އިނގިރޭސި ޕްރިމިއާ ލީގުގެ ފުރަތަމަ މެޗުގައި އެންމެ ފަހުގެ ޗެމްޕިއަން އާސެނަލް ކުޅުނު މެޗު އެ ޓީމުން ކާމިޔާބުކޮށްފިއެވެ.
ޕްރިމިއާ ލީގަށް އަލަށް ޕްރޮމޯޓްވި ކޮވެންޓްރީ އާއި ދެކޮޅަށް ލަންޑަނުގެ އެމިރޭޓްސް ސްޓޭޑިއަމްގައި 60 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުން އާސެނަލް މޮޅުވެފައިވަނީ 3-0 ގެ ނަތީޖާއަކުންނެވެ.
ޗެމްޕިއަން އާސެނަލް އިން ގިނައިރު ބޯޅަ ހިފަހައްޓައިގެން މޮޅަށް ކުޅެފައިވާ މި މެޗުގެ 15 ވަނަ މިނިޓުގައި އެ ޓީމުން ވަނީ ކޮވެންޓްރީގެ ގޯލު ހުޅުވާލާފައެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ރިކާޑޯ ކަލަފިއޯރީ ދިން ޕާހަކުން ކައި ހަވަޓްޒްއެވެ.
22 އަހަރުގެ މެދުކެނޑުމަކަށްފަހު ޕްރިމިއާ ލީގުގެ ޗެމްޕިއަންކަން އާސެނަލް އިން މިދިޔަ ސީޒަނުގައި ހޯދާފައިވާއިރު އެ ޓީމުން މި ސީޒަނާއި ކުރިމަތިލާފައިވަނީ ލީގުގެ ތަށި ދިފާއުކުރުމަށެވެ. އަދި އެ ކަމަށްޓަކައި ކޯޗު މިކޭލް އާޓޭޓާ ވަނީ ޓީމަށް ބަދަލުތަކެއް ގެނެސް އައު ކުޅުންތެރިންތަކެއް ހޯދާފައެވެ.
އާސެނަލް އިން މި މެޗުގައި ޖެހި ދެވަނަ ލަނޑަކީ މެޗުގެ 23 ވަނަ މިނިޓުގައި ބުކަޔޯ ސަކާ ކާމިޔާބުކޮށްދީފައިވާ ލަނޑެކެވެ.
އަދި ދެވަނަ ހާފުގެ ކުޅުން ފެށުނުތާ ހަތަރުވަނަ މިނިޓުގައި ބެން ވައިޓް ދިން ޕާހަކުން މާޓިން އޮޑެގާޑް ވަނީ އިތުރު ލަނޑެއް ޖަހާ މެޗުގެ ނަތީޖާ 3-0 އަށް ބަދަލުކޮށްފައެވެ.
2001 ވަނަ އަހަރަށްފަހު ޕްރިމިއާ ލީގުގައި ކޮވެންޓްރީ ފުރަތަމަ ފަހަރަށް ވާދަކުރާއިރު އެ ޓީމުގެ ކޯޗް ފްރޭންކް ލަމްޕާޑް އަށް ޕްރިމިއާ ލީގުގެ ތަޖުރިބާ ކުޅުންތެރިއެއްގެ އިތުރުން ކޯޗެއްގެ ގޮތުގައި ލިބިފައިވީ ނަމަވެސް އެ ޓީމުގެ ކުޅުންތެރިންނަށް މިއީ އައު ތަޖުރިބާއެކެވެ.
ޕްރިމިއާ ލީގުގައި އާސެނަލް އިން އަންނަ ހަފްތާގައި އެސްޓަން ވިލާ އާއި ދެކޮޅަށް ނިކުންނައިރު ކޮވެންޓްރީ ނިކުންނާނީ ހަލް ސިޓީ އާއި ދެކޮޅަށެވެ.