ޔަހޫދީންނާ ގުޅިގެން އެމެރިކާއިން އީރާނަށް ޙަމަލާ ދޭން ފެށި ފަހުން ގަލްފް ސަރަޙައްދުގައި ޙަރަކާތްތެރިވަމުންދާ ތެޔޮ ޓޭންކަރުތަކަށް އަމާޒުވަމުން ފެށި ޙަމަލާތައް އަނެއްކާ ވެސް އިތުރުވެއްޖެއެވެ.
ފާއިތުވި 24 ގަޑިއިރުގެ ތެރޭގައި އީރާނުން ވަނީ ޢިރާޤުގެ ޚޫރުއްޒުބައިރު ބަންދަރުގައި އަޅާފައި އޮތް ބަހާމަސް ދިދަ ޖަހާފައިވާ ޓޭންކަރަކަށް، ގޮވާތަކެތި ބަރާކޮށްފައި އޮތް ބޯޓެއް ރިމޯޓު ބޭނުންކޮށްގެން ގޮއްވާލައި ޙަމަލާ ދީފައެވެ. ކުވައިތުގެ ބޭރުގައި އަޅާފައި އޮތް ޓޭންކަރަކަށް ވެސް ޙަމަލާއެއް އަމާޒުވެ، އެ ޓޭންކަރުގައި ގޮވުމެއް ގޮވާފައިވެއެވެ. ފެބްރުއަރީ މަހުގެ 28ވަނަ ދުވަހު ހަނގުރާމަ ފެށުމު ފަހުން މިހާތަނަށް 9 ޓޭންކަރަކަށް ޙަމަލާ އަމާޒުވެފައިވެއެވެ.
ޙަމަލާތަކާ ގުޅިގެން އީރާނުން ވަނީ ދުނިޔޭގެ އެކި ސަރަޙައްދުތަކަށް ތެލާއި ގޭސް ފޯރުކޮށްދިނުމަށް ބޭނުންކުރާ މައި އެއް މަގު ކަމަށްވާ ހުރުމުޒް ކަނޑުއޮޅި އުޅަނދުތަކަށް ބޭނުން ނުކުރެވޭނެ ކަމަށް ބުނެފައެވެ. އޭގެ ސަބަބުން އެ ސަރަޙައްދުގައި މިހާރު ވެސް 200އަށްވުރެ ގިނަ އުޅަނދު ވަނީ ތާށިވެފައެވެ.
މެދުއިރުމަތީގެ ހަމަނުޖެހުމުގެ ސަބަބުން ބައިނަލްއަޤްވާމީ ހަކަތައިގެ ބާޒާރުތަކަށް ވެސް ދަނީ އަސަރުކުރަމުންނެވެ. އެ ގޮތުން ގަލްފުގެ ގިނަ ޤައުމުތަކެއްގެ ތެޔޮ ދަނޑުތަކުގައި މަސައްކަތް ކުރާ މުވައްޒަފުން އެހެން ސަރަޙައްދުތަކަށް ގެންދިޔުމަށާއި ތެޔޮ ރިފައިނަރީގެ މަސްކަތްތައް މަޑުޖައްސައިލުމަށް ކުންފުނިތަކަށް ވަނީ މަޖުބޫރުވެފައެވެ. މަޝްހޫރު ތެޔޮ ކުންފުންޏެއް ކަމަށްވާ ބީޕީއިން ވަނީ ޢިރާޤުގެ ރުމައިލާ ތެޔޮ ދަނޑަށް ގޮތް ނޭނގޭ ޑްރޯންތަކެއް ޖެއްސުމުން އެ ދަނޑުގައި މަސައްކަތްކުރާ އެ ކުންފުނީގެ ބޭރު މުވައްޒަފުން އެ ތަނުން ހުސްކޮށްފައެވެ. ޢިރާޤުން ވެސް ވަނީ އެ ޤައުމުގައި އުފައްދާ ތެލުގެ ނިސްބަތް ގާތްގަނޑަކަށް 1.5 ބިލިޔަން ފީފާއިން މަދުކޮށްފައެވެ. އެއީ ޓޭންކަރުތަކަށް ތެޔޮ ފީފާތައް ބަރު ނުކުރެވި، ޖާގައިގެ ދަތިކަން ކުރިމަތިވުމާ ގުޅިގެންނެވެ. އޭގެ އިތުރުން ކުވައިތުގައި ހުންނަ ރިފައިނަރީއެއް ވެސް ވަނީ ބަންދުކޮށްފައެވެ. ކުވައިތުގެ އިތުރު ރިފައިނަރީއަކާއި ބަޙްރައިންގެ ތެޔޮ ކާރުޚާނާއަކުން ވެސް ވަނީ ތެޔޮ އުފައްދާ މިންވަރު މަދުކޮށްފައެވެ.
ތެޔޮ ލިބުމުގައި ދަތިތައް ކުރިމަތިވެދާނެ ކަމުގެ ބިރު ހީވެފައިވާއިރު، ތެލާއި ގޭހުގެ އަގުތައް ދަނީ އުފުލެމުންނެވެ. ހަނގުރާމަ ފެށުނު ފަހުން ސާފުނުކުރާ ތެލުގެ އަގު ވަނީ 16 އިންސައްތައަށް އިތުރުވެފައެވެ. މި ހަފްތާގެ ތެރޭގައި ވިލާތުގެ ގޭސް އަގުތައް ވެސް ވަނީ ގާތްގަނޑަކަށް 60 އިންސައްތައަށް އިތުރުވެފައެވެ.