އޮޅުވާލައިގެން އެތެރެކުރި 8 މިލިޔަނަށްވުރެ ގިނަ ސިނގިރޭޓު އަތުލައިގެންފި
-
މިއީ ކަނޑުމަގުން ރާއްޖެއަށް އެތެރެކުރި ތަކެތި
-
މި ތަކެތި އެތެރެކުރީ ޖެނެރަލް ކާގޯގެ ގޮތުގައި އޮޅުވާލައިގެން
-
އެއީ 4ލައްކައަށްވުރެ ގިނަ ސިނގިރޭޓު ފޮށި
އޮޅުވާލައިގެން ރާއްޖެއަށް އެތެރެކުރި 8 މިލިޔަނަށްވުރެ ގިނަ ސިނގިރޭޓު ކަސްޓަމްސްއިން އަތުލައިގެންފިއެވެ.
މި ތަކެތި އަތުލައިގަތީ ކަނޑުމަގުން ރާއްޖެއަށް އެތެރެކުރި ޝިޕްމަންޓެއްގެތެރެއިންނެވެ.
ކަސްޓަމްސްއިން ވިދާޅުވީ މިމަހުގެ 27ވަނަ ދުވަހު މާލެ ވިޔަފާރި ބަނދަރުގައި، ހިންގި ޚާއްސަ އޮޕަރޭޝަނެއްގައި "ޖެނެރަލް ކާގޯ"ގެ ގޮތުގައި ޑިކްލެއަރކޮށްފައިވާ ޝިޕްމަންޓެއް ބަލައިފާސްކުރުމުގެ ތެރޭގައި ގިނަ އަދަދެއްގެ ސިނގިރޭޓް ފޮރުވާފައި ހުއްޓާ ފެނިފައިވާކަމަށެވެ.
އެގޮތުން ޖުމްލަ 8،527،480 ސިނގިރޭޓް ސްޓިކްސް ހޯދައި، ކަސްޓަމްސްގެ ބެލުމުގެ ދަށަށް މިހާރު ވަނީ ގެންގޮސްފައެވެ. އެއީ 426،374 ފޮށި ސިނގިރޭޓެވެ. 42 ހާހަށްވުރެ ގިނަ ކާޓަންއެވެ.
މި މައްސަލަ އިތުރަށް ތަހުޤީގުކުރަމުން އަންނަކަމަށް ކަސްޓަމްސްއިން ވިދާޅުވެއެވެ.
ދުންފަތުގެ ބަވާތްތަކަކީ ބޮޑު ޑިއުޓީއެއް ނަގާ ބާވަތްތަކެކެވެ. އެގޮތުން މިހާރު ޤާނޫނު އޮންނަގޮތުން، އެތެރެކުރާ ކޮންމެ ސިނގިރޭޓަކުން 4 ރުފިޔާގެ ޑިއުޓީ ނަގައެވެ.