ޒުވާނުންނަށް ވަޒީފާއާއި ހުނަރުގެ ފުރުސަތު ފަހިކުރުމަށް 2 އެއްބަސްވުމެއް

ދިވެހި ޒުވާނުންނަށް ތަމްރީނާއި، ހުނަރު ތަރައްޤީކުރުމާއި، ވަޒީފާގެ ފުރުސަތުތައް އިތުރުކުރުމަށްޓަކައި މަތީ ތައުލީމާއި މަސައްކަތްތެރިކަމާއި ހުނަރުތައް ތަަރައްޤީކުރުމާއި ބެހޭ ވުޒާރާއިން 2 އެއްބަސްވުމެއް އެކުލަވާލައިފިއެވެ.

މި އެއްބަސްވުންތަކަކީ ރާއްޖޭގެ މަސައްކަތްތެރިކަން ހަރުދަނާކުރުމަށާއި، ޒުވާނުންނަށް ވަޒީފާގެ ފުރުސަތުތައް އިތުރުކުރުމަށާއި، ހުނަރު ތަރައްޤީކޮށް ކެރިއަރ ފުރުސަތުތައް ފަހިކޮށްދިނުމުގެ ތެރެއިން ޤައުމީ ތަރައްޤީއަށް އެހީތެރިވުމަށް އެޅުނު މުހިންމު ފިޔަވަޅެކެވެ.

މި އެއްބަސްވުންތަކުގެ ތެރެއިން "އޮކްޓޮޕަސް ސިސްޓަމްސް ޕްރައިވެޓް ލިމިޓެޑް"އާއެކު ވެވުނު އެއްބަސްވުމަކީ ބައިވެރިންނަށް މަސައްކަތުގެ މާހައުލުގައި ތަމްރީނާއި ވަޒީފާގެ ފުރުސަތުތައް ފަހިކޮށްދިނުމަށްޓަކައި އެޕްރެންޓިސްޝިޕް އަދި އިންޓާންޝިޕް ޕްރޮގްރާމްތަކަށް އަމާޒުކޮށްގެން ވެވުނު އެއްބަސްވުމެކެވެ. މިއެއްބަސްވުމުގެ ދަށުން، ތަމްރީނުވާ ފަރާތްތަކަށް ބޭނުންވާ މެންޓަޝިޕާއި، އިރުޝާދު އޮކްޓޮޕަސް ސިސްޓަމްސްއިން ފޯރުކޮށްދޭނެއެވެ.

މީގެ އިތުރުން، ރާއްޖޭގެ ޑިޖިޓަލް ފްރީލާންސަރ ޕްލެޓްފޯމެއް ކަމަށްވާ "ޓާސްކިން އެލްއެލްޕީ" އާއެކު ވެސް އެއްބަސްވުމެއްގައި ވަނީ ސޮއިކޮށްފައެވެ. މިއެއްބަސްވުމުގެ ދަށުން، ދެ ފަރާތުން ގުޅިގެން މަސައްކަތްކުރާނީ ހުނަރު އިތުރުކުރުމަށާއި ރާއްޖޭގައި ވަޒީފާގެ ފުރުސަތުތައް ކުރިއެރުވުމަށް ޚާއްސަ އިސްކަމެއް ދިނުމަށެވެ.

މި ދެ އެއްބަސްވުމަކީވެސް ވޯލްޑް ބޭންކުގެ އެހީގައި މަތީތަޢުލީމާއި ބެހޭ ވުޒާރާއާއި މޯލްޑިވްސް ޕެންޝަން އެޑްމިނިސްޓްރޭޝަން އޮފީސް ގުޅިގެން ކުރިއަށްގެންދާ "ސަސްޓެއިނަބަލް އެންޑް އިންޓަގްރޭޓެޑް ލޭބަރ ސަރވިސަސް" (ސެއިލްސް) ޕްރޮޖެކްޓުގެ ދަށުން ވެވުނު 2 އެއްބަސްވުމެވެ.

މި މަޝްރޫޢަކީ ދިވެހިންނަށް ވަޒީފާ ހޯދައިދިނުމަށް އެހީތެރިވުމުގެ ގޮތުން ކެރިއަރ ގައިޑެންސާއި، ވަޒީފާ ހޯދުމުގެ އެހީތެރިކަމާއި ހުނަރު ތަރައްޤީކުރުމުގެ ތަމްރީނާއި މެންޓަރިންގ ފޯރުކޮށްދޭ މަޝްރޫޢެކެވެ.