އިތުރު 31 ރަށަށް މިމަހު އެމްބިއުލާންސް ފޮނުވަނީ
-
އަންނަ ހަފްތާގައި 14 ރަށަށް އެމްބިއުލާންސް ފޮނުވާނެ
-
މިދިޔަ މަހު 56 ރަށަށް އެމްބިއުލާންސް ފޮނުވި
އިތުރު 31 ރަށަށް މިމަހު އެމްބިއުލާންސް ފޮނުވާނެކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާޙިމް ވިދާޅުވެއްޖެއެވެ. ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ވަޒީރު ވިދާޅުވީ ޞިއްޙީ މަރުކަޒުތަކާއި ހޮސްޕިޓަލްތަކުގެ ވަސީލަތްތައް ހަމަކުރުމަށް ގިނަ މަސައްކަތްތަކެއް ކުރަމުން އަންނަކަމަށެވެ.
އެގޮތުން އެންމެ އިސްކަމެއްދޭ މަސައްކަތެއްގެ ގޮތުގައި އެމްބިއުލާންސް ހަމަކުރުމުގެ މަސައްކަތް ކުރަމުން އަންނައިރު، މިހާތަނަށް ބޮޑު ކުރިއެރުމެއް ލިބިފައިވާކަމަށް ވަޒީރު ވިދާޅުވިއެވެ.
މިދިޔަ މަހު 56 ރަށަކަށް ވަނީ އެމްބިއުލާންސް ފޮނުވާފައެވެ. އަދި މިމަހުގެ ތެރޭގައި 2 ބުރަކަށް ބަހާލައިގެން އެމްބިއުލާންސް ރަށްރަށަށް ފޮނުވާނެއެވެ. މީގެއިތުރުން، ބޮޑެތި އާބާދީތަކަށް އަމާޒުކޮށް ޕެރަމެޑިކް އެމްބިއުލާންސްތަކެއް ހޯދަމުން އަންނަކަމަށާއި، އެ އެމްބިއުލާންސްތައްވެސް އަންނަ މަހުގެ ތެރޭގައި ލިބޭނެކަމަށް ވަޒީރު ވިދާޅުވިއެވެ.
"އަންނަ ހަފްތާގައި 14 ރަށަކަށް އެމްބިއުލާސް ފޮނުވާނެ. އަދި މަހުގެ ފަހުކޮޅު އަނެއް 17 ރަށަށް ފޮނުވާނެ. އަދި ސިޓީތަކަށް/ބޮޑެތި އާބާދީތަކަށް ޚާއްސަކޮށް ގެންނަ ޕެރަމެޑިކް އެމްބިއުލާންސްތަކެއް އަންނަ މަހު ލިބޭނެ." ވަޒީރު ނާޒިމް ވިދާޅުވިއެވެ.
ހެލްތު ސެންޓަރުތަކުގެ ޢުމްރާނީ ތަރައްޤީއާއި ވަސީލަތްތައް ހޯދުމުގެ 170 މަސައްކަތެއް ކުރިއަށްދާކަމަށްވެސް ވަޒީރު ވިދާޅުވިއެވެ. އެގޮތުން ޞިއްޙީ ޚިދުމަތްދޭ މަރުކަޒުތަކުގެ ވަސީލަތްތައް ހަމަކުރުމާއި ހަލާކުވެފައިވާ ވަސީލަތްތައް ހޯދުން ހިމެނޭހެން، 190 މިލިޔަން ރުފިޔާގެ ތަކެތި ހޯދުމުގެ މަސައްކަތް އެސްޓީއޯ އާއި ގުޅިގެން ސަރުކާރުން ދަނީ ކުރިއަށްގެންދަމުންނެވެ.
އަދި އެމްބިއުލާންސްތަކަށް ދިމާވާ މައްސަލަ އަވަހަށް ޙައްލުކުރުމަށްޓަކާ، މަރާމާތުގެ މަސައްކަތް ގެންދިއުމަށްވެސް ދިގުމުއްދަތަށް ބަޔަކާ ހަވާލުކުރުމުގެ މަސައްކަތް ކުރަމުންދާކަމަށް ޞިއްޙީ ވަޒީރު އަބްދުﷲ ނާޒިމް އިބްރާޙިމް ވިދާޅުވިއެވެ. ވަޒީރު ވިދާޅުވީ މަރާމާތުކުރުމުގެ ޚިދުމަތް ބައެއް ރަށްރަށުން ނުލިބޭތީ ދިމާވާ ގޮންޖެހުންތަކަށް، މިކަމުން ޙައްލު ލިބޭނެކަމަށެވެ.