ޤައުމިއްޔަތުގެ ފުރާނައަކީ ދިވެހި ބަސް
-
މާރިޗު 6 ފާހަގަކުރަނީ ޤައުމިއްޔަތު ދިރުވާ އާލާކުރާ ދުވަހުގެ ގޮތުގައި
-
ބަހަށް އަހުލުވެރިން ތިލަވިވަރަކަށް ވިސްނުންތައް ކޮށިވޭ
ދިވެހި ޤައުމިއްޔަތު ދިރުވާ އާލާކުރާ ދުވަސް ފާހަގަކުރަން ފެށީ 2018ވަނަ އަހަރުއެވެ. މި ދުވަސް ފާހަގަކުރަނީ ކޮންމެ އަހަރެއްގެ ވެސް މާރިޗު މަހުގެ 6 ވަނަ ދުވަހުއެވެ. މި ދުވަސް ފާހަގަކުރަނީ ދިވެހިންގެ ޤައުމިއްޔަތާ ގުޅުންހުރި އެކި ބަހާތައް ދިރުވައި އާލާކުރުމުގެ ޢަޒުމް އައުކުރުމަށެވެ.
ޤައުމިއްޔަތެއް އުފެދިގެން އަންނަނީ ބަޔަކު އެއްތަނެއްގައި އުޅެން ފެށުމުން އެބައެއްގެ މެދުގައި ވަކި ބަހެއް އަދި ދައުލަތެއް އުފެދިގެން އައުމުންނެވެ. ޤައުމިއްޔަތެއްގައި އެންމެ މުހިންމު އެއް ރުކުނަކީ ބަހެވެ. އެބައެއްގެ ވިސްނުން ކަނޑައަޅައިދޭ އެއްޗަކީ އެބައެއްގެ ބަހެވެ. އެހެންކަމުން ގައުމިއްޔަތެއް ސަލާމަތްކުރުމުގައިވެސް ބަސް މުހިންމު ދައުރެއް އަދާކުރެއެވެ.
ދިވެހި ޤައުމިއްޔަތުގެ މަދަކީ މާތްވެގެންވާ އިސްލާމްދީނެވެ. ދީން ޤައުމިއްޔަތުގައި އަދާކުރާ ދައުރަކީ ބަޔަކު ހެޔޮނުބައި ކަނޑައަޅާ މިންގަނޑަކީ އެއީކަމަށް ވާތީއެވެ.
ޤައުމިއްޔަތަކީ ދައުލަތެއް ދެމިއޮތުގައި ވަރަށް މުހިންމު ދައުރެއް އަދާކުރާ އެއްޗެކެވެ. ޤައުމިއްޔަތަކީ ދައުލަތެއްގެ ފުރާނައެވެ. ދައުލަތްތައް ވަރުގަދަކުރުމަށްޓަކައި އެންމެ ބޮޑު އިސްކަމެއް ދޭންޖެހެނީ އެބައެއްގެ މާދަރީ ބަހަށެވެ.
މިޒަމާނުގެ ހޯދުންތަކުން އެނގޭ ގޮތުގައި މާދަރީ ބަހުން ވާހަކަދައްކާއިރު އޭނާ ވިސްނާގޮތް އެހެން ބަހަކުން ވާހަކަދެއްކުމަށްވުރެ ތަފާތެވެ. ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް ވިދާޅުވީ، ދިވެހި ޤައުމިއްޔަތުގެ ފުރާނައަކީ ދިވެހި ބަސްކަމަށެވެ.
ބަސް ދިރުވާ އާލާކުރެވޭނީ ގޭތެރެއިންކަމަށް ވަޒީރު ވިދާޅުވިއެވެ. އެގޮތުން ކޮންމެ ގެއަކީވެސް ދިވެހި ބަހުން އެ ގެއެއްގެ ކުޑަކުދިންނާއި ވާހަކަދެކެވޭ ގެއަކަށް ހެދުމަށް ވަޒީރު ވަނީ އިލްތިމާސްކުރައްވާފައެވެ. ދިވެހި ޤައުމާއި، ދީނާއި، ސަލާމަތާއި ރައްކާތެރިކަން ނެގެހެއްޓުމުގައި ބައިވެރިވާނެ ދިވެހި މުޖްތަމައުއެއް ބިނާކުރެވޭނީ އެއިރުންކަމަށް ވަޒީރު ވިދާޅުވިއެވެ.
"ދިވެހި ޤައުމިއްޔަތުގެ ފުރާނައަކަށް ވާނީ ކޯއްޗެއްތޯ؟ ގައުމިއްޔަތެއްގެ ފުރާނައަކީ އެބައެއްވެސް ބަސް. ބަސް ރަނގަޅަށް ދޭހަވީމަ ދީންވެސް ރަނގަޅަށް ދޭހަވަނީ. ބަސް ރަނގަޅަށް ދޭހަވެ މުޖްތަމައުއަށް އިހްތިރާމްކުރާ މުޖްތަމައުއެއް އުފެދުނީމަ ޤާނޫނަށް އިހްތިރާމްކުރާ މުޖްތަމައުއެއްވެސް އުފެދެނީ. އެހެންވީމަ ދުނިޔޭގައި ބަހަށް އެހާބޮޑު ޚާއްސަ ސަމާލުކަމެއްދެނީ. މިކަމާއި ގުޅޭ އެތައް ދިރާސާއެއް އެބަހުރި ހެދިފައި. ބަސް ރަނގަޅަށް ދޭހަވުމާއި އިޖްތިމާއީ ހަމަޖެހުމާއި އޮތް ގުޅުމުގެ މައްޗަށް." ވަޒީރު ވިދާޅުވިއެވެ.
ބަހަވީ އިސްތިއުމާރަކީ މިހާރު ވަރަށް އާންމުވަމުން އަންނަކަމެކެވެ. އަމިއްލަ މާދަރީ ބަހަށްވުރެ އެހެން ބަސްބަސް ގަދަވެއެވެ. މީގެ ސަބަބުން ދައުލަތައް އަސަރުކުރެއެވެ. ބަހަށް އަހުލުވެރިން ތިލަވިވަރަކަށް ވިސްނުންތައް ކޮށިވެއެވެ. މިހެން ވުމުން އެ ގައުމަކާއި ގުޅިފައިވާ މައްސަލަތަކަށް ފުންކޮށް ވިސްނަން އެނގޭ މީހުން މަދުވެއެވެ. އަދި އޭގެ ސަބަބުން ގައުމުގެ ސަލާމަތާއި، ދިފާއާއި މުސްތަޤްބަލަށް ގޮތް ކަނޑައެޅުމުގައި އެމީހުން ނުކުޅެދެއެވެ. މިއީ ދިވެހި ގައުމިއްޔަތު ދިރުވާ އާލާކުރުމުގެ ދުވަހުގައި ވިސްނާލުން މުހިންމު ކަމެކެވެ.