އެމެރިކާއާއި ޔަހޫދީން ގުޅިގެން އީރާނަށް ދެމުންދާ ޙަމަލާތަކުގެ ސަބަބުން ބައިނަލްއަޤްވާމީ ހަކަތައިގެ ބާޒާރަށް ނޭދެވޭ ބޮޑެތި އަސަރުތައް ދަނީ ކުރަމުންނެވެ. އީރާނުން ރައްދުގައި ވަރުގަދަ ޙަމަލާތައް ދެމުންދާއިރު، މިހާރު ވެސް ހަފްތާއަކަށް ދެމިގެން ގޮސްފައިވާ ހަނގުރާމައިގެ ސަބަބުން، ހަނގުރާމަ ނިމުމަކަށް އައުމުން ވެސް ހަކަތައިގެ ދާއިރާއަށް ކޮށްފައިވާ ނޭދެވޭ އަސަރު ގިނަ ދުވަސްތަކަކަށް ދެމިގެން ދިޔުމުގެ ފުރުޞަތު ވަނީ އިތުރުވެފައެވެ.
ދުނިޔޭގެ އެކި ސަރަޙައްދުތަކަށް ފޯރުކޮށްދޭ ސާފުނުކުރާ ތެލާއި ގުދުރަތީ ގޭހުގެ ސަޕްލައިގެ ފަސްބައި ކުޅަ އެއްބައި އެއް ސަރަޙައްދުން އަނެއް ސަރަޙައްދަށް ގެންދިޔުމަށް ހަނގުރާމައިގެ ސަބަބުން ވަނީ ހުރަސްތައް ކުރިމަތިވެފައެވެ. އޭގެ ސަބަބުތަކުގެ ތެރޭގައި އެ ތަކެތި އުފުލާ ކަނޑުގެ މަގުތަކަށް ހުރަސްއެޅިފައި ވުމާއި ތެލާއި ގޭސް އުފައްދާ މަރުކަޒުތަކަށް ޙަމަލާތައް އަމާޒުވުން ހިމެނެއެވެ.
އީރާންއާއި ޢުމާންއާ ދެމެދު އޮންނަ ހުރުމުުޒް ކަނޑުއޮޅިއަކީ ދުނިޔޭގެ އެކި ކަންކޮޅުތަކަށް ތެލާއި ގޭސް ފޯރުކޮށްދިނުމަށް ބޭނުންކުރާ މައިގަނޑު އެއް މަގެވެ. އެ މަގުން އުޅަނދުތަކަށް ދަތުރު ނުކުރެވޭނެ ކަމަށާއި، ހުރުމުޒް ކަނޑުއޮޅި ހުރަސްކުރާ އުޅަނދުފަހަރަށް ޙަމަލާ ދޭނެ ކަމުގެ އިންޒާރު އީރާނުން ދަނީ ދެމުންނެވެ. އެ ސަރަޙައްދުގައި ގިނަ ޢަދަދެއްގެ ތެޔޮ ޓޭންކަރުތައް ތާށިވެ، ހަނގުރާމަ ފެށިފަހުން ފާއިތުވެފައި މި ވާ ހަފްތާއެއްހާ ދުވަހުގެ ތެރޭގައި ދުނިޔޭގެ ބާޒާރުގައި ތެލުގެ އަގު ވަނީ 25 އިންސައްތަ އިތުރުވެފައެވެ. ތެޔޮ ފީފާއެއް މިހާރު ގަންނަން ލިބެނީ 90 އެމެރިކާ ޑޮލަރަށެވެ.
ހުރްމުޒް ކަނޑިއޮޅި އެއްކޮށްހެން ބަންދުވުމުގެ ސަބަބުން ތެޔޮ އުފައްދާ ގަލްފުގެ މައި ޤައުމުތައް ކަމަށްވާ ސަޢުދީ ޢަރަބިއްޔާއާއި އެކުވެރި ޢަރަބި އިމާރާތާއި ޢިރާޤްއާއި ކުވައިތަށް ވަނީ ގާތްގަނޑަކަށް 140 މިލިޔަން ފީފާގެ ތެޔޮ އެކްސްޕޯޓު ނުކުރެވި މަޑުޖައްސައިލަން ޖެހިފައެވެ. އެއީ ގާތްގަނޑަކަށް 1.4 ދުވަހަށް ދުނިޔެއަށް ބޭނުންވާ ތެލުގެ މިންވަރެވެ. އެއާއެކު މެދުއިރުމަތީގައި ހުރި ތެޔޮ މަރުކަޒުތަކުގެ ތެލާއި ގޭސް ގުދަންތައް ވަނީ ފުރިފައެވެ. ޢިރާޤުއާއި ކުވައިތަށް ވަނީ ތެޔޮ އުފައްދާ މިންވަރު މަދުކޮށްލުމަށް މަޖުބޫރުވެފައެވެ. ކުރިއަށް އޮތް ދުވަސްތަކުގައި ޔޫއޭއީއިން ވެސް އެ ގޮތަށް ޢަމަލުކުރާނެ ކަމަށް ބެލެވެއެވެ. މަސްރަހު ދިރާސާކުރާ މާހިރުން ވިދާޅުވީ އުޅަނދުތަކަށް މަންޒިލާ ހަމައަށް ދިޔުމަށް ދަތިތައް ކުރިމަތިވާނަމަ ގަލްފުގެ ހުރިހާ ޤައުމެެއްގެ ތެޔޮ މަރުކަޒުތަކުގައި ތެޔޮ އުފައްދާ މިންވަރު މަދު ކުރުމަށް މަޖުބޫރުވާނެ ކަމަށެވެ.
ހަނގުރާމައިގެ ޙާލަތުގައި މެދުއިރުމަތީގެ ބައެއް ތެޔޮ ދަނޑުތަކަށް ޙަމަލާތައް އަމާޒުވެ، އެ މަރުކަޒުތައް ވަގުތީ ގޮތުން ބަންދުކޮށްފައިވާއިރު، އެ ތެޔޮ ދަނޑިތައް އަލުން ހުޅުވާލައި ކުރިއެކޭ އެއްގޮތަށް މަސައްކަތް ފެށުމަށް ގިނަ ދުވަސްތަކެއް ނެގުން ވެސް އެކަށީގެންވެއެވެ. ހަނގުރާމަ ނިމުމަކަށް އައި ނަމަވެސް، ގެއްލުން ލިބޭ ތަންތަން މަރާމާތު ކުރުމަށް އެތައް މަހެއް ނެގުން ވެސް އެކަށީގެންވެއެވެ. ހަނގުރާމައިގެ ކުރީގައި ހުރި އަގުތަކަށް ތެލާއި ގޭހުގެ އަގު ދަށް ވުމަށް ވެސް ވަގުތު ނަގާނެ ކަމަށް ބެލެވެއެވެ.
މި ޙާލަތުގައި އިންޑިޔާއާއި ޗައިނާއާއި ތަައިލެންޑު ފަދަ ޤައުމުތަކުން ވެސް ދަނީ ދެމެހެއްޓެނެވި ގޮތެއްގައި ތެޔޮ ލިބޭނެ މަގެެއް ކަށަވަރު ކުރުމުގައި ދަތިތަކާ ކުރިމަތިލަމުންނެވެ. އޭޝިޔާއަށް އެތެރެކުރާ ތެލުގެ 60 އިންސައްތައަކީ މެދުއިރުމަތިން ގެންނަ ތެލެވެ. މެދުއިރުމަތިން ތެޔޮ ލިބުމުގައި ހުރަސްތައް ކުރިމަތިވެފައިވާއިރު، ރަޝިޔާގެ ތެލަށް އޮތް ޑިމާންޑު މިހާރު ދަނީ އިތުރުވަމުންނެވެ. އެހެންކަމުން ހަނގުރާމައިގެ ޙާލަތުގައި އޮތް ރަޝިޔާއަށް އީރާނު ހަނގުރާމައިގެ ސަބަބުން ދަނީ ފައިދާ ކުރަމުންނެވެ.
އެމެރިކާގައި ވެސް ތެލުގެ އަގުތައް ދަނީ އުފުލެމުންނެވެ. އިޤްތިޞާދީ ކަންބޮޑުވުންތައް އިތުރުވެފައި މި ވަނީ މި އަހަރުގެ ނޮވެމްބަރު މަހުގެ ތެރޭގައި އެމެރިކާގެ މެދު ދައުރުގެ އިންތިޚާބު ބޭއްވުމަށް ތައްޔާރުވަމުންދާ ދަނޑިވަޅެއްގައެވެ. އީރާނު ހަނގުރާމައިގެ ސަބަބުން އެ އިންތިޚާބުގައި އެ ޤައުމުގެ ރައީސް ޑޮނަލްޑް ޓްރަމްޕްގެ ސަރުކާރަށް ނާކާމިޔާބީއާ ކުރިމަތިލާން ޖެހުމުގެ ފުރުޞަތު ބޮޑެވެ.