މުދަލު ޒަކާތް ބަލައިގަތް މިންވަރު މިދިޔަ އަހަރަށްވުރެ އިތުރު

މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް ޢަދަދު، މިދިޔަ އަހަރު ލިބުނު ޖުމުލަ ޢަދަދަށް ވުރެ އިތުރުވެއްޖެއެވެ. މޯލްޑިވްސް ޒަކާތު ހައުސްގެ ތަފާސްހިސާބުތައް ދައްކާގޮތުން މިއަހަރުގެ ސެޕްޓެންބަރު މަހުގެ ނިޔަލަށް 109 މިލިޔަން ދިވެހި ރުފިޔާ ބަލައިގަނެފައިވެއެވެ.

ޒަކާތު ހައުސްއިން ވިދާޅުވީ މިއަހަރު ފެށިގެން މިހާތަނަށް މިދިޔަ މަހުގެ ނިޔަލަށް މުދަލު ޒަކާތުގެ ގޮތުގައި ބަލައިގަނެފައިވަނީ ޖުމުލަ 109,262,025.69 ރުފިޔާ އެވެ. މިއީ 2025ވަނަ އަހަރު ލިބުނު 106,456,071.00 ރުފިޔާއަށް ވުރެ 2,805,954.69 ރުފިޔާ އިތުރު ޢަދަދެކެވެ. މިދިޔަ އަހަރުގެ ޖުމްލަ އަދަދާއި އަޅާބަލާއިރު 2.64 އިންސައްތަ އިތުރު އަދަކެކެވެ.

މުދަލު ޒަކާތް ދެގޮތަކަށް ދައުލަތަށް ބަދަލައިގަނެއެވެ. އެއީ ދިވެހި ރުފިޔާ އަދި ޑޮލަރުންނެވެ. މިދިޔަ މަހުގެ ނިޔަލަށް މުދަލު ޒަކާތުގެ ގޮތުގައި ދިވެހި ރުފިޔާއިން ޖުމްލަ 108,739,116.62 ރުފިޔާ ލިބިފައިވާއިރު، 34,021.41 ޔޫ.އެސް ޑޮލަރު ވެސް ލިބިފައިވާ ކަމަށް ޒަކާތު ހައުސްއިން ފާހަގަކުރެއެވެ.

މިދިޔަ އަހަރުގެ މުދަލު ޒަކާތުގެގޮތުގައި ލިބުނު ޖުމްލަ އަދަދު ފަހަނަޅައި ގޮސްފައިވާއިރު މި އަހަރު ނިމެން އަދި ބާކީ ތިން މަސް އެބައޮތެވެ، އެހެންކަމުން މިއަރު ނިމޭއިރު، މުދަލު ޒަކާތުގެ ގޮތުގައި ލިބޭ މިންވަރު ބޮޑުތަނުން އިތުރުވާނެ ކަމަށް ޒަކާތު ހައުސްއިން ފާހަގަކުރެއެވެ.

މުދަލުގެ ޒަކާތަކީ އެމީހެއްގެ މުދަލުގައި ނިޞާބު ހަމަވާތާ އަހަރެއް ފުރިފައިވާ ކޮންމެ މީހެއްގެ މައްޗަށް އޮންނަ ދީނީ ވާޖިބެކެވެ. އަހަރުގެ ކޮންމެ ދުވަސްވަރެއްގައިވެސް މުދަލުގެ ޒަކާތް ދެއްކޭނެއެވެ.

މުދަލު ޒަކާތުގެ ނިޞާބަކީ ތިމާގެ މުދަލުގައި އެ މިންވަރެއް ހަމަވުމުން އެއިން މުދަލު ޒަކާތް ނެރުން ވާޖިބުވާ އެންމެ މަދު މިންވަރެވެ. އެގޮތުން މިދިޔަ މަހުގެ 20 ވަނަ ދުވަހުން މުދަލު ޒަކާތް ނެރުން ވާޖިބުވާ ނިސާބަކީ، 19،266.10 ރުފިޔާ ކަމަށެވެ.

ރާއްޖޭގައި ޒަކާތް ބަލައިގަންނާނީ ދައުލަތުގެ ޓެކްސް އިދާރާ މީރާއިންނެވެ. މީރާއަށް އޮންލައިންކޮށްވެސް މުދަލު ޒަކާތް ދެއްކޭއިރު ކޮންމެ މީހަކުވެސް މުދަލު ޒަކާތް ދައްކަން ޖެހޭ މިންވަރު މީރާގެ ވެބްސައިޓް މެދުވެރިކޮށް ބަލާލެވޭނެއެވެ.