އދގެ އެހީދޭ ޖަމާޢަތްތަކަށް ކުރިމަތިވެފައިވާ މާލީ ބޮޑެތި ދަތިތަކުގެ ސަބަބުން މި އަހަރުގެ ތެރޭގައި ގާތްގަނޑަކަށް 8.3 މިލިއަން ރެފިއުޖީންނާއި، މަޖުބޫރީ ޙާލަތުގައި ގެދޮރު ގެއްލިފައިވާ މީހުންނަށް ކޮންމެހެން ބޭނުންވާ އަސާސީ އެހީތެރިކަން މެދުކެނޑިދާނެކަމުގެ އިންޒާރު، އދ. ގެ ރެފިއުޖީންނާ ބެހޭ އިދާރާ (ޔޫއެންއެޗްސީއާރު) އިން ދީފިއެވެ.
އެ އިދާރާއިން ބުނި ގޮތުގައި، މާލީ ދަތިކަމުގެ ސަބަބުން ބައެއް ޤައުމުތަކުގައި ހާލުގައި ޖެހިފައިވާ މީހުންނަށް ހިމާޔަތްދިނުމަށް ޤާއިމުކޮށްފައިވާ ނިޒާމުތައް މުޅިން ހުއްޓުމަކަށް އައުމުގެ ނުރައްކާ ވެސް ވަނީ ބޮޑުވެފައެވެ.
އެމެރިކާއާއި ވިލާތުގެ ބޮޑެތި ގިނަ ޤައުމުތަކުން ދެމުން އައި މާލީ އެހީތައް ކަނޑާލުމާ ގުޅިގެން، ޔޫއެންއެޗްސީއާރުގެ ތާރީޚުގައި ވެސް ދިމާނުވާ ފަދަ މާލީ ދަތިކަމާ އެ އިދާރާއިން މިހާރު ދަނީ ކުރިމަތިލަމުންނެވެ. އެ އިދާރާގެ އެންމެ ފަހުގެ ރިޕޯޓުގައި ވާގޮތުން، 2024 އާއި 2025 އާ ދެމެދު ލިބުނު ފައިސާ 24 އިންސައްތަ ދަށްވުމުގެ ސަބަބުން، 5.789 ބިލިއަން ޑޮލަރުގެ ބޮޑު ޑެފިސިޓެއް ވަނީ އުފެދިފައެވެ.
ދުނިޔޭގެ އެކި ކަންކޮޅުތަކުގައި ޙާލުގައި ޖެހިފައިވާ މީހުންގެ ޢަދަދު ރެކޯޑު މިންވަރަކަށް އިތުރުވަމުންދާއިރު، 2026 ވަނަ އަހަރުގެ ޔޫއެންއެޗްސީއާރުގެ އޮޕަރޭޝަންތަކަށް ބޭނުންވާ 8.505 ބިލިއަން ޑޮލަރުގެ ތެރެއިން ޖުލައި މަހުގެ ނިޔަލަށް ލިބިފައިވަނީ އެންމެ 32 އިންސައްތައެވެ.
އެ އިދާރާއިން ލަފާކުރާ ގޮތުގައި މި އަހަރު ނިމޭއިރު އެހީތެރިކަން ބޭނުންވާ މީހުންގެ ޢަދަދު 131.2 މިލިއަނަށް އަރާނެއެވެ. މިއީ ފާއިތުވި އަހަރުގެ ނިޔަލަށް ރެކޯޑުކުރެވުނު 129.4 މިލިއަނާ އަޅާބަލާއިރު ފާހަގަކޮށްލެވޭ އިތުރުވުމެކެވެ.
ޔޫއެންއެޗްސީއާރުގެ 26 ޞަފްޙާގެ މި ރިޕޯޓުގައި ބަޔާންކޮށްފައިވާ ގޮތުގައި، ބަޖެޓު ކުޑަކުރަން ޖެހުމުގެ ސަބަބުން ރެފިއުޖީން ރަޖިސްޓްރީކުރުމާއި، ކުޑަކުދިންގެ ރައްކާތެރިކަން ކަށަވަރުކުރުމުގެ ޕްރޮގްރާމްތަކުގެ އިތުރުން ޖިންސީ އަދި ޖިސްމާނީ އަނިޔާގެ ޝިކާރައަކަށްވާ ފަރާތްތަކަށް ފޯރުކޮށްދޭ ޚިދުމަތްތަކަށް ވަނީ ބޮޑެތި ހުރަސްތަކެއް ކުރިމަތިވެފައެވެ. ރިޕޯޓުގައި ފާހަގަކޮށްފައިވާ ގޮތުގައި، ފައިސާގެ ދަތިކަން ވަކި މިންވަރަކަށްވުރެ ދަށަށް ގޮސްފިނަމަ ޚިދުމަތްތައް ނުދެވުމުގެ އިތުރަށް މުޅި ނިޒާމު އެއްކޮށް ރޫޅިގެންދާނެއެވެ.
މި މާލީ ދަތިކަމުގެ ނޭދެވޭ އަސަރު އެންމެ ބޮޑަށް ފޯރަމުންދަނީ ގިނަ ޢަދަދަކަށް ރެފިއުޖީން ދިރިއުޅޭ ޤައުމުތަކަށެވެ. އެގޮތުން، ސޫދާނުގެ ދާޚިލީ ހަނގުރާމައިން ސަލާމަތްވުމަށް މީހުން ހިޖުރަކުރަމުންދާ އަވައްޓެރި ޗާޑްގައި 319,000 މީހުން ރަޖިސްޓްރީވުން ލަސްވަމުންދާއިރު، 200,000 އަންހެނުންނާއި އަންހެން ކުދިންނަށް ރައްކާތެރި މާޙައުލާއި އަނިޔާއިން ސަލާމަތްވުމަށް ހިންގާ ޕްރޮގްރާމްތަކުގެ ޚިދުމަތް މެދުކެނޑުމުގެ ބިރު ވަނީ ހީވެފައެވެ.
ހަމައެއާއެކު، ހަތަރުވަނަ އަހަރަކަށް ދެމިގެން ގޮސްފައިވާ ދާޚިލީ ހަނގުރާމައިގެ ސަބަބުން ބޮޑު ކާރިސާއެއް އުފެދިފައިވާ ސޫދާންގައި، 2026 ވަނަ އަހަރުގެ ފުރަތަމަ ފަސް މަސްދުވަހު ރަޖިސްޓްރޭޝަން މެދުކަނޑައިލަން ޖެހުމާ ގުޅިގެން، އަހަރުގެ މެދަކާ ހަމައަށް ދިޔައިރުވެސް 140,000 އެއްހާ މީހުން ރަޖިސްޓްރީ ނުކުރެވި ވަނީ ދޫކޮށްލަން ޖެހިފައެވެ.
އަފްޣާނިސްތާނަށް ބަލާއިރު، އަވައްޓެރި އީރާނާއި ޕާކިސްތާނުން މިއަހަރު އެކަނިވެސް އެއް މިލިއަނަށްވުރެ ގިނަ މީހުން އެނބުރި ޤައުމަށް އައިސްފައިވާއިރު، އެ ފަރާތްތަކަށް ދެމުންދިޔަ މާލީ އެހީތެރިކަން ވަނީ ބޮލަކަށް 375 ޑޮލަރުން 170 ޑޮލަރަށް މަދުކޮށްފައެވެ.
ޔޫއެންއެޗްސީއާރުން ހާމަކުރި ގޮތުގައި، ޚަރަދު ކުޑަކުރުމުގެ ފިޔަވަޅެއްގެ ގޮތުން 2024 ވަނަ އަހަރާ އަޅާބަލާއިރު 2025 ވަނަ އަހަރު އެ އިދާރާގެ މުވައްޒަފުންގެ 33 އިންސައްތަ މަދުކޮށް، 140 އޮފީހެއް ބަންދުކޮށް، އަދި 15 ޤައުމެއްގައި ހިންގަމުންދިޔަ އޮޕަރޭޝަންތައް ވަނީ ހުއްޓާލައިފައެވެ. ނަމަވެސް، މި ފިޔަވަޅުތަކުން ވެސް މިހާރު ދިމާވެފައިވާ ބޮޑު މާލީ ދަތިކަމަށް އެދެވޭ ޙައްލެއް ލިބިފައެއް ނުވެއެވެ.
އަދި އެހީދޭ ފަރާތްތަކުން ވަކި ޚާއްސަ ކަންކަމަށް ޝަރުޠުކޮށްފައި ދޭ ފައިސާގެ ނިސްބަތް، ފާއިތުވި ފަސް އަހަރުގެ ތެރޭގައި 19 އިންސައްތައިން 51 އިންސައްތައަށް އިތުރުވެފައިވާތީ، ކުއްލި ޙާލަތްތަކުގައި ވަގުތުން ފައިސާ ބޭނުންކުރުމަށް ބޮޑެތި ގޮންޖެހުންތަކާ ކުރިމަތިވަމުންދާ ކަމަށް ވެސް އެ އިދާރާއިން ފާހަގަކޮށްފައިވެއެވެ.
މާލީ އެހީތެރިކަން ނުލިބި މި ޙާލަތު މިގޮތަށް ދިގުލައިގެން ހިނގައްޖެނަމަ، ރައްކާތެރިކަން ފޯރުކޮށްދިނުމުގެ މުޅި ނިޒާމު ރޫޅި، އެތައް މިލިއަން ރެފިއުޖީންނެއް ޤާނޫނީ އެއްވެސް ރައްކާތެރިކަމެއް އަދި ލިޔެކިޔުމެއް ނެތި، އަނިޔާވެރިކަމާއި އިހުމާލުގެ ޝިކާރައަކަށް ވެދާނެ ކަމުގެ އިންޒާރު ޔޫއެންއެޗްސީއާރުން ވަނީ ދީފައެވެ.