ޕޭސްމޭކަރއާއެކުވެސް ނާޒިމާ ދައްކަމުންދަނީ ދިރިއުޅުމުގައި ހުރިހާކަމެއްވެސް ކުރެވޭނެކަން

ބޮޑު މީހެއްގެ ހިތުގައި އެވްރެޖްކޮށް 250 އާއި 350 ގްރާމާއި ދެމެދުގެ ބަރުދަނެއް ހުންނައިރު ކޮންމެ މިނިޓެއް ތެރޭގައި 60 އާއި 100 އާއި ދެމެދު ވިންދު ޖެހުމަށްޓަކައި ހިތުން ކަރަންޓު ރާޅު ބާނިތަކެއް އުފައްދައެވެ. އާންމުގޮތެއްގައި ހިތުގެ ވިންދުގެ މައްސަލަ ހުންނަން ނަމަ ފަހުގެ ހޯދުންތަކާއެކު ހިތަށް މެޝިނެއް ލައްވައިގެން ހިތުގެ ވިންދު ހަމައަކަށް އެޅުމުގެ ވަޞީލަތް މިހާރުވަނީ ހޯދިފައެވެ.

ހިތަކީ އިންސާނާގެ ދިރިހުރުމަށް ހަށިގަނޑުގައި ލައްވާފައިވާ މުހިއްމު ގުނަވަނެކެވެ. އިންސާނެއްގެ އެއްވެސް މަސައްކަތަކާ ނުލާ ގުދުރަތީގޮތުން ހަށިގަނޑަށް ބޭނުންވާ ލޭފޮނުވައިދިނުމާއި، އޮކްސިޖަން ހިމެނޭ ލޭ ހަށިގަނޑުގައި ދައުރުކުރުމުގެ މުހިއްމު މަސައްކަތް ކޮންމެ މީހެއްގެ ހަށިގަނޑުގައި ލައްވާފައިވާ ހިތުން ކުރެއެވެ. އެމަސައްކަތްކުރުމުގައި ހިތުންކުރާ އެންމެ ފާހަގަކޮށްލެވޭ އެއްކަމަކީ އިލެކްޓްރިކް ސިގްނަލަކުން އުފައްދާ ހިތުގެ ވިންދެވެ. މި ސިގްނަލް އުފައްދަނީ ހިތުގައި ހިމެނޭ މައި 4 ޗެމްބަރުގެތެރެއިން ހިތުގެ މަތީގައިވާ "ރައިޓް އެޓްރިއަމް"ގައި ހުންނަ ޚާއްސަ ސެލްތަކުގެ ފައުޖަކުންނެވެ. ނުވަތަ ސައިނޯއެޓްރިއަލް ނޯޑްއިންނެވެ. އެއީ ހިތުގެ ވިންދު އުފައްދައިދޭ ސެލްތަކެވެ.

އެވްރެޖްކޮށް މިނިޓެއްގެ ތެރޭގައި 60 އާއި 100 އާއި ދެމެދުގެ ވިންދު އުފެއްދުމަށް އެވަރަށް ސިގްނަލް މިނޯޑުތަކުން އުފައްދާ ލޭ ދައުރުކުރުމަށް އެހީތެރިވެއެވެ. އެހެންނަމަވެސް ގުދުރަތީގޮތުން ލައްވާފައިވާ މިޕޭސްމޭކަރުން ކުރާ މަސައްކަތަށް ބުރުލެއް އެރުމުން އެތަން ފޫބެއްދުމަށް މިހާރު އާޓިފިޝަލް ޕޭސްމޭކަރުދަނީ ބޭނުންކުރަމުންނެވެ. ރާއްޖޭގައިވެސް ހިތުގެ ވިންދާ ގުޅުންހުރި އެކި މައްސަލަތަކާ ގުޅިގެން ޕޭސްމޭކަރު ލައްވާފައި ހުންނަ ފަރާތްތައް މިހާރު މަޑުމަޑުން އަންނަނީ އިތުރުވަމުންނެވެ. އޭގެތެރެއިން އެއް ފަރާތަކީ ކުޅިވަރުގެ ދާއިރާގައި ފާހަގަކޮށްލެވޭ މޫނެއްކަމުގައިވާ ޢައިޝަތު ނާޒިމާއެވެ.

ކުޅިވަރުގެ ދާއިރާގައި ބޮޑެތި ކާމިޔާބީތަކެއް ހޯދާފައިވާ ނާޒިމާއަކީ ފިޓްނެސްއަށް ބަލާއިރުވެސް އާންމުންނަށްވުރެ ފިޓުކޮށް ހުރި ފަރާތެކެވެ. ދުޅަހެޔޮކޮށް ހުރުމާއި، ކެރިއަރުގައި އެންމެ މަތީގައި ހުރި ނާޒިމާއަށް އޭނާގެ ޞިއްޙީ އެއްވެސް މައްސަލައެއް ހުރިކަމެއް ކުރިއަކުން ނޭނގެއެވެ. އެންމެ ފުރަތަމަ ހިތުގެ ކަމެއް ގޯސްކަން އެނގުނީ ފުލުހުންގެ އިންޓަރނަލް މެޗެއްގައި ކުޅެނިކޮށް ވެއްޓުނު ހިސާބުންނެވެ. ދެފަހަރެއްގެ މަތިން އަނބުރައިގަނެގެން ވެއްޓުމުން އަވައްޓެރި ޤައުމަކަށް ދިޔުމުން އިތުރު ގޮތެއް ނެތްކަމަށާއި، ޕޭސްމޭކަރ ލައްވަންޖެހޭކަން ޑޮކްޓަރުން އިރުޝާދުދެއްވުމަކީ ނާޒިމާއަށް ކުރެވުނު ތަފާތު ތަޖުރިބާއެކެވެ. އަދި ދިރިއުޅުމުގައި އެންމެ ފިޓުކޮށް ހުރި ދުވަސްވަރު އެފަދަ ކަމެއް ދިމާވުމުން ވަރަށް ގިނަ ކަންކަމާ ސުވާލު އުފެދި، އެސުވާލުތައް ޑޮކްޓަރުންނާ ކުރިމަތިކުރުވިކަން ނާޒިމާ ފާހަގަކުރިއެވެ.

"އޭރު އެންމެ ފިޓްކޮށްހުރީ، ކެރިއަރުގަވެސް އެންމެ މަތީގަ ހުރި ދުވަސްކޮޅު، ފިރިމީހާވެސް ބުނީ ވަކި ފިޓުކޮށްހުރެގެން ނެތެއް ނޫންހޭ ވަކި ރައްކަލެއް. ޑޮކްޓަރާވެސް ވަރަށް ސުވާލުކުރިން." ނާޒިމާ ކިޔައިދިނެވެ.

ބައްޕައަކީ ހާޓްޕޭޝަންޓަކަށްވުމުން ޢާއިލީކަމެއްކަމަށް ވިސްނިނަމަވެސް ސީދާ އެކަމުގެ ޖަވާބުތަކެއް ނާޒިމާއަކަށް ނޭނގެއެވެ. ހިތުގެ ވިންދުގައި މައްސަލައެއް އުޅޭތީ ޕޭސްމޭކަރު ލައްވައިގެން ނާޒިމާ އަންނަނީ އާންމު ދިރިއުޅުމެއްގައި އުޅެމުންނެވެ.

މީގެ 9 އަހަރުކުރިން ޕޭސްމޭކަރު ލެއްވިފަހުންވެސް ނާޒިމާގެ ދިރިއުޅުމުގައި ހަރަކާތްތެރިވެއުޅުމަކަށް ބަދަލެއް ނުގެނެއެވެ. ސަރޖަރީއަށްފަހު 3 މަސްތެރޭގައި އޭނާހުރީ ކުޅެން ދަނޑުމަތީގައެވެ. އެހެންނަމަވެސް އެއީ ވަރަށް ހިތްވަރާއި ޢާއިލާ އަދި ހެޔޮއެދޭ މީހުންގެ ހިތްވަރުކަން އޭނާ ފާހަގަކުރިއެވެ.

"ޑޮކްޓަރުގެ އިރުޝާދަކީ، ބިރުނުގަނެ ހަމަ ކުޅެވޭނެޔޭ. ބިރުގަންނަ ނަމަ ހިތުގެ ވިންދަށް ބަދަލު އައިސް ދަތިވާނެޔޭ ޕޭސްމޭކަރއާއެކު އުޅެން. އެހެންވީމަ ބެލީ އެއްވެސްވަރަކަށް އެކަމާ ވިސްނާފިކުރު ނުކޮށް ހަމަޖެހިގެން އުޅެން." ނާޒިމާ ބުންޏެވެ.

ޕޭސްމޭކަރު ލެއްވުމަށް ނުވަތަ ގެންގުޅުމުގައި ރައްކާތެރިކަމަށް ސަމާލުވާންވީ ކަންކަމާއި ގުޅޭގޮތުން ޑޮކްޓަރުން ސާފު އިރުޝާދުތަކެއް ދެއްވާއިރު އެއާއެކީ އުޅެން ދަސްކުރުމަކީ އާންމު ދިރިއުޅުމެއް ހޯދަން މުހިއްމުކަމެއްކަން ނާޒިމާ ފާހަގަކުރިއެވެ.

ނާޒިމާގެ ވާހަކައިގައި ޕޭސްމޭކަރ ލެއްވުމަށްފަހު އައީ އެންމެ ބަދަލެކެވެ. އެއީ ކުއްލިއަކަށް ދުއްވައިގަތުން ނުވަތަ ހަރަކާތްތެރިވެގަތުމުގެ ބަދަލުގައި ކުޅިވަރު ފެށުމުގެ ކުރިންވެސް އެހެން މީހުންނަށްވުރެ ކުރިން ހަމަޖެހިގެން ވާމްއަޕްވުމަށް އޭނާ ވަގުތުދޭންޖެހުމެވެ. ޕޭސްމޭކަރާއެކު އުޅެން ނާޒިމާ ދަސްކޮށްފިއެވެ. އަދި އެއީ އެއްވެސް އިތުރު ފިކުރެއް ބޮޑުކުރަންވީކަމެއް ނޫންކަމަށާއި، ކަންކަމުގައި ހާސްވުމަކީ އިތުރު ބަލިތަކާއި އުނގަދޫތަކަށް މީހާ ދާކަމެއްގެ ގޮތުގައި ނާޒިމާ ސިފަކުރިއެވެ.

ޕޭސްމޭކަރު ލައްވާފައި ތިބި މީހުންނަށް ދޭންއޮތީ އެއް މެސެޖެވެ. އެއީ އެހާ ހާސްވެގެން އެއާމެދު އަބަދު ފިކުރުނުކުރަންދޭ ނަސޭހަތެވެ. އަދި ކޮންމެ މީހަކަށްވެސް ނާޒިމާ އަތުގައި ޚާއްސަ މެސެޖެއް އެބައޮތެވެ. އެއީ ހަށިގަނޑަށް އަންނަ ބަދަލުތަކަށް އަދި އުނދަގޫތަކަށް ސަމާލުވާށެވެ. އެއީ ވަކިކަމެއްކަމަށް އަމިއްލައަށް ނުނިންމާ ޞިއްޙީ އެހީތެރިއެއްގެ ލަފާހޯދަން ނާޒިމާ ތަކުރާރުކުރިއެވެ.