މާލީ ނިޒާމުގެ އިތުބާރު ނަގާލުމުން އިޔާދަނުކުރެވޭ ގެއްލުންތަކެއް ވެދާނެ: ބީއެމްއެލް

ރާއްޖޭގެ މާލީ ނިޒާމަށް އޮންނަ އިތުބާރު ނަގާލުމަށް ކުރެވޭ މަސައްކަތްތަކުގެ ސަބަބުން، މުޅި ޤައުމަށް އިޔާދަނުކުރެވޭ ފަދަ ބޮޑެތި ގެއްލުންތަކެއް ކުރިމަތިވެދާނެ ކަމަށް ބީއެމްއެލްގެ ހެޑް އޮފް ބްރޭންޑް އެންޑް މާކެޓިންގ ސްޓްރެޓެޖީ މުޙައްމަދު ސަޢީދު ވިދާޅުވެއްޖެއެވެ.

ސަޢީދު މިފަދައިން ވިދާޅުވީ، އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާއިން އިންތިޒާމުކުރި "އިޤްތިޞާދުގެ ދެ ފަރާތް" ޕެނަލް މަޝްވަރާގައި ވާހަކަދައްކަވަމުންނެވެ.

ސަޢީދު ވިދާޅުވީ، ރާއްޖޭގެ މާލީ އިދާރާތަކާއި ހާއްސަކޮށް ބީއެމްއެލްއާ ގުޅޭގޮތުން ހަގީގަތާ ޚިލާފު ޚަބަރުތައް ފެތުރުމުގެ ސަބަބުން އާންމުންގެ މެދުގައި ނުތަނަވަސްކަން އުފެދި، ބޭރުގެ ބޭންކުތަކާއި އިދާރާތަކާއެކު އޮންނަ ގުޅުންތަކަށް ނޭދެވޭ އަސަރުތަކެއް ކުރާނެ ކަމަށެވެ. އަދި ބޭރުގެ މިފަދަ އެންމެ ގުޅުމެއް ކެނޑިގެން ދިޔަ ނަމަވެސް، ރާއްޖޭން ބޭރަށް ފައިސާ ފޮނުމަށާއި، ބޭރުގައި ތިބޭ ދަރިވަރުންނާއި އެހެނިހެން ފަރާތްތަކުން ބޭންކް ކާޑުތައް ބޭނުންކުރުމުގައި ބޮޑެތި ދަތިތަކެއް ކުރިމަތިވެދާނެ ކަމަށްވެސް ސަޢީދު ވިދާޅުވިއެވެ.

ބޭންކުގެ ތަފާސްހިސާބުތަކަށް އަލިއަޅުވާލައްވަމުން ސަޢީދު ވިދާޅުވީ، 2023 ވަނަ އަހަރު އާންމު ފަރުދުންނާއި ވިޔަފާރިތަކަށް އެވްރެޖްކޮށް މަހެއްގެ މައްޗަށް 40 މިލިޔަން ޑޮލަރު ވިއްކާފައިވާއިރު، މިއަހަރުގެ މިހާތަނަށް މަހެއްގެ މައްޗަށް 81 މިލިޔަނަށް ވުރެ ބޮޑު އަދަދެއްގެ ޑޮލަރު ވިއްކަމުންދާ ކަމަށެވެ. އަދި ބޭންކުން ކޮންމެ ދުވަހަކު އެވްރެޖްކޮށް 2.7 މިލިޔަން ޑޮލަރު ވިއްކާ ކަމަށާއި، މިއަހަރުގެ ފުރަތަމަ ހަ މަސްދުވަހުގެ ތެރޭގައި ޖުމްލަ 570 މިލިޔަން ޑޮލަރު ވިއްކާފައިވާ ކަމަށް ވިދާޅުވިއެވެ.

ބޭންކުން އެންމެ އިސްކަމެއްދެނީ ތަޢުލީމީ އަދި ސިއްހީ ދާއިރާއަށް ބޭނުންވާ ޑޮލަރު ދޫކުރުމަށްކަން ފާހަގަކުރައްވަމުން ސަޢީދު ވިދާޅުވީ، ބޭރުގައި ކިޔަވާ ކުދިންނަށް ވިއްކާ ޑޮލަރުގެ ނިސްބަތް އެއްވަރެއްގައި ހިފެހެއްޓިފައި ހުރި ނަމަވެސް، ސިއްހީ ފަރުވާއަށް ބޭރަށްދާ މީހުންނަށް ދޫކުރާ ޑޮލަރުގެ އަދަދު ވަރަށް ބޮޑަށް އިތުރުވެފައިވާ ކަމަށެވެ. އެގޮތުން މިދިޔަ އަހަރު ސިއްހީ ފަރުވާއަށް މަހަކު 1 މިލިޔަން ޑޮލަރު ވިއްކިއިރު، މިއަހަރު އެ އަދަދު ވަނީ 3 މިލިޔަން ޑޮލަރަށް އިތުރުވެފައެވެ.

ޑޮލަރު އޭޓީއެމްތަކުން ފައިސާ ނަގާ މިންވަރު އިތުރުވެފައިވާކަން ފާހަގަކުރައްވަމުން ސަޢީދު ވިދާޅުވީ، ކުރިން ދުވާލަކު 1.6 މިލިޔަން ޑޮލަރު ނަގަމުންދިޔަ ނަމަވެސް، މިދިޔަ މަހު އެ އަދަދު 188 މިލިޔަން ޑޮލަރަށް އިތުރުވެފައިވާ ކަމަށެވެ. މީގެއިތުރުން، ކޮވިޑްގެ ކުރިން ބޭރަށް ދަތުރުކުރާ މީހުންނާއި އޮންލައިން ވިޔަފާރިތަކަށް ރުފިޔާ ކާޑު ބޭނުންކުރާ ކަސްޓަމަރުންގެ އަދަދު 90,000 ގައި ހުރި ނަމަވެސް، މިހާރު އެ އަދަދު ބައެއް މަސްމަހު 280,000 އާއި 300,000 އާ ދެމެދުގެ އަދަދަކަށް އަރާ ކަމަށް ސަޢީދު ވިދާޅުވިއެވެ.

"މިހާރު އެންމެ ދަށްކޮށް ފޮރިން ޓްރާންސެކްޝަން ބޭނުންކޮށްފަ އެބަހުރި 280،000 ކަސްޓަމަރުން. މިއީ ރުފިޔާ ކާޑުތަކުން. މި އަދަދުތަކަށް މިވަގުތުވެސް އަޅުގަނޑުމެން މިދަނީ ކޭޓާ ކުރަމުން. އެހެންނަމަވެސް ދަތިތަކެއް އެބަހުރި. އިރާދުކުރެއްވިއްޔާ މިކުރާ މަސައްކަތުން އެދަތިތަކުން އަރަގަނެގެން ބޮޑުވެސް ކޮށްދޭނަން،" ސަޢީދު ވިދާޅުވިއެވެ.

ބީއެމްއެލް އާއި ރާއްޖޭގެ އިގްތިސާދާ އޮތް ގުޅުމަށް އަލިއަޅުވާލައްވަމުން ސަޢީދު ވިދާޅުވީ، ދެމެދުގައި އޮތް ގުޅުން އުޅެނީ 0.96 ޕަސެންޓުގައި ކަމަށާއި، އެހެންކަމުން ރާއްޖޭގެ އިގުތިޞާދަށް ކުރާ ކޮންމެ އަސަރެއް ބޭންކަށް ކުރާނެ ކަމަށެވެ. އަދި މިއަހަރުގެ ފުރަތަމަ ހަތް މަސްދުވަހުގެ ތެރޭގައި އަލަށް ދޫކުރި 8.9 ބިލިޔަން ރުފިޔާގެ ލޯނުގެ ތެރެއިން ގާތްގަނޑަކަށް 270 މިލިޔަން ޑޮލަރު ދޫކޮށްފައިވަނީ ޑޮލަރުން ކަމަށްވެސް ސަޢީދު ވިދާޅުވިއެވެ.