މިދިޔަ އަހަރު 363 ބޭސް ރަޖިސްޓްރީކޮށްދިން

މިދިޔަ އަހަރު 363 ބޭސް ރަޖިސްޓްރީކޮށްދީފައިވާކަމަށް މޯލްޑިވްސް ފުޑް އެންޑް ޑްރަގް އޮޓޯރިޓީގެ ތަފާސްހިސާބުތަކުން ދައްކައިފިއެވެ. މިދިޔަ އަހަރުވެސް ގިނަ އަދަދެއްގެ ޑޮކްޓަރީ ބޭސް ރަޖިސްޓްރީކުރުމަށް އެ އޮޓޯރިޓީއަށް ވަނީ ހުށައަޅާފައެވެ.

މޯލްޑިވްސް ފުޑް އެންޑް ޑްރަގް އޮޓޯރިޓީއިން އާންމުކޮށްފައިވާ ތަފާސްހިސާބުތައް ދައްކާގޮތުން މިދިޔަ އަހަރު މުޅި ޖުމްލަ 594 ބޭސް ވަނީ ރަޖިސްޓްރީކުރުމަށް ހުށައަޅާފައެވެ. މީގެތެރެއިން ރަޖިސްޓްރީކޮށްދީފައިވަނީ 363 ބޭހެކެވެ. އަދި 231 ބޭހެއް ރިޖެކްޓް ކުރެވިފައިވާކަމަށް އެ ވުޒާރާގެ ތަފާސްހިސާބުތަކުން ދައްކައެވެ.

ޑޮކްޓަރީ ބޭސް ރަޖިސްޓްރީކުރުމުގެ ހުއްދަދޭއިރު ޑޮކްޓަރީ ބޭސް ވިއްކުމުގެ ހުއްދަވެސް އެ އޮޓޯރިޓީން ދަނީ ކުރަމުންނެވެ. އެގޮތުން މުޅިން އަލަށް މާލެ ސަރަހައްދުގައި 33 ފާމަސީއެއް ވަނީ ރަޖިސްޓްރީކޮށްފައެވެ. އަދި އަތޮޅުތެރޭގައި 36 ފާމަސީއެއް ރަޖިސްޓްރީކޮށްފައިވެއެވެ.

މިދިޔަ އަހަރުގެ ތެރޭގައި ފާމަސީތަކަށް ދޫކޮށްފައިވާ ހުއްދަތައްވެސް އެކިއެކި ސަބަބުތަކާއިހެދި ވަނީ ބާތިލްކޮށްފައެވެ. އެގޮތުން މިދިޔަ އަހަރުގެ ތެރޭގައި މާލެ ސަރަހައްދުގައި 15 ފާމަސީއެއްގެ ހުއްދަ ވަނީ ބާތިލްކޮށްފައެވެ. އަދި އަތޮޅުތެރޭގައި ހިންގަމުންދިޔަ 5 ފާމަސީއެއްގެ ހުއްދަ ވަނީ ބާތިލްކޮށްފައެވެ.
މިދިޔަ އަހަރުގެ ތެރޭގައި ޑޮކްޓަރީ ބޭސް އިމްޕޯޓްކޮށް ގުދަންކުރުމުގެ ހުއްދަ މުޅިން އަލަށް 15 ފަރާތަކަށް ވަނީ ދީފައެވެ. އަދި 30 ފަރާތަކަށް ދޫކޮށްފައިވާ ހުއްދަ ބާތިލްކޮށްފައިވެއެވެ.

ބޭސްދޫކުރުމަށްޓަކައި މިދިޔަ އަހަރުގެ ތެރޭގައި މުޅިން ޖުމަލް 106 ފާމަސިސްޓުންނަށް ވަނީ ހުއްދަ ދީފައެވެ. އެމްއެފްޑީއޭއިން ދަނީ ފާމަސީތައް އިންސްޕެކްޓްވެސް ކުރަމުންނެވެ. އެގޮތުން މިދިޔަ އަހަރުގެ ތެރޭގައި 490 އިންސްޕެކްޝަން ވަނީ ކުރިއަށްގެންގޮސްފައެވެ.

އެގޮތުން މުޅިން އަލަށް 61 ތަނެއް ވަނީ ރަޖިސްޓްރީކޮށްފައެވެ. 163 ތަނެއްގެ ހުއްދަ އައުކޮށްފައިވެއެވެ. އެމްއެފްޑީއޭއިން މިދިޔަ އަހަރުގެ ތެރޭގައި 199 ރޫޓިން އިންސްޕެކްޝަން ކޮށްފައިވާއިރު 52 ފޮލޯއަޕް އިންސްޕެކްޝަން ކޮށްފައިވާކަމަށް އެ އިދާރާގެ ތަފާސްހިސާބުތަކުން ދައްކައެވެ.

ނޭޝަނަލް ހެލްތް ލެބޯޓަރީއިން މިދިޔަ އަހަރު މުޅި ޖުމްލަ 7314 ތަހުލީލެއްކޮށްފައިވެއެވެ. މީގެތެރޭގައި މައިކްރޮބަޔޮލޮޖީ 4،636 ތަހުލީލާއި، 2678 ކެމިސްޓްރީ ތަހުލީލު ހިމެނެއެވެ.

ނަގަންޖެހޭ ހުއްދަ ނުނަގައި ބޭސް އެތެރެކޮށް ވިއްކާ މައްސަލައަކީ ދޭތެރެދޭތެރެއިން އަޑުއިވޭ ވާހަކައެކެވެ. ހުއްދަ ނުނަގާ ބޭސް ވިއްކާ އަދި އިޝްތިހާރުކުރާ ފަރާތްތަކާ މެދު ފިޔަވަޅު އަޅާނެ ކަމަށް އެމްއެފްޑީއޭއިން މީގެކުރިން ވަނީ ވިދާޅުވެފައެވެ.