"ބުރުނު ބޮމަ" ދެވަނަ އެޑިޝަންގައި ބައިވެރިވުމުގެ ފުރުސަތު ހުޅުވާލައިފި

ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ބައިނަލްއަގުވާމީ ފެންވަރުގައި ބާއްވަމުން އަންނަ ސްޕޯޓްސް ފިޝިންގ ޓޯނަމެންޓް "ބުރުނު ބޯމަ"ގެ ދެވަނަ އެޑިޝަންގައި ބައިވެރިވުމުގެ ފުރުސަތު ހުޅުވާލައިފިއެވެ.

ވިޒިޓް މޯލްޑިވްސް ކޯޕަރޭޝަންއިން ވިދާޅުވީ މި މުބާރާތް ކުރިއަށް ގެންދިޔުމަށް ހަމަޖެހިފައިވަނީ ޖޫން މަހުގެ 13 އިން 15ވަނަ ދުވަހުގެ ނިޔަލަށެވެ.

ވިޒިޓް މޯލްޑިވްސް ކޯޕަރޭޝަން އިން އިސްނަގައިގެން ބާއްވާ މި މުބާރާތަކީ ރާއްޖޭގެ މުއްސަނދި މަސްވެރިކަމުގެ ތާރީޚާއި ސަގާފަތް ދުނިޔެއަށް ދައްކާލުމުގެ އިތުރުން، ރާއްޖޭގައި "ހައި-ވެލިއު އެޑްވެންޗަރ ޓޫރިޒަމް" އިޝްތިހާރުކުރުމަށް ހިންގޭ މުހިންމު މަޝްރޫއެކެވެ.

ބުރުނު ބޮމަ ސްޕޯޓްސް ފިޝިން ޓޯނަމެންޓުގެ ފުރަތަމަ އެޑިޝަން ކުރިއަށް ގެންގޮސްފައި ވަނީ 2025 ވަނަ އަހަރު އެވެ. ދުބާއީގެ ޓީމަކާއި ދިވެހި ޓީމުތަކުން ބައިވެރިވި މި މުބާރާތް ވެގެން ގޮސްފައި ވަނީ ވާދަވެރި، އަދި ތަފާތު ތަޖުރިބާތަކެއް ބައިވެރިންގެ މެދުގައި ހިއްސާކުރެވުނު ތާރީހީ މުބާރާތަކަށެވެ. ފުރަތަމަ އެޑިޝަންއަށް ވުރެ ފުޅާކޮށް މި މުބާރާތުގެ ދެވަނަ އެޑިޝަން ބޭއްވުމަށް ވިޒިޓް މޯލްޑިވްސް ކޯޕަރޭޝަނުން ތައްޔާރުވަމުން އަންނަ އިރު، މި އަހަރުގެ އެޑިޝަން ކުރީ އަހަރަށްވުރެ ދެގުނަ ބޮޑުވާނެ ކަމަށް ވީއެމްސީއިން ވިދާޅުވެ.

މި މުބާރާތް ކުރިއަށްދާނީ އިންޓަނޭޝަނަލް ގޭމް ފިޝިން އެސޯސިއޭޝަން(އައިއެފްޖީއޭ)ގެ މިންގަނޑުތަކާ އެއްގޮތަށް، "ކެޗް އެންޑް ރިލީޒް" ނުވަތަ މަސް ބޭނުމަށްފަހު އަލުން ކަނޑަށް ދޫކުރުމުގެ އުސޫލުތަކަށް އިސްކަންދީގެންކަމަށް ވިދާޅުވިއެވެ.

ވީއެމްސީއިން ވިދާޅުވީ މުބާރާތުގެ ތިން ދުވަހު ވެސް، ކޮންމެ ދުވަހަކު ފަތިހު 05:00 އިން ހަވީރު 18:30 އަށް މަސްވެރިކަމުގެ ހަރަކާތްތައް ކުރިއަށްދާނެއެވެ. މުބާރާތުގެ އެންމެ މޮޅު ޓީމަށް 25,000 އެމެރިކާ ޑޮލަރުގެ ފައިސާގެ އިނާމު ހުށަހެޅިފައިވާއިރު، "އެންމެ މޮޅު ކެޕްޓަން" އަދި "އެންމެ މޮޅު މަސްވެރިޔާ" ފަދަ ޝަރަފުވެރި މަގާމުތައް ހޮވުމަށް ވަނީ ހަމަޖެހިފައެވެ.

މިދިޔަ އަހަރުގެ މުބާރާތް ކާމިޔާބުކުރި ފަރާތްތަކުން ފާހަގަކޮށްފައިވާ ގޮތުގައި، ކުރިއާލާ ރަޖިސްޓްރީވެ، ރާއްޖޭގެ ތަޖުރިބާކާރުންނާ ގުޅިގެން އިންޑިއާ ކަނޑުގެ މަސްމަހާމެހީގެ އާދަކާދަތަކަށް ފަރިތަވުމަކީ މުބާރާތުގައި ކުރިހޯދުމަށް ލިބުނު ވަރަށް ބޮޑު ފުރުސަތެކެވެ.