މެލޭޝިއާގެ ކުރީގެ ބޮޑުވަޒީރު މަހާތީރު މުޙައްމަދުގެ ޙާލުކޮޅު ދެރަވެ ހަސްފަތާލުގައި އެޑްމިޓުކޮށްފައިވާ ކަމުގައި، އެ އޭނާގެ އޮފީހުން ހާމަކޮށްފިއެވެ. ޢުމުރުފުޅުން 101 އަހަރުގެ މަހާތީރު އެޑްމިޓުކުރީ އަނބިކަނބަލުން ސިތީ ޙަސްމާ މުޙައްމަދު ޢަލީ އަވަހާރަވިތާ ދެ ދުވަސް ފަހުންނެވެ. ސެޕްޓެންބަރު 29 ވަނަ ދުވަހުގެ ރޭ މަހާތީރު އެޑްމިޓުކުރީ ކުއަލަ ލުމްޕޫރުގައި ހުންނަ ނޭޝަނަލް ހާޓް އިންސްޓިޓިއުޓުގައެވެ. ނަމަވެސް، އޭނާ ހަސްފަތާލުގައި އެޑްމިޓުކުރި ސީދާ ސަބަބު ދެނެގަތުމަށް ޓެސްޓުތައް ހަދަމުންދާ ކަމުގައި އޭނާގެ އިސް އެހީތެރިޔާ ސޫފީ ޔޫސުފް ވިދާޅުވިއެވެ.
ދެ ދައުރެއްގެ މަތިން ދެ ދަހަރަށް ވުރެ ދިގު މުއްދަތަކަށް ދެކުނު އިރުމަތީ އޭޝިއާގެ ޤައުމެއް ކަމުގައިވާ މެލޭޝިޔާގައި ވެރިކަން ކުރައްވާފައިވާ މަހާތީރަކީ، ހިތުގެ އާލާސްކަންފުޅުގެ ދިގު ތާރީޚެއް އޮތް ބޭފުޅެކެވެ. މީގެ ކުރިން ހިތުގެ ބައިޕާސް އޮޕަރޭޝަންތަކެއް ވެސް އޭނާ ވަނީ ފުރިހަމަކުރައްވާފައެވެ. ފަހަކަށް އައިސް ތަކުރާރުކޮށް ހަސްފަތާލުގައި އެޑްމިޓުކުރަން ޖެހިވަޑައިގަންނަވާފައިވާ މަހާތީރު، އެންމެ ފަހުން މި އަހަރުގެ ޖަނަވަރީ މަހު ހަސްފަތާލަށް ގެންދެވުނީ ވެއްޓިވަޑައިގަންނަވައި އުނަގަނޑުގެ ކަށިގަނޑެއް ބިނދިގެންނެވެ.
މަހާތީރުގެ އަނބިކަނބަލުން ސިތީ ޙަސްމާ އަވަހާރަވީ ސެޕްޓެންބަރު 28 ވަނަ ދުވަހު، ޢުމުރުފުޅުން 100 އަހަރުގައެވެ. އޭނާއަކީ މެޑިކަލް ޑޮކްޓަރެއްގެ އިތުރުން ޢާންމު ޞިއްޙަތު ކުރިއެރުވުމަށް ގިނަގުނަ މަސައްކަތްތަކެއް ކުރެއްވި ބޭފުޅެކެވެ. މަހާތީރާއި ސިތީ ޙަސްމާ ކައިވެނި ބައްލަވައިގެން 70 އަހަރު ހޭދަކުރައްވާފައި ވާއިރު، އަނބިކަނބަލުންގެ ވަކިވެދިޔުމުގެ ފުން އަސަރާއި ހިތާމަ އޭނާގެ ހަށިކޮޅުންނާއި ޢަމަލުފުޅުތަކުން ފާޅުކަން ބޮޑު ގޮތެއްގައި ފެނިގެންދިޔަ ކަމުގައި މަސްރަޙު ދިރާސާކުރާ ފަރާތްތަކުން ބުންޏެވެ.
އަނބިކަނބަލުންގެ ޖަނާޒާގެ ތެރެއިން ނަގާފައިވާ ވީޑިއޯއަކުން ފެންނަނީ، އޭނާ މިއަދު އަވަހާރަވެދާނެ ކަމުގައި ކުރިން ދުވަހަކު ވެސް އުންމީދު ނުކުރައްވާ ކަމުގައި ކީރިތިކުރައްވަމުން ޤައުމުގެ ކުރީގެ ރަސްގެފާނުގެ އަރިހުގައި މަހާތީރު ވިދާޅުވި މަންޒަރެވެ. އަނބިކަނބަލުންގެ ވަކިވުމުން އޭނާއަށް ފުން އަސަރެއް ކޮށްފައިވާކަން ހާމަވާ މި ވީޑިއޯ، މަހާތީރުގެ ރަސްމީ މީސްމީޑިއާ އެކައުންޓުތަކުގައި މިހާރު ވަނީ ޢާންމުކޮށް ޝާއިޢުކޮށްފައެވެ.