"އިސްކަންދޭންވީ ޒިންމާދާރު ނޫސްވެރިކަމަށް، ގާއިމުކުރަންވީ އެފަދަ މާހައުލެއް"

އިންސާފުވެރިކަން އިސްކުރުމުގެ މައްޗަށް ބިނާވެފައިވާ ޒިންމާދާރު ނޫސްވެރިކަމަށް މަގުފަހިވާނެ ފަދަ މާހައުލެއް ގާއިމުކުރުން މުހިއްމުކަމަށް ރައީސުލްޖުމްހޫރިއްޔާގެ އަނބިކަނބަލުން ފަސްޓު ލޭޑީ ސާޖިދާ މުހައްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ތަހުނިޔާ ފޮނުވާ ސޯޝިއަލް މީޑިއާގައި ހިއްސާ ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާގެ އަނބިކަނބަލުން ފަސްޓު ލޭޑީ ސާޖިދާ މުހައްމަދު ވިދާޅުވީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަސް ފާހަގަކުރަމުންދާއިރު، އިންސާނީ ހައްގުތައް ހިމާޔަތްކުރުމުގައާއި، ކޮރަޕްޝަން ނައްތާލުމުގައާއި، އަދި ހާއްސަކޮށް ޑިމޮކްރަސީއެއްގެ އުސޫލުތައް ދެމެހެއްޓުމުގައި މިނިވަން ނޫސްވެރިކަމުގެ މުހިންމުކަން ހަނދާން ކުރަން ޖެހޭކަމަށެވެ.

As we celebrate World Press Freedom Day, we are reminded of the critical importance of a free press and independent journalism in protecting human rights, preventing corruption, and most importantly, upholding the principles of a thriving democracy.

Today is also a day to… pic.twitter.com/BaniO85pjt

— First Lady Sajidha Mohamed (@sajidhaamohamed) May 3, 2026

އެކަމަނާ ވިދާޅުވީ މިއަދަކީ ނޫސްވެރިންނާއި މިނިވަން ނޫސްވެރިކަމުގެ އަޚުލާގީ މިންގަނޑުތަކާމެދު ވިސްނާލަންޖެހޭ ދުވަހެއްކަމަށެވެ. ނޫސްވެރިކަމުގެ އަސާސީ އުސޫލުތައް ކަމުގައިވާ، ތެދު މައުލޫމާތު ހޯދުމާއި، މައުލޫމާތު ފެތުރުމުގައި ސައްހަކަން ކަށަވަރުކުރުމާއި، އަދި ވަކި އަތަކަށް ނުޖެހި އިންސާފުވެރިކަން އިސްކުރުމުގެ މައްޗަށް ބިނާވެފައިވާ ޒިންމާދާރު ނޫސްވެރިކަމަކަށް މަގުފަހިވާނެ ފަދަ މާހައުލެއް ގާއިމުކުރުން މުހިއްމުކަމަށް ވިދާޅުވިއެވެ.

ފަސްޓު ލޭޑީ ސާޖިދާ މުހައްމަދު ވަނީ މުޖުތަމައު ހޭލުންތެރިކުރުވުމަށާއި، ކަންކަމުގެ ހަގީގަތް ހާމަކޮށްދިނުމަށާއި، އަދި ރައްޔިތުންގެ އަޑު އިއްވުމަށްޓަކައި ވަރުބަލިކަމެއްނެތި މަސައްކަތްކުރައްވާ ހުރިހާ ފަރާތްތަކަށް ދުނިޔޭގެ މިނިވަން ނޫސްވެރިކަމުގެ ދުވަހުގެ ތަހުނިޔާ ފޮނުވާފައެވެ.

ކޮންމެ އަހަރެއްގެވެސް މޭ މަހުގެ 3 ވަނަ ދުވަސް ފާހަގަކުރަނީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ގޮތުގައެވެ. މި ދުވަސް ފާހަގަކުރަނީ މިނިވަން މީޑިއާއެއް އޮތުމުގެ މުހިންމުކަން ބަޔާންކޮށްދިނުމަށާއި ޚަބަރާއި މައުލޫމާތު ފޯރުކޮށްދިނުމުގައި ހުރި ހުރަސްތައް ނައްތާލައި މައުލޫމާތު ލިބިގަތުމުގެ ހައްޤުގެ މުހިންމުކަން ބަޔާންކޮށް އެކަމަށް ހޭލުންތެރިކުރުމަށެވެ.