ވިމެންސް ޗެމްޕިއަންސް ލީގު: ސިޓީ އާއި ރެއާލްގެ ކުރިމަތިލުން އެއްވަރު

ޔުއޭފާ ވިމެންސް ޗެމްޕިއަންސް ލީގުގައި މެންޗެސްޓަރ ސިޓީ ވިމެން އާއި ރެއާލް މެޑްރިޑް ބައްދަލުކުރި މެޗު އެއްވަރު ވެގެން ނިމިއްޖެއެވެ.

ސިޓީގެ ޖޯއި ސްޓޭޑިއަމްގައި ކުޅުނު މިމެޗު ނިމިފައިވަނީ އެއް ލަނޑު އެއް ލަނޑުން ދެޓީމު އެއްވަރު ވެގެންނެވެ. މިއީ ސިޓީ އާއި ދެކޮޅަށް އިންގްލިޝް ޕްރިމިއަރ ލީގުން އުފުލާފައިވާ ދައުވާތައް ސާބިތުވާކަމަށް ބުނިފަހުން އެކްލަބްގެ ޓީމެއް ވާދަވެރި މެޗެއް ކުޅުނު ފުރަތަމަ ފަހަރެވެ. ސިޓީ ވިމެންގެ ކޯޗު މިމެޗުގެ ކުރިން ބުނެފައިވަނީ އެޓީމުގެ އެއްވެސް ކަމަކަށް ބަދަލު އައިސްފައި ނުވާކަމަށާއި ހުރިހާ ކަމެއްވެސް ދަނީ އާދައިގެ މަތިން ކުރިއަށް ކަމަށެވެ.

ދެޓީމުގެ ފަރާތުން ވަރަށް ހަމަހަމަ ކުޅުމެއް ފެނިގެންދިޔަ މިމެޗުގެ ކުރީކޮޅު ރަނގަޅަށް ކުޅުނު ތަން ފެނިގެންދިޔައީ ރެއާލްއިންނެވެ. މިގޮތުން މިސީޒަންގައި ދިފާއުގައި ކޮންމެވެސް ވަރަކަށް މައްސަލަ ހުރިކަން ފާހަގަ ކުރެވެމުންދާ ސިޓީގެ ޑިފެންސްގެ ބަލިކަަށިކަމުގެ ފައިދާ ނަގާ ރެއާލް އިން މެޗުގެ ލީޑު ނެގިއެވެ. މެޗުގެ 29 ވަނަ މިނެޓުގައި އެޓީމަށް މިލަނޑު ކާމިޔާބު ކޮށްދިނީ ލިންޑާ ކައިސޭޑޯއެވެ. މިމެޗުގައި ސިޓީއިން ކާމިޔާބު ކުރި ހަމައެކަނި ލަނޑު ޖަހާ މެޗުގެ ނަތީޖާ ހަމަހަމަ ކޮށްފައިވަނީ ދެވަނަ ހާފުގެ ކުޅުން ފެށިތާ 6 ވަނަ މިނެޓްގައި ހަދީޖާ ޝޯ ކާމިޔާބު ކޮށްދިން ލަނޑަކުންނެވެ.

މިމެޗުގައި ދެޓީމަށް ލަނޑު ޖަހައިދިން ދެ ކުޅުންތެރިން ކަމަސްވާ ޝޯ އާއި ކައިސޭޑޯއަށް ދެޓީމުގެ ލީޑު ފުޅާކޮށްދޭނެ ރަނގަޅު ފުރުސަތުތަކެއް ލިބިގެންދިޔައެވެ. އަދި ސިޓީގެ ލޯރެން ހެމްޕް އާއި ޔުއި ހަސެގާވާ އާއި ބެތު މީޑު އަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރު ވެގެންދިޔައެވެ. އަދި މެޗު ނިމެން ގާތްވެފައިވަނިކޮށް ރެއާލްއަށް މެޗު ކާމިޔާބު ކުރާނެ ރަނގަޅު ފުރުސަތެއް ލިބި ރެފްރީގެ ސަބަބުން ގެއްލިގެންދިޔަތަން ފެނިގެންދިޔައެވެ. ރެއާލްއިން އުފެއްދި މިހަމަލާގައި ރެފްރީ ގައިގާ ސިޓީގެ ކުޅުންތެރިއެއް ޖެހުމާއި ގުޅިގެން ރެފްރީ ކަށިގަނޑު ފުށްމިތަން ފެނިގެންދިޔައެވެ. އެވަގުތު ރެއާލްގެ ސިލްވިއާ ކްރިސްޓޮބާލް ހުރީ ބޯޅަ ގޯލަށް ޖަހަން ތައްޔާރުވެފައެވެ. މިކަމާއި ރެއާލްގެ ބެންޗުން ވަރަށް ބޮޑަށް ޝަކުވާ ކުރިތަން ފެނިގެންދިޔައެވެ.

މިމުބާރާތުގެ ލީގު ފޭސްގައި މިހާރު ކޮންމެ ޓީމެއް ދެމެޗު ކުޅެފައިވާއިރު ސިޓީ އާއި ރެއާލް އުޅެނީ ކުޅުނު ދެމެޗުން ލިބިފައިވާ 2 ޕޮއިންޓާއެކު ތާވަލްގެ 11 އަދި 12 ވަނައިގައެވެ. މިމުބާރާތުގައި ރޭ ކުޅުނު އެހެން މެޗުތަކަށް ބަލާލާއިރު ޕެރިސް ސެއިންޓް ޖަރމެއިން އާއި އޯއެޗް ލެއުވެން ބައްދަލުކުރި މެޗު އަމިއްލަ ދަނޑުގައި 5 ލަނޑު ސުން ލަނޑުން ކާމިޔާބު ކޮށްފައިވަނީ ޕީއެސްޖީއެވެ. މިމެޗުގައި ޕީއެސްޖީއިން ކާމިޔާބު ކުރި ފުރަތަމަ ލަނޑު މެޗުގެ 9 ވަނަ މިނެޓުގައި ކާމިޔާބު ކޮށްދީފައިވަނީ ރަޝީދަތު އަޖިޑާބޭއެވެ. މީގެއިތުރުން 51 ވަނަ މިނެޓާއި 63 ވަނަ މިނެޓުގައި އެޓީމުގެ ދެވަނަ އަދި ތިންވަނަ ލަނޑު ކާމިޔާބު ކޮށްދީފައިވަނީ ނައޯމީ ފެލަރއެެވެ. އަދި ފަހު ދެ ލަނޑު މެޗުގެ 69 ވަނަ މިނެޓާއި 84 ވަނަ މިނެޓުގައި ކާމިޔާބު ކޮށްދީފައިވަނީ ކެޕްޓަން ސަކީނާ ކާޗައުއީ އާއި ވިކްޓޯރިއާ ޔާޔާއެވެ.

މީގެއިތުރުން އިންޓަރ މިލާނާއި އޮސްޓްރިއާ ވިއެން ބައްދަލުކުރި މެޗު އެއް ލަނޑު އެއް ލަނޑުން އެއްވަރުވިއިރު އެޗްބީ ކޯގް ވިމެން އާއި ސަރވެޓް ބައްދަލުކުރި މެޗު އަމިއްލަ ދަނޑުގައި 5 ލަނޑު އެއް ލަނޑުން ކާމިޔާބު ކޮށްފައިވަނީ ކޯގްއެވެ.