މަސްތުވާތަކެތި އެތެރެ ކުރާ މަންޒިލްތައް ބަލައި، ހުއްޓުވުމަށް މަސައްކަތްތަކެއް!

ރާއްޖެއަށް މަސްތުވާތެކެތި އެތެރެވާ މަންޒިލްތައް ދެނެގަނެ، އެ މަގުތަކުން މަސްތުވާތަކެތި އެތެރެވުން ހުއްޓުވުމަށް މަސައްކަތް ކުރަމުންދާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ދާޚިލީ ސަލަމާތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވަނީ، މަސްތުވާތަކެތީގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ރާއްޖެ އެތެރެކުރާ މަސްތުވާތަކެތި ހުއްޓުވުމަށް ކުރަމުންދާ މަސައްކަތަށް އަލިއަޅުވާލައްވާފައެވެ. ރާއްޖޭގެ އެތެރޭގައި ދައުރުވާ މަސްތުވާތަކެތި މަދުކުރުމަށް ތަންފީޒީ އިދާރާތަކުން، ކުރަމުންދާ މަސައްކަތް ހާމަކުރައްވާ ވަޒީރު ވަނީ ބައެއް ތަފާސްހިސާބުތައް ހިއްސާކުރައްވާފައެވެ.

ވޭތުވެ ދިޔަ ދޮޅު މަސް ދުވަހުގެ ތެރޭގައި ފުލުހުންނާއި ކަސްޓަމްސް ގުޅިގެން ހިންގުނު އެކި އޮޕަރޭޝަންތަކުގައި ޖުމްލަ 83.45 ކިލޯގެ މަސްތުވާތަކެތި ވަނީ އަތުލައިގަނެފައެވެ. މިތަކެތީގެ މަގުމަތީ އަގު 72.2 މިލިޔަން ރުފިޔާއަށް އަރާ ކަމަށް ވަޒީރު އިޙްސާން ވިދާޅުވިއެވެ. މީގެ ތެރެއިން 72 ކިލޯގެ މަސްތުވާތަކެއްޗަކީ ރާއްޖޭގެ ބޯޑަރު ހުރަސްކޮށް އެތެރެކުރަން މަސައްކަތް ކުރަނިކޮށް ކަސްޓަމްސްއިން އަތުލައިގެންފައިވާ މަސްތުވާތަކެތި ކަމަށް ވަޒީރު ވިދާޅުވިއެވެ. މިއީ ތަފާތު 8 މައްސަލައެއްގެ ތެރެއިން އަތުލައިގެންފައިވާ މަސްތުވާތަކެތިކަން ދާޚީލީ ވަޒީރު ވަނީ ހާމަކުރައްވާފައެވެ.

ކަސްޓަމްސްގެ މަސައްކަތް ހަރުދަނާކޮށް ވައިގެ މަގުންނާއި ކަނޑުމަގުން ރާއްޖެ އެތެރެކުރަން އުޅެނިކޮށް އަތުލައިގަނެފައިވާ މަސްތުވާތަކެތީގެ އަދަދު އިތުރުވެފައިވާއިރު، ބޭރުގައި ތިބެގެން ރާއްޖެއަށް މަސްތުވާތަކެތި އެތެރެކުރާ ފަރާތްތައް ހުއްޓުވުމުގެ މަސައްކަތް މެދުކެނޑުމެއް ނެތި ކުރަމުންދާ ކަމަށް ވަޒީރު ވިދާޅުވިއެވެ. ސަރުކާރުން ވަނީ މީގެ ކުރިން މިފަދަ 3 ފަރާތެއް ދެނެގަނެވިފައިވާކަން ހާމަކޮށްފައެވެ.

"ކުރީގައި ފާހަގަކޮށްފައިވާ 3 ދިވެހިން ރާއްޖެ ގެނައުމުގެ މަސައްކަތް މިހާރުވެސް ދިވެހި ފުލުހުން ދަނީ އިންޓަޕޯލްއާއި އެކި ފަރާތްތައް ގުޅިގެން ދަނީ މަސައްކަތް ކުރަމުން. ދިވެހިރާއްޖެއަށް މަސްތުވާތަކެތި އެތެރެވާ މަންޒިލްތަކުގެ އެނަލިސިސް ހަދާ، މިގެންނަ ފަރާތްތައް އަދި ގެންނަ ފަރާތްތައް އެއީ އެފަރާތް މެދުވެރިވެގެން ގެންނަ ޝިޕްމެންޓްތައްކަން ޔަޤީންވާ ފަރާތްތަކުގެ އެނަލިސިސް ހަދާ އޭގެ އޮރިޖިން ހޯދުމުގެ މަސައްކަތް އަޅުގަނޑުމެންނާއި އަދި ބޭރުގެ ފަރާތްތަކާއި ގުޅިގެން މިދަނީ ކުރިއަށް ގެންދަމުން ." ވަޒީރު ވިދާޅުވިއެވެ.

ރާއްޖެއަށް އެތެރެކުރެވޭ މަސްތުވާތަކެތީގެ އިތުރުން، ޤާނޫނާއި ޤަވާއިދާއި ޚިލާފަށް އެތެރެކުރެވޭ އެހެން ބާވައްތައްވެސް އަތުލައިގަންނަމުންދާކަން ވަޒީރު ވަނީ ހާމަކުރައްވާފައެވެ. މިގޮތުން ވޭތުވެ ދިޔަ ދޮޅު މަސްދުވަހުގެ ތެރޭގައި 7000 ވޭޕް ސްޓިކް އަދި ޤަވާއިދާ ޚިލާފަށް އެތެރެކޮށްފައިވާ 2 މިލިޔަން ސިނގިރޭޓު އަތުލައިގަނެފައިވާ ކަމަށް ވަޒީރު އިޙްސާން ވަނީ ހާމަކުރައްވާފައެވެ.

ސަރުކާރުން ދަނީ މަސްތުވާތަކެތީގެ މައްސަލަ ހައްލުކުރުމަށް ދެ މަގަކުން މަސައްކަތް ކުރަމުންނެވެ. އެގޮތުން ރާއްޖޭގައި ދައުރުވާ މަސްތުވާތަކެތި ހުއްޓުވުމާއި، މަސްތުވާތަކެތި ބޭނުންކުރާ ފަރާތްތަކަށް ފަރުވާދީ މުޖްތަމަޢުއަށް ނެރުމަށް ކުރެވޭ މަސައްކަތް ހަރުދަނާ ކުރުމަށް ސަރުކާރުން ދަނީ މަސައްކަތް ކުރަމުންނެވެ.