މެދުއިރުމަތީގައި މިހާރު ހިނގަމުންދާ ކުރިމަތިލުންތަކުގެ ތެރޭގައި، ލުބްނާނާ ދެކޮޅަށް ޔަހޫދީން ހިންގަމުންދާ ނިރުބަވެރި ޢުދުވާނުތަކަށް ނުސިހި، ލުބްނާންގައި ޙަރަކާތްތެރިވާ މުޖާހިދުންގެ ޖަމާޢަތް، ޙިޒްބުﷲއިން ޔަހޫދީންނަށް ޙަމަލާތައް ދެމުން އެބަދެއެވެ.
ޙިޒްބުﷲއިން ޔަހޫދީން ޙަމަލާދިނީ، އެމެރިކާ އާ ގުޅިގެން ޔަހޫދީން އީރާނަށް ޙަމަލާދީ، އެ ޤައުމުގެ ރޫޙީ ވެރިޔާ އާޔަތުالله ޚާމަނާއީ ޝަހީދުކޮށްލުމުގެ ބަދަލުހިފުމުގެ ގޮތުންނެވެ. އެއާއެކު، މި ހަނގުރާމަ މިހާރު ވަނީ ލުބްނާނާ ހަމައަށްވެސް ރަނގަޅަށް ފޯރައިފައެވެ.
ޙިޒްބުﷲ އާ ދެކޮޅަށް ކަމަށް ބުނެ، ޔަހޫދީން ދަނީ ލުބްނާންގެ ވެރިރަށް ބެއިރޫތާއި ވަށައިގެންވާ ސަރަޙައްދުތަކަށް ނިރުބަވެރި ޙަމަލާތައް ދެމުންނެވެ. އެގޮތުން، ލުބްނާންގެ އިރުމަތީގައި ހުރި މީހުން ދިރިއުޅޭ އިމާރަތަކަށް ދިން ޙަމަލާގައި 11 މީހުން ވަނީ ޝަހީދުވެފައެވެ.
މީޑިއާ ރިޕޯޓުތައް ބުނި ގޮތުގައި، ޔަހޫދީންގެ ޙަމަލާތައް އަމާޒުކުރަމުންދަނީ ބެއިރޫތުގައި ޢާންމުން ދިރިއުޅޭ ސަރަޙައްދުތަކަށެވެ. ޔަހޫދީންގެ އެ ޙަމަލާތަކުގައި ލުބްނާންގައި މަރުވި މީހުންގެ އަދަދު މިހާރު ވެސް ވަނީ 50އަށް އަރައިފައެވެ.
ލުބްނާންގެ ދެކުނުގެ ގިނަ އަވައްތައް ހުސްކުރަން އަންގައި، ޔަހޫދީންގެ ނިރުބަވެރި ފައުޖުތަކުން އެ ސަރަޙައްދަށް ވަންނަމުންދާކަމަށް ރިޕޯޓުތައް ބުންޏެވެ.
ޔަހޫދީންގެ ޢުދުވާނުތަކުގެ ރައްދުގައި، ޙިޒްބުﷲއިން ވަނީ ޔަހޫދީ ދައުލަތުގެ އުތުރުގައި ހުންނަ ކަނޑުގެ ސިފައިންގެ މަރުކަޒަށް އަމާޒުކޮށް ވަރުގަދަ ރޮކެޓް ޙަމަލާތަކެއް ދީފައެވެ. ޔަހޫދީންގެ ނިރުބަވެރި ފައުޖަށް ވަނީ ލުބްނާންގެ އިތުރު ސަރަޙައްދުތައް ފޭރިގަތުމަށް އަންގައިފައެވެ. ޔަހޫދީންގެ ޢަމަލުތައް ދުނިޔޭގެ އިންސާނީ ޙައްޤުތަކާބެހޭ ޖަމިއްޔާތަކުން ވަނީ ކުށްވެރިކޮށްފައެވެ.
ފެބްރުއަރީ 28ގައި އީރާނަށް ޙަމަލާދޭން ފެށުމާ ގުޅިގެން، ޙިޒްބުﷲއިން ނެރުނު ބަޔާނެއްގައި ވަނީ، ޔަހޫދީންގެ ނިރުބަވެރި ދަޢުލަތުގެ ޖަރީމާތަކާ ދެކޮޅަށް ތެދުވާނެކަމަށް ބުނެފައެވެ. ޙިޒްބުﷲއިން ދެމުންދާ ޙަމަލާތަކާ ގުޅިގެން، ޚާމަނާއީ އެކޭ އެއްގޮތަށް ޙިޒްބުﷲގެ އިސް ވެރިޔާ ނަޢީމް ޤާޞިމް ވެސް ޝަހީދުކޮށްލާނެކަމުގެ އިންޒާރު ޔަހޫދީން މިހާރު ވަނީ ދީފައެވެ.
ފެބުރުވަރީ 28ވަނަ ދުވަހު ޔަހޫދީންނާއި އެމެރިކާއިން އީރާނާ ދެކޮޅަށް ފެށި ހަނގުރާމައިގައި، އެ ޤައުމުގެ ރޫހީ އެންމެ މަތީ ވެރިޔާ، އާޔަތުالله ޢަލީ އަލް-ޚާމަނާޢީއާއި އޭނާގެ ޢާއިލާގެ މެންބަރުންގެ އުތުރުން އީރާންގެ އަސްކަރިއްޔާގެ އިސްވާރުންގެ ތެރެއިން ބަޔަކު ވަނީ ޝަހީދުކޮށްލައިފައެވެ.