ލުބުނާނުގެ ޙިޒްބުاللهގެ ޚާއްޞަ އަސްކަރީ ފައުޖެއް ދެކުނު ލުބުނާނަށް ފޮނުވައިިފިއެވެ.
2024ވަނަ އަހަރުގެ ތެރޭގައި ޙިޒްބުاللهއާއި ޔަހޫދީންނާ ދެމެދު ވަރުގަދަ ހަނގުރާމައެއް ކޮށްފައިވެއެވެ. އެ ހަނގުރާމަ ނިމުމަކަށް އައީ އެ އަހަރުގެ ނޮވެމްބަރު މަހުގެ ތެރޭގައި އެމެރިކާ މެދުވެރިވެ ޤާއިމުކުރި ޙަމަލާ ބަދަލުކުރުން ހުއްޓައިލުމުގެ އެއްބަސްވުމެއްގެ ދަށުންނެވެ. އެ އެއްބަސްވުމުގައި ޔަހޫދީ ފައުޖު ލުބުނާނުން ފޭބުމާއި ޙިޒްބުاللهގެ ހަނގުރާމަވެރިން ލިތާނީ ކޯރުގެ އުތުރަށް ބަދަލުކުރުމަށް ޝަރުތުކޮށްފައިވެއެވެ. އެ ޝަރުތުތަކާ އެއްގޮތަށް ޙިޒްބުاللهގެ ހަނގުރާމަވެރިން އޭރު ވަނީ ދެކުނު ލުބުނާނުން ފައިބައިފައެވެ.
ނަމަވެސް ހުސްވި ފެބްރުއަރީ މަހުގެ 28ވަނަ ދުވަހު ޔަހޫދީންނާ ގުޅިގެން އެމެރިކާއިން އީރާނަށް ޙަމަލާ ދޭން ފަށައި، އެޙަމަލާތަކުގައި އީރާނުގެ ރޫޙީ ވެރިޔާ އާޔަތުالله ޢަލީ ޚާމަނާއީ ވަނީ އަވަހާކޮށްލައިފައެވެ. އެއާއެކު މާރިޗު މަހުގެ 2ވަނަ ދުވަހު އީރާނާ ގާތް ގުޅުމެއް ބާއްވާ ޙިޒްބުاللهއިން ވަނީ އެ ހަނގުރާމައަށް ވަދެ، ޔަހޫދީންނަށް ޙަމަލާ ދޭން ފަށައިފައެވެ. ޙިޒްބުاللهއިން ފުރަތަމަ ދިން މިސައިލް ޙަމަލާ ދީފައި ވަނީ ލިތާނީ ކޯރުގެ އުތުރުންނެވެ. ޔަހޫދީން ވެސް ވަނީ ލުބުނާނުގެ ދެކުނަށާއި އެހެން ސަރަޙައްދުތަކަށް ވަރުގަދަ ޙަމަލާތައް ދޭން ފަަށައި، ސަރަޙައްދީ ރޮނގު ހުރަސްކޮށް ލުބުނާނަށް ސިފައިން ފޮނުވައިފައެވެ.
އެނގިފައިވާ ގޮތުގައި ޙިޒްބުاللهގެ ޚާއްޞަ ފައުޖެއް ކަމަށްވާ ރަޟްވާން ފައުޖުގެ ސިފައިންނަށް މިހާރު ވަނީ ހަނގުރާމައިގައި ބައިވެރިވެ ޔަހޫދީންގެ ޙަމަލާތަކުން ދިފާޢުވުމަށް ޢަމުރުކޮށްފައެވެ. ޔަހޫދީ ސިފައިން ޙަރަކާތްތެރިވަމުންދާ ލުބުނާނުގެ ސަރަޙައްދެއް ކަމަށްވާ ޚިޔާމް ކިޔާ އަވަށެއް ހިމެނޭ ގޮތަށް އެކި ސަރަޙައްދުތަކަށް ރަޟްވާން ފައުޖުގެ ސިފައިން ދަނީ އެއްކުރަމުންނެވެ.
ޙިޒްބުاللهގެ އިސްވެރިޔާ، ނަޢީމް ޤާސިމް ވިދާޅުވީ ތަނެއް އިސްތިޢުމާރުކޮށް އެ ތަނެއްގައި ފައިހިއްޕާލުމަށް ޔަހޫދީން ކުރަމުންދާ މަސައްކަތާ ދެކޮޅަށް ޙިޒްބުاللهއިން މަސައްކަތް ކުރާނެ ކަމަށެެވެ. އަދި ޙިޒްބުاللهއިން ކުރަމުންދާ މަސައްކަތަކީ އަމިއްލަ ދިފާޢުައަށް ކޮންމެހެން ކުރަން ޖެހޭ މަސައްކަތެއް ކަމަށް ވެސް އޭނާ ވިދާޅުވިއެވެ.
ހަނގުރާމައަށް ނިކުތުމަށް އަމުރުކޮށްފައި ވަނީ ޙިޒްބުاللهގެ ޚާއްޞަ ފައުޖުގެ ކިތައް ސިފައިންނަށް ކަމެއް ސާފެއް ނުވެއެވެ.