ޔަހޫދީންނާއި އެމެރިކާ ގުޅިގެން އީރާނާ ދެކޮޅަށް އިސްވެ ފަށާފައިވާ ހަނގުރާމައިގެ ދަށުން ދެމުންދާ ޙަމަލާތަކަށް ރައްދުދިނުމުގެ ގޮތުން، އީރާނުން ސަޢޫދީ ޢަރަބިއްޔާއާއި ކުވަޔިތުގައި ހުރި އެމެރިކާގެ އަސްކަރީ އަދި މަދަނީ މަރުކަޒުތަކަށް އަމާޒުކޮށް ވަރުގަދަ ހަމަލާތަކެއް ދީފިއެވެ. އީރާނުން ބުނީ، މިއީ ގަލްފާއި ޢަރަބި ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކާއި އެމެރިކާގެ މަސްލަޙަތުތަކަށް އަމާޒުކޮށް ދެމުންދާ ޙަމަލާތަކެއް ކަމުގައެވެ. ޔަހޫދީންނާއި އެމެރިކާއިން އީރާނާ ދެކޮޅަށް ހަނގުރާމަ ފެށީ ފެބުރުވަރީ 28 ވަނަ ދުވަހުއެވެ.
ސަޢޫދީ ޢަރަބިއްޔާގެ ދިފާޢީ ވުޒާރާއިން ބުނީ، ވެރިރަށް ރިޔާޟަށް އަމާޒުކޮށް ފޮނުވައިލި ތިން އަސްކަރީ ޑްރޯން ދިފާޢުކޮށް، ވައްޓައިލާފައިވާނެ ކަމުގައެވެ. މިއީ، ރިޔާޟުގައި ބޭރު ޤައުމުތަކުގެ އެމްބަސީތައް ހުންނަ ސަރަޙައްދަށް އަމާޒުކޮށްދިން ޙަމަލާތަކެއް ހުއްޓުވައި، 15 އަށްވުރެ ގިނަ ޑްރޯން ވައްޓާލިތާ ކުޑަ ވަގުތުކޮޅެއް ފަހުން ހިނގި ހާދިސާތަކެކެވެ. ހަމައެއާއެކު، ކުވަޔިތުން ވެސް ވަނީ އެ ޤައުމުގެ ވައިގެ ދިފާޢީ ނިޒާމު ބޭނުންކޮށް އެ ޤައުމަށް އަމާޒުކޮށް ފޮނުވައިލާފައިވާ ބެލިސްޓިކް މިސައިލެއް ދިފާޢުކޮށްފައެވެ. ނަމަވެސް، ކުވަޔިތުގެ ބައިނަލްއަޤުވާމީ އެއާޕޯޓުގެ ތެޔޮ ރައްކާކުރާ ގުދަނަށާއި، ޕަބްލިކް އިންސްޓިޓިއުޝަން ފޯ ސޯޝަލް ސެކިއުރިޓީގެ މައި އިމާރާތަށް ވަނީ ޑްރޯން ޙަމަލާތަކެއް އަރާފައެވެ. އެ ޙަމަލާތަކާ ގުޅިގެން ރޯވެފައިވާ އަލިފާންގަނޑުތައް ނިއްވުމަށް އެ ޤައުމުގެ އަލިފާން ނިއްވާ އިދާރާއިން ދަނީ މަސައްކަތް ކުރަމުންނެވެ.
އީރާނާ ދެކޮޅަށް ފަށާފައިވާ ހަނގުރާމައާ މެދު އެމެރިކާގެ ސަރުކާރާއި ރައީސް ޑޮނަލްޑް ޓްރަމްޕް ދައްކަވަމުން ގެންދަވަނީ ތަފާތު ވާހަކަތަކެކެވެ. ވައިޓް ހައުސްއިން ބުނީ، މި ހަނގުރާމަ ހަތަރަކާއި ހަ ހަފުތާއާ ދެމެދުގެ މުއްދަތަކަށް ދެމިގެން ހިނގައިދާނެއެވެ. ނަމަވެސް، އެމެރިކާގެ ދިފާޢީ އިދާރާ، ޕެންޓަގަނުން ވަނީ ހަނގުރާމަ ދެމިގެން ހިނގައިދާނެ ކަމަށް ބެލެވޭ މުއްދަތު އަންދާޒާ ކޮށްދިނުމަށް އިންކާރު ކުރަމުންނެވެ. ޓްރަމްޕް ވަނީ ހަނގުރާމަ ކުރިއަށް ގެންދިއުމަށް ޓަކައި ހަތިޔާރު އުފައްދާ މިންވަރު ހަތަރު ގުނައަށް އިތުރުކުރުމަށް އަމުރުކުރައްވާފައެވެ. 'އޮޕަރޭޝަން އެޕިކް ފިއުރީ'ގެ ނަމުގައި ކުރިއަށްގެންދާ މި ހަނގުރާމައިގެ ފުރަތަމަ 100 ގަޑިއިރުގެ ތެރޭގައި އެކަނިވެސް އެމެރިކާއިން އަސްކަރިއްޔާއަށާއި ހަތިޔާރަށް 3.7 ބިލިޔަން އެމެރިކާ ޑޮލަރު ޚަރަދު ކޮށްފައިވެއެވެ.
އިނގިރޭސިވިލާތުން ވެސް ވަނީ ހަނގުރާމައިގައި އެމެރިކާއާއި ޔަހޫދީންނާ ބައިވެރިވާން ފަށާފައެވެ. މި ގޮތުން، އިނގިރޭސިވިލާތުގެ ބޮޑުވަޒީރު ކީރް ސްޓާމަރ ވަނީ ސަޢޫދީ ޢަރަބިއްޔާގެ ވަލީއަޙުދު މުޙައްމަދު ބިން ސަލްމާނަށް ފޯނުން ގުޅުއްވައި، ސަޢޫދީ ޢަރަބިއްޔާގެ ދިފާޢުގައި އެހީތެރިކަން ފޯރުކޮށްދިނުމަށް އިނގިރޭސިވިލާތުގެ އަސްކަރީ މަތިންދާބޯޓުތަކާއި ހެލިކޮޕްޓަރުތަކުގެ އިތުރުން ޑިސްޓްރޯޔަރ މަރުކާގެ މަނަވަރުތައް ފޮނުވައިދޭނެ ކަމުގެ ޔަގީންކަން ދެއްވާފައެވެ. މީގެ އިތުރުން ޤަޠަރުގައި ހުރި އެމެރިކާގެ މަރުކަޒުތަކަށް އެހީތެރިވުމަށް އިނގިރޭސިވިލާތުގެ ޓައިފޫން މަރުކާގެ އަސްކަރީ މަތިންދާބޯޓުތައް މިހާރު ވެސް ވަނީ ފޮނުވަން ފަށާފައެވެ.
ޔަހޫދީންނާއި އެމެރިކާއިން ގުޅިގެން މީގެ ހަފުތާއެއްހާ ދުވަސް ކުރިން އީރާނާ ދެކޮޅަށް ފެށި ހަނގުރާމައިގައި ޝަހީދު ކޮށްލާފައިވާ މީހުންގެ އަދަދު ވަނީ 1,332 އަށް އުފުލިފައެވެ. އަދި، އެތަކެއް ހާސް ބަޔަކު ވަނީ ޒަޚަމު ކޮށްލާފައެވެ. ރައްދުގައި އީރާނުން ވެސް ވަނީ ޔަހޫދީ ދައުލަތުގެ ރަށްތަކަށް ޙަމަލާދީ، 11 މީހުން މަރައިލާފައެވެ. އަދި، ގަލްފާއި ޢަރަބި ޤައުމުތަކުގައި އޮތް އެމެރިކާ އަސްކަރީ މަރުކަޒުތަކަށް ޙަމަލާދީ، އެމެރިކާ ސިފައިންގެ ހަ މީހުން މަރައިލާފައެވެ. ޔަހޫދީން ދަނީ ލުބްނާނަށް ވެސް ނިރުބަވެރި ޙަމަލާތަކެއް ދެމުންނެވެ. އެ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 200 އަށް އުފުލިފައިވާ ކަމުގައި ލުބްނާންގެ އޮފިޝަލުން ބުންޏެވެ.