ލުބްނާންގެ ރައްޔިތުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތަކުގެ ތެރެއިން ގެދޮރު ގެއްލުވައިލާފައިވާ އެތައް ހާސް ބަޔަކަށް ބޯހިޔާވަހިކަން ފޯރުކޮށްދިނުމަށް ޚާއްޞަ މަޝްރޫޢެއް ފެށުމަށް ތައްޔާރު ކުރަމުންދާ ކަން، މުޖާހިދުންގެ ޖަމާޢަތް، ޙިޒްބުالله ގެ ވެރިޔާ ނަޢީމް ޤާސިމް އިޢުލާނު ކުރައްވައިފިއެވެ. އޭނާ މި ކަން އިޢުލާނު ކުރައްވާފައި ވަނީ، 2024 ވަނަ އަހަރު ޔަހޫދީން ޝަހީދުކޮށްލި ޙިޒްބުالله ގެ ކުރީގެ އިސްވާރު ޙަސަން ނަޞްރުالله ޝަހީދުކޮށްލި ހާދިސާއަށް ދެ އަހަރު ފުރުން ފާހަގަކުރުމަށް ބޭއްވި ރަސްމިއްޔާތެއްގައި ދެއްވި ތަޤުރީރެއްގައެވެ.
ލިބެން ހުރި ވަސީލަތްތަކާއި އެހީތައް ބޭނުންކޮށްގެން ބޯހިޔާވަހިކަމާއި އިމާރާތްތައް މަރާމާތުކޮށް އަލުން ބިނާކުރުމަށް އެ ޕާޓީން މަސައްކަތް ކުރާނެ ކަމުގައި ނަޢީމް ވިދާޅުވިއެވެ. މި ގޮތުން، އެއްކޮށް ސުންނާފަތިކޮށްލާފައިވާ އަވަށްތަކުގެ ރައްޔިތުންނަށް އަމާޒުކޮށްގެން ހިންގާ އައު ބޯހިޔާވަހިކަމުގެ މަޝްރޫޢުގެ ތަފުސީލުތައް ވަރަށް އަވަހަށް އިޢުލާނު ކުރައްވާނެ ކަން ވެސް އޭނާ ފާހަގަކުރެއްވިއެވެ.
ގެދޮރު ގެއްލިފައިވާ މީހުންނަށް ބޯހިޔާވަހިކަމާއި ބަދަލު ދިނުމުގެ ޒިންމާ ލުބްނާނުގެ ދައުލަތުން އުފުލަންޖެހޭނެ ކަމުގައި ނަޢީމް ވިދާޅުވިއެވެ. އަދި، ބޯހިޔާވަހިކަން ފޯރުކޮށްދިނުމާއި، ބަދަލު ދިނުމުގެ އިތުރުން އަލުން ބިނާކުރުމާއި މަރާމާތުކުރުމުގެ ހުރިހާ ޒިންމާތަކެއް އަދާކުރުމަކީ އަދިވެސް ސަރުކާރުގެ މައްޗަށް އޮތް ވާޖިބެއް ކަމުގައި ވެސް އޭނާ ބަޔާންކުރެއްވިއެވެ.
މާރިޗު މަހުގެ ކުރީކޮޅު ޔަހޫދީ ސިފައިން ލުބްނާނުގެ ދެކުނަށް އަރައި ހިންގަން ފެށި ލާއިންސާނީ ޖަރީމާތަކާ ގުޅިގެން ލުބްނާނުގެ އާބާދީގެ ހަތަރުބައިކުޅަ އެއްބަޔާ ގާތްކުރާ ޢަދަދެއްގެ މީހުންގެ ގެދޮރު ގެއްލުނެވެ. މީގެ ތެރެއިން ގިނަ ބަޔަކު ގެއަށް އެނބުރި ގޮސްފައިވީ ނަމަވެސް، އަވަށްތައް ސުންނާފަތިވުމާއި ޔަހޫދީ ސިފައިން ވެރިވެގަނެފައިވާ ސަރަޙައްދުތަކަށް ނުދެވި އަދިވެސް 340,000 އަށްވުރެ ގިނަ މީހުން ހާލުގައި ޖެހިފައިވާ ކަމުގައި ލުބްނާންގެ އިދާރާތަކުން ހާމަކުރެއެވެ. މާރިޗު 2 ގެ ފަހުން ޔަހޫދީ ފައުޖުން ދިން ނިރުބަވެރި ހަމަލާތަކުގައި ލުބްނާނުން 4,300 އަށްވުރެ ގިނަ މީހުން ޝަހީދުކޮށްލާފައިވާއިރު، އޭގެ ތެރޭގައި 250 އަށް ވުރެ ގިނަ ކުޑަކުދިން ހިމެނެއެވެ. އަދި، އިތުރު 12,000 މީހުން ޒަޚަމްކޮށްލާފައިވާއިރު، އޭގެ ތެރޭގައި 1,000 ކުޑަކުދިން ހިމެނެއެވެ.