ރަޝިއާގައި މިހާރުވެސް އުތުރު ކޮރެއާގެ 8،000 އަށްވުރެ ގިނަ ސިފައިން ޙަރަކާތްތެރިވަމުންދާ ކަމަށާއި، އަދި އިތުރު 10،000 ސިފައިން އެ ޤައުމަށް ފޮނުވުމުގެ ތައްޔާރީތައް ވަމުން އަންނަ ކަމަށް ޔޫކްރޭނުގެ ރައީސް ވޮލޮޑިމީރް ޒެލެންސްކީ ވިދާޅުވެއްޖެއެވެ.
އުތުރު ކޮރެއާގެ ސިފައިން ރަޝިއާއަށް ފޮނުވަމުންދާ މައްސަލައިގެ އެންމެ ފަހުގެ މަޢުލޫމާތު ޙިއްސާކުރައްވަމުން، މީސްމީޑިއާގައި ކުރެއްވި ޕޯސްޓެއްގައި ޒެލެންސްކީ ވިދާޅުވީ، އެ ސިފައިންގެ ފައުޖު އެކުލަވާލަމުންދަނީ ޚާއްސަ ތަމްރީނުތަކަކަށްފަހު ރަޝިއާއަށް ފޮނުވުމަށް ކަމަށެވެ.
މީގެކުރިން، މިދިޔަ އޯގަސްޓް މަހުވެސް ރަޝިއާއާ ބައިވެރިވެގެން ޔޫކްރޭނާ ދެކޮޅަށް ހަނގުރާމަކުރުމަށް އުތުރު ކޮރެއާއިން 50،000 އެއްހާ ސިފައިން ފޮނުވުމުގެ ފުރުޞަތު އޮތް ކަމަށް ވިދާޅުވެ، ޔޫކްރޭނުގެ ވައިގެ ދިފާޢީ ނިޒާމު ވަރުގަދަކުރުމަށް އެހީތެރިވެދިނުމަށް ދެކުނު ކޮރެއާއަށް ޒެލެންސްކީ ގޮވާލައްވާފައިވެއެވެ.
ދެކުނު ކޮރެއާއިން މިދިޔަ ޖުލައި މަހު ޔޫކްރޭނަށް 100 މިލިއަން ޑޮލަރުގެ އެހީގެ ޕެކޭޖެއް އިޢުލާންކުރި ނަމަވެސް، އޭގެ ތެރޭގައި އެއްވެސް ހަތިޔާރެއް ހިމަނާފައެއް ނުވެއެވެ.
ޒެލެންސްކީ މި މަޢުލޫމާތު ހާމަކުރައްވާފައި މިވަނީ، ހަނގުރާމައިގެ މައިދާނުން ހައްޔަރުކުރެވުނު އުތުރު ކޮރެއާގެ ސިފައިންގެ ދެ މީހަކު ދެކުނު ކޮރެއާއާ ޙަވާލުކޮށްފައިވާ ކަމަށް އޭނާ އިޢުލާން ކުރެއްވުމާ ގުޅިގެން ދެކުނު ކޮރެއާ އާއި ޔޫކްރޭނާ ދެމެދު ޚިޔާލުތަފާތުވުންތަކެއް އުފެދިފައިވާ ދަނޑިވަޅެއްގައެވެ.
ދެކުނު ކޮރެއާއިން ބުނެފައިވަނީ އެ ދެ މީހުން ޙަވާލުކުރުމުގެ މުޢާމަލާތަކީ ސިއްރުގެ ގޮތުގައި ބޭއްވުމަށް އެއްބަސްވެފައިވާ ކަމެއް ކަމަށާއި، ޒެލެންސްކީ އެކަން އާންމު ކުރެއްވުމަކީ ހިތާމަކުރާ ކަމެއް ކަމަށެވެ. އަދި އެފަދަ ސިއްރު އެއްބަސްވުމެއް އޮތްކަމަށް އިންކާރުކޮށް ޔޫކްރޭނުގެ ރައީސްގެ އޮފީހުން ދޮގު ބަޔާނެއް ނެރެފައިވާ ކަމަށް ބުނެ ދެކުނު ކޮރެއާއިން ވަނީ އެކަމާ ރަސްމީކޮށް ޝަކުވާވެސް އުފުލައިފައެވެ.
ޔޫކްރޭނާއި ދެކުނު ކޮރެއާގެ އަންދާޒާތަކުން ދައްކާގޮތުގައި، 2024 ވަނަ އަހަރުން ފެށިގެން ރަޝިއާއިން ޔޫކްރޭނާ ދެކޮޅަށް ކުރަމުންދާ ހަނގުރާމައަށް އެހީތެރިވުމަށް އުތުރު ކޮރެއާއިން ވަނީ ގާތްގަނޑަކަށް 14،000 އާއި 15،000 އާ ދެމެދުގެ ޢަދަދަކަށް ސިފައިން ފޮނުވައިފައެވެ.
މީގެ ތެރެއިން ގިނަ ޢަދަދެއްގެ ސިފައިން ފޮނުވާފައިވަނީ ޔޫކްރޭނުގެ ސިފައިން ރަޝިއާގެ ސަރަޙައްދަށް ވަދެގަތުން ހުއްޓުވުމަށްޓަކައި ކުރުސްކް ސަރަޙައްދަށެވެ.
މީގެއިތުރުން، އުތުރު ކޮރެއާއިން، ރަޝިއާއަށް ގިނަ ޢަދަދެއްގެ އަސްކަރީ އެހީތެރިކަން ފޯރުކޮށްދީފައިވާކަމަށް ޔޫކްރޭނުން ތުހުމަތުކުރެއެވެ. އޭގެ ތެރޭގައި ބެލިސްޓިކް މިސައިލާއި، ދުރު ރާސްތާގެ އާޓިލަރީ ނިޒާމުތަކުގެ އިތުރުން މަލްޓިޕަލް ލޯންޗް ރޮކެޓް ސިސްޓަމްތައް (އެމްއެލްއާރްއެސް) ހިމެނެއެވެ.