އީރާނުން ޔަހޫދީ ދައުލަތުގެ ރަށްތަކަށް އަމާޒުކޮށް އަނެއްކާ ވެސް ވަރުގަދަ މިސައިލް ޙަމަލާތަކެއް ފޮނުވައިލުމާ ގުޅިގެން ޔަހޫދީންގެ މިލިޔަނަކަށް ވުރެ ގިނަ މީހުން ބިންގަރާސްތަކަށް ވަދެ، ފިލަން މަޖުބޫރުވެއްޖެއެވެ. މިއީ، އީރާނާ ދެކޮޅަށް އެމެރިކާއާއި ޔަހޫދީން ގުޅިގެން ފެބުރުވަރީ 28ވަނަ ދުވަހު ފެށި ހަނގުރާމައިގެ ދަށުން ދެމުންދާ ސިލްސިލާ ޙަމަލާތަކުގެ ބައެކެވެ. އީރާނާ ދެކޮޅަށް ހަނގުރާމަ ފެށުމުގެ އަޑީގައި ހުރީ ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫއާއި އޭނާގެ އެންމެ ބޮޑު މަދަދުގާރު، އެމެރިކާގެ ރައީސް ޑޮނަލްޑް ޓްރަމްޕެވެ.
ޔަހޫދީންގެ ރަށްތަކަށް އަމާޒުކޮށް އީރާނުން ވަރުގަދަ ޙަމަލާތަކެއް ފޮނުވައިލާފައި މި ވަނީ، އެމެރިކާއިން އިސްވެ ފަށާފައިވާ ހަނގުރާމަ ހުއްޓުވުމަށް އެ ޤައުމުގެ ޤާނޫނު ހަދާ މަޖިލީހުގައި ކުރި މަސައްކަތްތަކެއް ނާކާމިޔާބުވެފައިވާ ދަނޑިވަޅެއްގައެވެ. ޓްރަމްޕްގެ ހަނގުރާމަ ހުއްޓުވުމުގެ ގޮތުން ކޮންގްރެސްގެ މަތިގެ، ސެނެޓަށް ހުށަހެޅި ބިލު، އޭނާގެ ރިޕަބްލިކަން ޕާޓީން ވަނީ ބޭރުކޮށްލާފައެވެ. ބިލު ބަލައިގަތުމަށް ތާާޢީދު ކުރެއްވީ ސެނެޓުގެ 47 މެންބަރުންނެވެ. ނަމަވެސް، 53 މެންބަރުންގެ ވޯޓާއެކު އެ ބިލު ވަނީ ބޭރުކޮށްލާފައެވެ. ކޮންގްރެސްގެ ހުއްދައާ ނުލައި، ޓްރަމްޕް ފަށްޓަވާފައިވާ ޣައިރުޤާނޫނީ ހަނގުރާމަ ހުއްޓުވުމުގެ ގޮތުން ހުށަހެޅި ބިލު ފޭލުކޮށްލުމާ އެކު، ހަނގުރާމަ ކުރިއަށް ގެންދިޔުމަށް ޓްރަމްޕަށް އޮތް ބާރު މި ވަނީ އިތުރަށް ވަރުގަދަވެގެން ގޮސްފައެވެ.
މީގެ އިތުރުން، ޓްރަމްޕް ވަނީ މެދުއިރުމަތީގެ ހަނގުރާމަ ދުނިޔޭގެ އެކި ކަންކޮޅުތަކަށް ފެތުރެއްވުމުގެ މަސައްކަތް ވެސް ފަށްޓަވާފައެވެ. މި ގޮތުން، އޭނާގެ އަމުރަށް، އެމެރިކާގެ އަސްކަރިއްޔާއިން ވަނީ ސްރީ ލަންކާ ކައިރިން ދަތުރު ކުރަމުން ދިޔަ އީރާންގެ އަސްކަރީ މަނަވަރަކަށް ޙަމަލާދީ، އޭގައި ތިބި ސިފައިންގެ ތެރެއިން 80 ފަޅުވެރިން ޝަހީދު ކޮށްލާފައެވެ. މީގެ އިތުރުން، ތުރުކީވިލާތުގައި ހުރި ހުޅަނގުގެ ދިފާޢީ އިއްތިޙާދު (ނޭޓޯ)ގެ އަސްކަރީ މަރުކަޒަކަށް ޙަމަލާ ދިނުމަށް އީރާނުން ބެލިސްޓިކް މިސައިލެއް ބޭނުން ކޮށްފައިވާ ކަމަށާއި، އެ މިސައިލް ދިފާޢުކޮށް، ވައްޓައިލާފައިވާނެ ކަމުގައި ނޭޓޯން ބުންޏެވެ. މިއީ، ގަސްދުގައި ދީފައިވާ ޙަމަލާއެއް ކަން އީރާނުން ކަށަވަރު ކޮށްދީފައެއް ނުވެއެވެ.
އީރާނާ ދެކޮޅަށް ފަށާފައިވާ ހަނގުރާމައަށް ރައްދު ދިނުމުގެ ގޮތުން އެ ޤައުމުން ވަނީ ހުރްމުޛް ކަނޑުއޮޅި ވެސް ބަންދުކޮށްފައެވެ. އެއާއެކު، އެ ކަނޑުއޮޅިން މުދާ އުފުލުމަށް މި ވަނީ ބޮޑެތި ހުރަސްތަކެއް ކުރިމަތިވެފައެވެ. އަދި، ގަލްފާއި ޢަރަބި ޤައުމުތަކުން އުފައްދާ ތެލާއި ގޭސް ދުނިޔޭގެ ބާޒާރަށް ނެރުމަށް ހުރަސްއެޅި، ބާޒާރުގައި ތެލުގެ އަގު ވަނީ އުފުލިފައެވެ. ހުރްމުޛް ކަނޑުއޮޅި ހުރަސް ނުކުރެވި 200އެއްހާ އުޅަނދު މި ވަގުތު ތާށިވެފައި އޮތް ކަމުގައި ރިޕޯޓުތައް ބުނެއެވެ. ޓްރަމްޕް ވަނީ، އޭގެ ތެރޭގަައި ހިމެނޭ އެމެރިކާގެ އުޅަނދުތަކަށް ރައްކާތެރިކަން ފޯރުކޮށްދެއްވާނެ ކަމުގައި ވިދާޅުވެފައެވެ.
ހަނގުރާމަ ނިމުމަކަށް ގެނައުމާ ގުޅޭ ގޮތުން މަޝްވަރާތަކެއް ކުރިއަށްދާ ކަމުގެ އަޑުތަކެއް ވެސް ވަނީ ފެތުރިފައެވެ. އެމެރިކާގެ ނޫހެއް ކަމުގައިވާ ދި ނިއު ޔޯކް ޓައިމްސްއިން ބުނީ، ހަނގުރާމަ ނިމުމަކަށް ގެނައުމާ ގުޅޭ ގޮތުން އީރާންގެ ޖާސޫސީ އިދާރާއާއި އެމެރިކާގެ ޖާސޫސީ އިދާރާ (ސީއައިއޭ)އާ ދެމެދު ވާހަކަތަކެއް ދެކެވިފައިވާ ކަމުގައެވެ. ނަމަވެސް، އީރާންގެ ޖާސޫސީ ވުޒާރާއިން ވަނީ އެ ކަން ދޮގުކޮށްފައެވެ. އަދި، އެއީ ޙަޤީޤަތާ ޚިލާފު، ނަފުސާނީ ހަނގުރާމައިގެ އުކުޅެއްގެ ގޮތުގައި ސިފަކޮށްފައެވެ.