން ޤަބޫލުކުރެއެވެ.
ޚުމައިނީއަކީ އީރާނުގެ އިސްލާމީ ޖުމްހޫރިއްޔާއަށް ވަފާތެރި ބޭފުޅެއް ނަމަވެސް އޭނާ އަބަދުވެސް އިސްލާހީ މަސައްކަތްކުރައްވާ، ކަންކަމާ ގުޅޭގޮތުން އަޑު އުފުލަން ޖެހިއްޖެ ޙާލަތުގައި އަޑު އުފުއްލަވައެވެ. 2021ވަނަ އަހަރު އިސްލާހީ މަސައްކަތްކުރާ ބައެއް ކެންޑިޑޭޓުން ރައީސްގެ މަޤާމަށް ކުރިމަތިލުމުން އެ ކެންޑިޑޭޓުންނަށް އިންތިޚާބުގައި ވާދަނުކުރެވޭނެ ކަމަށް އީރާނުގެ ގާޑިއަން ކައުންސިލުން ނިންމުމުން އެ ކައުންސިލަށް އޭނާ ފާޑުވިދާޅުވެފައިވެއެވެ. އޭގެ އިތުރުން 2022ވަނަ އަހަރު ފުލުހުންގެ ބެލުމުގެ ދަށަށް ގެންދިޔަ ޒުވާން އަންހެން ކުއްޖެއް ކަމަށްވާ މަހްސާ އަމީނީ، ފުލުހުންގެ ބެލުމުގެ ދަށުގައި ހުއްޓާ މަރުވުމުން ފުލުހުން ޖަވާބުދާރީ ކުރުވުމަށް އޭނާ މަސައްކަތްކުރައްވާފައިވެއެވެ.
އީރާނުގެ އިސްލާމީ ޖުމްހޫރިއްޔާއަށް ތާއީދުކޮށް ވެސް އޭނާ އަޑުއުފުއްލަވައެވެ. އެ ގޮތުން ޚާމަނާއީއާ ދެކޮޅަށް މުޒާހަރާ ކުރުމުން މުޒާހަރާގެ ބައިވެރިންނަށް ވެސް އޭނާ ފާޑުވިދާޅުވެފައިވެއެވެ. މިދިޔަ ޑިސެމްބަރު މަހާއި ޖަނަވަރީ މަހު އީރާނުގައި ހިނގި ހަމަނުޖެހުންތަކުގައި އޭނާ ވަނީ ސަރުކާރާއެކު ހުންނަވާ، މުޒާހަރާގެ ބައިވެރިންނަކީ ޔަހޫދީންގެ މަޤްސަދުތައް ހާސިލްކޮށްދޭ ބައެއް ކަމަށް ތުހުމަތުކުރައްވައިފައެވެ. ޚާމަނާއީ އަވަހާރަވުމާ ގުޅިގެން ފޮނުއްވި ތައުޒިޔާގެ ސިޓީއެއްގައި ޚުމައިނީ ޚާމަނާއީ ސިފަކުރައްވާފައި ވަނީ އީރާނުގެ ރައްޔިތުންނާއި އެންމެހާ މުސްލިމުންގެ ބަޠަލެއްގެ ގޮތުގައެެވެ.
މިދިޔަ އަހަރު ޔަހޫދީންނާއި އީރާނާ ދެމެދު ކުރި 12 ދުވަހުގެ ހަނގުރާމައިގެ ދުވަސްވަރު ޚުމައިނީ ވަނީ ޚާމަނާއީއަށް ސީޓީއެއް ލިޔުއްވައި އޭނާގެ އިސްނެންގެވުމަށް ތައުރީފުކުރައްވައި، އީރާނުގެ މިސައިލްތަކަކީ ޔަހޫދީންނަށް ބިރުވެރި ކަމަށް ވެފައިވާ ކަމަށް ވިދާޅުވެފައެވެ. އަދި އެ މިސައިލްތަކަކީ ޤައުމަށް އޮތް ހިތްހަމަޖެހުމެއްް ކަމަށް ވެސް އޭނާ ވިދާޅުވެފައިވެއެވެ.
ޚުމައިނީ ވަނީ ޔަހޫދީންނަކީ ހުޅަނގުގެ ތާއީދު އޮންނަ "ނުބައި ޒަޔަނިސްޓް ވެރިކަމެއް" އަދި "ކެންސަރުގެ ޓިއުމަރެއް"ގެ ގޮތުގައި ސިފަކުރައްވާފައެވެ. އޭނާ ވަނީ މުސްލިމް ދުނިޔެ ޒަޔަނިސްޓުންނަށް ކުރިމަތިލެވޭ ވަރަށް ބާރުގަދަވާން ޖެހޭ ކަމަށް ވިދާޅުވެފައެވެ.
ޚުމައިނީއަކީ ޢަރަބި ބަހާއި އިނގިރޭސި ބަހަށް ފަރިތަ ބޭފުޅެކެވެ. ކާފާފުޅުގެ އެދިވަޑައިގަތުމުގެ މަތިން އުމުރުން 21 އަހަރުގައި އޭނާ ވަނީ ދީން ކިޔެވުމަށް އީރާނުގެ ޤުމްއަށް ވަޑައިގެންފައެވެ. މިއަދު އޭނާއަކީ އަންހެނުންގެ ހައްޤުތަކާއި އިޖްތިމާޢީ މިނިވަންކަން ފަދަ ކަންކަމުގައި މެދުމިން އިޚްތިޔާރު ކުރައްވާ ބޭފުޅެކެވެ. މީސްމީޑިޔާގެ މަޤްބޫލު ޓްރެންޑުތަކުގައި ވެސް ބައިވެރުވެވަޑައިގަންނަވާ ޚުމައިނީ އިސްލާމީ ފިކުރުގެ އިތުރުން ހުޅަނގުގެ ފަލްސަފާތަކަށް ވެސް ޝައުޤުވެރިވެވަޑައިގަންނަވައެވެ.