ފެބްރުވަރީ މަހު މަސްވެރިކަން ދަށް، ދޫކޮށްފައިވަނީ 20 މިލިޔަން ރުފިޔާ

ފެބްރުވަރީ މަހު މަސްވެރިން ކިރުވި މަހަށް 20 މިލިޔަން ރުފިޔާ ދޫކޮށްފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯގެ ތަފާސްހިސާބުތަކުން ދައްކައިފިއެވެ.

ޖަނަވަރީ މަހާ އަޅާކިޔާއިރު، ފެބްރުވަރީ މަހު މަސްވެރިކަން ދެގުނަ ދަށެވެ.

މިފްކޯއިން ހިއްސާކޮށްފައިވާ ތަފާސްހިސާބުތަކަށް ބަލާއިރު، މިދިޔަ މަހު ޖުމްލަ 514 ދޯންޏަކުން 1180 ޓަނުގެ މަސް ވަނީ ކިރާފައެވެ. މި ދޯނިތަކުން ކިރުވި މަހަށް ފެބްރުވަރީ މަހު ޖުމުލަ 20،380،249 ރުފިޔާ ވަނީ ދޫކޮށްފައެވެ.

މީގެ ތެރޭގައި ހިމެނެނީ ކަޅުބިލަ މަސް، 10 ކިލޯއިން މަތީގެ ކަންނެލި އަދި 15 ކިލޯއިން މަތީގެ ކަންނެއްޏެވެ. އެންމެ ގިނައިން ފައިސާ ދޫކޮށްފައިވަނީ، ކަޅުބިލަ މަހަށެވެ.

ކަޅުބިލަ މަސް:

• 483 ދޯނި
• 1052.62 ޓަނު
• ޖުމްލަ ފައިސާ: 17.5 މިލިޔަން ރުފިޔާ

ކަންނެލި (10 ކިލޯއިން މަތި):

• 212 ދޯނި
• 55.16 ޓަނު
• ޖުމްލަ ފައިސާ: 1.1 މިލިޔަން ރުފިޔާ

ކަންނެލި (15 ކިލޯއިން މަތި):

• 214 ދޯނި
• 72.16 ޓަނު
• ޖުމްލަ ފައިސާ: 1.8 މިލިޔަން ރުފިޔާ

މީގެކުރިން މަސްވެރިން ކިރުވާ މަހަށް ފައިސާ ދޫކުރުމުގައި ލަސްތަކެއް ދިމާވި ނަމަވެސް މިހާރު ލަސްވެގެން 48 ގަޑިއިރު ތެރޭގައި ދަނީ ފައިސާ ދޫކުރަމުންނެވެ. މަސް ގަންނަ އަގުތަކަށް ހެޔޮ ބަދަލުތަކެއް ގެނެސްދީފައިވާއިރު، ރާއްޖޭގެ ހުރިހާ ހިސާބަކުން އެއް ހަމައެއްގައި ހެޔޮ އަގުގައި މަސްވެރިންނަށް ތެޔޮ ލިބޭނެ ގޮތްވެސް ދަނީ ހަމަޖައްސަމުންނެވެ.

މަސްވެރިކަމުގެ ސިނާއަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާޢަތަކަށް މަސްވެރިކަން ހެދުމަކީ ސަރުކާރުގެ އަމާޒެކެވެ.