މަޓާޓޯ މޯލްޑިވްސް ޓްރެވަލް އެވޯޑްގެ އޮފިޝަލް ހޯސްޓަކަށް އޮޅުވެލި ބީޗް އެންޑް ސްޕާ ރިސޯޓް ހަމަޖައްސައިފިއެވެ.
މިއަހަރުގެ އެވޯރޑާއި ގުޅޭ ބައެއްކަންކަން ލަސްވެގެން ދިޔަކަމުގައި ވިޔަސް އަންނަ އަހަރުގެ އެވޯޑް ނޮމިނޭޝަންސްތަކާއި ހޯސްޓް އަހަރުގެ ކުރީ ކޮޅު ނުވަތަ މިއަހަރުގެ ގާލާ ނައިޓްގެ ތެރޭގައި އިޢުލާނު ކުރެވޭތޯ މަސައްކަތްކުރައްވަމުން ގެންދަވާކަމަށް މަޓާޓޯގެ ސެކެޓްރީ ޖެނެރަލް އިބްރާހިމް މުނާޒު ވިދާޅުވިއެވެ. ރާއްޖޭގެ ފަތުރުވެރިކަން ތަރައްޤީކޮށް ކުރިއެރުވުމަށް މަސައްކަތްކުރާ ފަރާތްތަކާއި، ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ ރާއްޖެއާއި ރާއްޖެއިން ބޭރުގެ ފަރާތްތަކުގެ ތެރެއިން ހޮވާލެވޭ ފަރާތްތަކަށް ދޭ މަޓާޓޯ މޯލްޑިވްސް ޓްރެވަލް އެވޯޑަކީ ރާއްޖޭގައި މިދާއިރާއިން ދެވޭ އެންމެ ޝަރަފުވެރި އެވޯޑެވެ. img:http://s3.psmnews.mv/images/660x400/14782218747954.jpg|މަޓާޓޯ މޯލްޑިވްސް ޓްރެވަލް އެވޯޑްގެ އޮފިޝަލް ހޯސްޓަކަށް އޮޅުވެލި ބީޗް އެންޑް ސްޕާ ރިސޯޓް ހަމަޖައްސާ، ސޮއިކުރުން - ފޮޓޯ: ޕީއެސްއެމް
މަޓާޓޯއިން މި އެވޯޑު ދެމުންއަންނަތާ މިއީ 5 ވަނަ އަހަރެވެ. މިއަހަރުގެ ޓްރެވަލް އެވޯޑުގެ ޕާޓްނަރުންގެ ގޮތުގައި 15 ފަރާތެއް ހަމަޖައްސާ، އެފަރާތްތަކާއެކު ވަނީ އެއްބަސްވުމުގައި ސޮއިކޮށްފައެވެ. މަޓާޓޯ މޯލްޑިވްސް ޓްރެވަލް އެވޯޑަށް މިއަހަރު އިތުރުކުރި 5 ދާއިރާއާއިއެކު ޖުމްލަ 35 ދާއިރާއަކުން އެވޯޑް ދިނުމަށް މަޓާޓޯއިން ވަނީ ނިންމާފައެވެ. މަޓާޓޯ މޯލްޑިވްސް ޓްރެވަލް އެވޯޑު ދިނިމުގެ ހަފްލާ އޮންނާނީ މިމަހުގެ ފަހުކޮޅުއެވެ.