އިޙްތިރާމް އަދާކުރުމުގެ ޤައުމީ މަޝްރޫޢުގެ ވިލަރެސް ކޮމިޓީ އެކުލަވާލައިފި
-
މި ކޮމިޓީގައި އެކި ދާއިރާތަކުން 9 ބޭފުޅުން ހިމެނޭ
-
މިހާރުވަނީ ކޮމިޓީގެ ފުރަތަމަ ބައްދަލުވުން ބާއްވާފައި
އިޙްތިރާމް އަދާކުރުމުގެ ޤައުމީ މަޝްރޫޢުގެ ކަންކަން ބެލެހެއްޓުމަށްޓަކައި ރައީސުލްޖުމްހޫރިއްޔާގެ ޚާއްސަ ވިލަރެސް ކޮމިޓީއެއް އެކުލަވާލައިފިއެވެ.
ފަންނާ ސަޤާފަތާއި ތަރިކައާ ބެހޭ ވުޒާރާއިންދަނީ އިޙްތިރާމް އަދާކުރުމުގެ ޤައުމީ ކެމްޕޭން ފެށުމަށްޓަކައި ވާންޖެހޭ އެންމެ ފަހުގެ ތައްޔާރީތައް ވަމުންނެވެ.
އިޙްތިރާމް އަދާކުރުމުގެ ކެމްޕޭނަކީ މުޅި ރާއްޖެއަށް ހުޅުވާލައިގެން ކުރިއަށްގެންދިޔުމަށް ސަރުކާރުން ފައްޓަވާފައިވާ ޤައުމީ މަޝްރޫޢެކެވެ. މި މަޝްރޫޢުގެ ދަށުން ކުރިއަށްގެންދާ ކެމްޕޭން ފެށުމަށް ވާންޖެހޭ ތައްޔާރީތަކުގެ ތެރެއިން މަސައްކަތް ވިލެސްކުރާނެ ޚާއްސަ ޓީމެއް މިހާރުވަނީ އެކުލަވާލާފައެވެ.
ފަންނާ ސަޤާފަތާއި ތަރިކައާ ބެހޭ ވުޒާރާއިން ވިދާޅުވީ މިކޮމިޓީގައި ކަމާގުޅުންހުރި ވުޒާރާތަކާއި މުވައްސަސާތައް ހިމެނޭހެން 9 މެމްބަރުން ހިމެނޭކަމަށެވެ.
ވިލަރެސް ކޮމިޓީގައި ހިމެނޭ ބޭފުޅުން:
• ފަންނާ ސަޤާފަތާއި ތަރިކައާ ބެހޭ ވުޒާރާ – އިބްރާހީމް ސޮބާހް
• ދާޚިލީ ސަލާމަތާ ފަންނިއްޔާތާ ބެހޭ ވުޒާރާ – ނަސްރީނާ އިދްރީސް
• ދިފާޢީ އަދި ވަޠަނީ ޚިދުމަތްތަކާ ބެހޭ ވުޒާރާ – ޢަލީ ފަހުމީ
• ތަޢުލީމާ މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާ – މުޙައްމަދު ނާތީމް
• މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާ - އަޙްމަދު އައިމަން
• ސިއްޙަތާއި ޢައިލާއާއި އިޖުތިމާޢީ އެހީއާއި ބެހޭ ވުޒާރާ – މަރްޔަމް ލަހުފާ ޚަލީލް
• އިސްލާމީކަންތައްތަކާ ބެހޭ ވުޒާރާ – އައްޝައިޚް އަޙްމަދު ފަހުމީ ދީދީ
• ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާ – ޝާދިޔާ އަޙްމަދު
• ޕަބްލިކް ސަރވިސް މީޑިއާ – އިބްރާހީމް އިޤްބާލް
ފަންނާ ސަޤާފަތާ ބެހޭ ވުޒާރާއިން ވިދާޅުވީ ވިލަރެސް ކޮމިޓީގެ ފުރަތަމަ ބައްދަލުވުން މިހާރު ބާއްވާފައިވާކަމަށެވެ. ފުރަތަމަ ބައްދަލުވުމުގައި ކޮމިޓީއިން މި މަޝްރޫޢު ކުރިއަށްގެންދިޔުމުގައި އަދާކުރާނެ ދައުރާއި، އެންމެ ފުރިހަމައަށް މިކެމްޕޭން ކުރިއަށްގެންދިޔުމަށް އަޅަންޖެހޭ ފިޔަވަޅުތަކާއި ކަމާގުޅޭ އިދާރާތައް ގުޅިގެން މަސައްކަތްތައް ރޭވުމާ ގުޅޭގޮތުންވެސް ޚިޔާލު ބަދަލުކޮށްފައިވާކަމަށް އެވުޒާރާއިން ވިދާޅުވެއެވެ.
އިޙްތިރާމް އަދާކުރުމުގެ ޤައުމީ ކެމްޕޭނެއް ކުރިއަށްގެންދިޔުމަށް ރައީސުލްޖުމްހޫރިއްޔާ ޑރ.މުޙައްމަދު ޢިއުލާންކުރެއްވުމާ ގުޅިގެން ފަންނާ ސަޤާފަތާ ބެހޭ ވުޒާރާއިންވަނީ ކެމްޕޭންގައި ބޭނުންކުރާނެ ލޯގޯ ފަރުމާކުރަން ހުޅުވާލާފައެވެ. އަދި މިމަޝްރޫޢުގައި ހުރިހާ ދާއިރާއެއްގެ ބައިވެރިވުން ކަށަވަރުކުރުމަށް މަސައްކަތްކުރަމުންދާއިރު މިކަމުގައި ހަރަކާތްތެރިވާނެ މީޑިއާތަކާއެކުވަނީ އެއްބަސްވުން އެކުލަވާލާފައެވެ.
އިޙްތިރާމް އަދާކުރުމުގެ ޤައުމީ މަޝްރޫޢުގެ ޝިޢާރަކަށް ސަރުކާރުން ކަނޑައަޅުއްވާފައިވަނީ "އިޙުތިރާމުގެ އުފާ – މުޖުތަމަޢުގެ ނަފާ" އެވެ.