ފިނި މޫސުމާއި ދިމާކޮށް ބްރިޓިޝް އެއަރވޭސްއިން، އަނެއްކާވެސް ދިވެހިރާއްޖެއަށް އުދުހުންތައް ފަށައިފިއެވެ.
ފިނިމޫސުމާއި ދިމާކޮށް، ބްރިޓީޝް އެއަރވޭސްގެ އުދުހުންތައް އަލުން ފަށާފައިވާއިރު، އެ އެއަރލައިނުން ވަނީ ހަފްތާއަކު ދެ ފްލައިޓް، އިބްރާހިމް ނާސިރު އިންޓަރނޭޝަނަލް އެއަރޕޯޓަށް ޝެޑިއުލްކޮށްފައެވެ. ދިވެހިރާއްޖެއަށް އުދުހުންތައް ފެށުމާއި ގުޅިގެން ބްރިޓީޝް އެއަރވޭސްއިން ވަނީ ރާއްޖެއަށް ދަތުރުކުރަން ބޭނުންވާ ފަރާތްތަކަށް ޚާއްސަ ފެއާއެއްވެސް ތައާރަފްކޮށްފައެވެ. ބްރިޓީޝް އެއަރވޭސްއިން ބުނީ އަންނަ އަހަރުގެ މާޗްމަހުގެ ނިއަލަށް އެ އެއަރލައިން މެދުވެރިކޮށް ޚާއްސަ އަގެއްގައި ދިވެހިރާއްޖެއަށް ދަތުރުކުރެވޭނޭކަމަށެވެ.
ޔޫރަޕްގެ މަންޒިލްތަކުގެ ތެރެއިން އިނގިރޭސިވިލާތް ފާހަގަކުރެވިފައިވަނީ ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ އެއް މަންޒިލްގެ ގޮތުގައެވެ. ފިނިމޫސުމާ ދިމާކޮށް ބްރިޓީޝް އެއަރވޭސްގެ ދަތުރުތައް ރާއްޖެއަށް ފަށާފައިވާއިރު، މިކަމުގެ ސަބަބުން އިނގިރޭސިވިލާތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެންދާނޭކަމަށް ފަތުރުވެރިކަމުގެ ސިނާއަތުގެ ވިޔަފާރީގައި ހަރަކާތްތެރިވާ ފަރާތްތަކުން ފާހަގަކުރެއެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ ސެޕްޓެމްބަރުމަހުގެ ނިއަލަށް އިނގިރޭސިވިލާތުން ދިވެހިރާއްޖެއަށް ވަނީ ހަތްދިހަ ހަ ހާހަށްވުރެ ގިނަ ފަތުރުވެރިން ޒިޔާރަތްކޮށްފައެވެ.
މިއީ މިދިއަ އަހަރުގެ މި މުއްދަތާ އަޅާބަލާއިރު އެގާރަ އިންސައްތަ އިތުރު އަދަދެކެވެ.