ފަތުރުވެރިކަމުގެ މަންޒިލްތަކާ ވާދަކޮށް ކުރިއެރުން ހޯދަން އައިޓީބީ މުހިއްމު!
-
މިއަހަރުގެ ފެއާގައި 67 ކުންފުންޏަކުން ބައިވެރިވޭ
-
ފަތުރުވެރިކަމުގެ ދާއިރާއިން ބައިނަލްއަޤްވާމީ ގުޅުންތައް ޤާއިމުކުރުމަށް ފަހި ފުރުޞަތުތަކެއް
ފަތުރުވެރިކަމުގެ ސިނާއަތުގައި ބޭއްވޭ އެންމެ ބޮޑު އަދި އެންމެ ނުފޫޒުގަދަ އެއް ހަރަކާތް ކަމަށްވާ އައިޓީބީ ބާލިން ފެއަރ ފެށިގެން ކުރިއަށްދާއިރު، މިއީ ދިވެހިރާއްޖޭގެ ފަތުރުވެރިކަން ބައިނަލްއަގުވާމީ މައިދާނުގައި އިޝްތިހާރުކޮށް، ކުރިއެރުވުމަށް ލިބިގެންދިޔަ ވަރަށް މުހިންމު ފުރުސަތެކެވެ.
ޖަރުމަނުވިލާތުގެ ބާލިންގައި މިހާރު ކުރިއަށްދާ އައިޓީބީ ފެއަރގައި ރާއްޖެއިން ބައިވެރިވެފައިވަނީ ވަރަށް ވަރުގަދަ އަޒުމަކާއެކު، ރާއްޖޭގެ ގުދުރަތީ ރީތިކަމާއި މެހެމާންދާރީ މުޅި ދުނިޔެއަށް ދައްކާލުމުގެ މަގްސަދުގައެވެ. މި ހަރަކާތުގެ ތެރެއިން ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ވަނީ ދުނިޔޭގެ އެކި ކަންކޮޅުތަކުން އަންނަ ފަރާތްތަކާ ބައްދަލުކޮށް، ގުޅުން ބަދަހިކުރުމުގެ ފުރުސަތު ހުޅުވިފައެވެ.
"މި ފެއަރަގައި ބައިވެރިވުމުގެ ފުރުސަތު ލިބިގެންދިއުމަކީ ހަމަޔަގީނުންވެސް އަޅުގަނޑުމެންގެ ވިޔަފާރި ކުރިއެރުވުމަށް ލިބިގެންދިޔަ ރަނުގެ ފުރުސަތެއް. އެކި މީހުންނާ މަޝްވަރާކޮށް އެކި ހިސާބުތަކުގެ ކުންފުނިތަކާއި މަޝްވަރާކޮށް އެމީހުން ރާއްޖެއަށް ގެނައުމަށް އެބަ ޕެކޭޖްތައް އެކުލަވާލުމުގެ މަސައްކަތްވެސް ކުރަން." ޕީއެސްއެމް ނިއުސްއާ ވާހަކަދެއްކި އިފުރު އައިލެންޑް ރިސޯޓުގެ މަންދޫބު ބުންޏެވެ.
މިއަހަރުގެ އައިޓީބީ ބާލިން ފެއަރގައި ރާއްޖޭގެ ފަރާތުން ބައިވެރިވާ މަންދޫބުންގެ އަދަދަށް ބަލާއިރު، ޖުމްލަ 67 ކުންފުންޏަކުން 159 ފަރާތެއް މި ފެއަރގައި ރާއްޖެ ތަމްސީލުކުރަމުން އެބަގެންދެއެވެ. މީގެ ތެރޭގައި ރާއްޖޭގެ މަޝްހޫރު ރިސޯޓުތަކާއި، ގެސްޓްހައުސްތަކާއި، ސަފާރީ އުޅަނދުފަހަރުގެ އިތުރުން ޓްރެވަލް އެޖެންސީތައް ހިމެނެއެވެ. މި ހުރިހާ ފަރާތްތަކަކުންވެސް މަސައްކަތް ކުރަމުންދަނީ ރާއްޖެއަކީ ފަތުރުވެރިންނަށް އެންމެ ރައްކާތެރި އަދި އެންމެ ހިތްގައިމު މަންޒިލްގެ ގޮތުގައި އިޝްތިހާރުކޮށް، ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށެވެ.
"އައިޓީބީ ބަރލިންއަކީ މުޅި ދުނިޔޭގަވެސް ފަތުރުވެރިކަމުގެ ދާއިރާއިން ބޭއްވޭ އެންމެ ބޮޑު އެއް ފެއަރ. މި ފެއަރގައި މިދިޔަ އަހަރުވެސް ހަމަ ބައިވެރިވެގެން އެއްކޮށް ހުރިހާ ޕެކޭޖެއްވެސް ބުކް ކޮށް ހުސްވި. ވަރަށް ގިނަ މީހުން އައިސް ހަަމަ ވަކިންވެސް މިއަހަރުވެސް ޕެކޭޖްތައް އެބަ ގަނެ އަނެއް ބަޔަކު އަހަރުމެންނާ ގުޅިގެން ޕެކޭޖްތައް ހެދުމުގެ މަސައްކަތްވެސް ކުރިއަށްއެބަދޭ." ރިޒޯޓް ލައިފްގެ މަންދޫބެއް ބުންޏެވެ.
މި ފެއަރގައި ބައިވެރިވި އެގްޒިބިޓަރުންގެ ޝުއޫރުތަކަށް ބަލާއިރު، އެ ހުރިހާ ފަރާތްތަކަކުންވެސް އެއްބަސްވާ ގޮތުގައި އައިޓީބީ ބާލިންއަކީ އެމީހުންގެ ވިޔަފާރިތަށް ކުރިއެރުވުމަށް ލިބިގެންދިޔަ "ރަނުގެ ފުރުސަތެއް" ކަމަށެވެ. ފެއަރގައި ބައިވެރިވި ކުންފުނިތަކުގެ މަންދޫބުން ފާހަގަކުރާ ގޮތުގައި، މިފަދަ ބޮޑު ބައިނަލްއަގުވާމީ މައިދާނެއްގައި ރާއްޖޭގެ އުފެއްދުންތަކާއި ޚިދުމަތްތައް ދައްކާލުމަކީ ދުނިޔޭގެ މާކެޓުގައި ރާއްޖޭގެ މަގުބޫލުކަން ދެމެހެއްޓުމަށް ކޮންމެހެން ބޭނުންތެރި ކަމެކެވެ.
މި ފެއަރގެ ތެރެއިން ދުނިޔޭގެ ބޮޑެތި ޓުއާ އޮޕަރޭޓަރުންނާ ސީދާ ބައްދަލުވެ، ކުރިއަށް އޮތް އަހަރުތަކަށް ބޭނުންވާ މުހިންމު އެއްބަސްވުންތަކުގައި ސޮއިކުރުމުގެ ފުރުސަތު ލިބިގެންދާކަން އެފަރާތްތަކުން އުފަލާއެކު ފާހަގަކުރެއެވެ.
އެގްޒިބިޓަރުން ފާހަގަކުރާ ގޮތުގައި މި ފެއަރގެ ސަބަބުން ބައިނަލްއަގުވާމީ ފަތުރުވެރިކަމުގެ ބާޒާރުގައި މިހާރު ހުރި ޓްރެންޑްތަކާއި، ފަތުރުވެރިންގެ ބޭނުންތަކަށް އަންނަމުންދާ ބަދަލުތައް ދެނެގަތުމަށް ވަރަށް ބޮޑަށް އެހީތެރިވެދެއެވެ. އަދި މިއީ ހަމައެކަނި ރާއްޖެ އިޝްތިހާރުކުރުމެއް ނޫން ކަމަށާއި، މިއީ ދުނިޔޭގެ އެހެން މަންޒިލްތަކާ ވާދަކުރުމަށްޓަކައި ރާއްޖޭގެ ފަތުރުވެރިކަމުގެ އުފެއްދުންތައް އިތުރަށް ހަރުދަނާކުރަންވީ ދާއިރާތައް ދެނެގަތުމަށް ލިބޭ ފުރުސަތެއްގެ ގޮތުގައިވެސް އެގްޒިބިޓަރުން ދެކެއެވެ.