"އަލްއަބްރާރު" ޢުމްރާ ގްރޫޕްގެ ހުއްދަ ހިފަހައްޓައިފި

ފުރަން ތައްޔާރުވެފައިވަނިކޮށް ޢުމްރާ ދަތުރު ކެންސަލް ކުރި މައްސަލައިގައި "އަލްއަބްރާރު" ޙައްޖު އެންޑް ޢުމްރާ ކުންފުންޏާ މެދު އިސްލާމީ ކަންތައްތަކާ ބެހޭ ވުޒާރާއިން ފިޔަވަޅު އަޅައިފިއެވެ.

އިސްލާމީ ކަންތައްތަކާ ބެހޭ ވުޒާރާއިން ނެރުނު ނޫސްބަޔާނެއްގައި ވިދާޅުވީ ޢުމުރާއަށް މީހުން ގެންދިއުމަށް އަލްއަބްރާރު ކުންފުންޏަށް ދޫކޮށްފައިވާ ހުއްދަ ވަގުތީގޮތުން ހިފަހައްޓާފައިވާކަމަށާއި އެކަން އެކުންފުންޏަށް މިހާރު އަންގާފައިވާކަމަށެވެ.

އަދި އެކަމާ ގުޅޭގޮތުން އިތުރަށް ސާފުކުރަންޖެހޭ މަޢުލޫމާތުތަކާއި، ބަލަންޖެހޭ ކަންކަން ބެލުމަށްފަހު، އުސޫލުގެ ތެރެއިން އަޅަންޖެހޭ ފިޔަވަޅުތައް ކުންފުންޏާ ދެކޮޅަށް އަޅާނެ ކަމަށްވެސް އިސްލާމީ ކަންތައްތަކާ ބެހޭ ވުޒާރާއިން ނެރުނު ބަޔާނުގައި ވަނީ ވިދާޅުވެފައެވެ.

"އަލްއަބްރާރު" ކުންފުނިންވަނީ މިރަމަޟާން މަހަށް ޚާއްސަކޮށް، 3 މާރިޗުން 26 މާރިޗުގެ ނިޔަލަށް ކުރުމަށް ހަމަޖެހިފައިވާ ޢުމްރާ ދަތުރަށް ފުރަން އެންމެ ފަހުގެ ތައްޔާރީތައް ވަމުންދަނިކޮށް އެދަތުރު ކެންސަލްކޮށްފައެވެ.

މިމައްސަލައިގެ ޝަކުވާ އިސްލާމީ ކަންތައްތަކާ ބެހޭ ވުޒާރާއަށް ލިބުމާ ގުޅިގެން މިހާތަނަށް ސާފުކުރި މަޢުލޫމާތައް ބަލާއިރު، ޢުމްރާ ދަތުރު ކެންސަލްކޮށްފައިވަނީ ޤަބޫލުކުރެވޭ އެއްވެސް ސަބަބެއް ނެތި އަދި ރާއްޖެއިން ޢުމްރާއަށް މީހުން ގެންދިއުމާ ބެހޭ އުސޫލާ ޚިލާފަށްކަމަށް އެވުޒާރާއިން ވަނީ ވިދާޅުވެފައެވެ.

މަޢުލޫމާތު ލިބިފައިވާ ގޮތުގައި އަލްއަބްރާރު ގްރޫޕާއެކު ރަމަޟާން ޢުމްރާއަށް ދިއުމަށް 120 މީހަކު ފައިސާ ދައްކާފައިވެއެވެ. އެމީހުންނަށް ދަތުރު ކެންސަލްވިކަން އެންގީ ދަތުރަށް ފުރަން އޮތް ދުވަހު، ހުރިހާ ކަމެއް ތައްޔާރުކޮށްފައިވަނިކޮށެވެ.

މިގްރޫޕާއެކު ޢުމުރާއަށް ދިއުމަށް ފައިސާ ދެއްކި މީހުންނާއި މީގެއިތުރުންވެސް އެކި ސަބަބުތަކާ ހުރެ ރަމަޟާން ޢުމްރާއަށް ނުފުރި ތިބި މީހުންނަށް އެހީވުމުގެ ގޮތުން، އިސްލާމީ ކަންތައްތަކާއި ބެހޭ ވުޒާރާއާއި ޙައްޖު ކޯޕަރޭޝަނާއި، މޯލްޑިވިއަން ގުޅިގެން އެ ފުރުޞަތު ފަހިކޮށްދިނުމުގެ މަސައްކަތް ވަނީ ފަށާފައެވެ.