އީރާނުގެ މަދަދު ލިބިގެން ޔަމަނުގައި ޙަރަކާތްތެރިވާ ޙޫޘީންގެ ޖަމާޢަތުން މަދީނާގެ ކަރަންޓު އުފައްދާ މަރުކަޒަކަށް އަމާޒުކޮށް ޙަމަލާއެއް ދީފައިވާކަމަށް، ޙޫޘީންނާ ދެކޮޅަށް ހަނގުރާމަކުރަމުންދާ ސަޢުދީ ޢަަރަބިއްޔާ އިސްވެ އޮންނަ އަސްކަރީ އިއްތިޙާދުން ބުނެފިއެވެ.
މި ކަރަންޓު އުފައްދާ މަރުކަޒަކީ، އިސްލާމްދީނުގެ އެންމެ މާތް އަދި މުޤައްދަސް އެއް ބިނާ ކަމުގައިވާ އަލްމަސްޖިދުއްނަބަވީއަށް ކަރަންޓުގެ ޚިދުމަތް ފޯރުކޮށްދޭ މައި މަރުކަޒެވެ.
އެ އިއްތިޙާދުން މަޢުލޫމާތު ދީފައިވާ ގޮތުގައި، އަންގާރަ ދުވަހު ދިން މި ޑްރޯން ޙަމަލާގައި ޓްރާންސްފޯމަރެއް ބޭނުންނުކުރެވޭ މިންވަރަށް ހަލާކުވި ނަމަވެސް، މުޅި ވިއުގައަށް އޭގެ ސަބަބުން އެއްވެސް ބުރޫއެއް އަރާފައެއް ނުވެއެވެ. އަދި ވައްޓައިލި ޑްރޯންގެ ބައިތައް ތަޙްޤީޤުކުރުމުން، މި ޙަމަލާ ރޭވުމާއި ދިނުމުގައި ޙޫޘީންގެ ފުރިހަމަ ބައިވެރިވުން އޮތްކަން ކަށަވަރުވެފައިވާ ކަމަށްވެސް އެ އިއްތިޙާދުން ބުންޏެވެ. މި ޢަމަލަކީ ދެ ޙަރަމްފުޅަށް ނުރައްކާކޮށް، ދުނިޔޭގެ އެކި ކަންކޮޅުތަކުގައިވާ އެންމެހައި މުސްލިމުންގެ ޖަޒުބާތުތަކާ ކުޅުމަށް ޙޫޘީން ތަކުރާރުކޮށް ހިންގަމުންދާ ފިނޑި ޢަމަލެއް ކަމަށް އެ އިއްތިޙާދުން ވަނީ ސިފަކޮށްފައެވެ.
ނަމަވެސް، ޙޫޘީންގެ ކޮންޓްރޯލް އޮންނަ ސަބާ ނޫސް މެދުވެރިކޮށް އެ ޖަމާޢަތުގެ ޢަސްކަރީ ތަރުޖަމާނަކު ވަނީ މި ތުހުމަތުތައް ދޮގުކޮށްފައެވެ. އޭނާ ހާމަކުރި ގޮތުގައި، މިއީ މައްކާއަށް ޙަމަލާދޭން އުޅުނު ކަމަށް ބުނެ ކުރިން ކުރި ތުހުމަތުތައް ސާބިތުކޮށްނުދެވުމުން ސަޢުދީން ފަތުރަމުންދާ އަސާސެއް ނެތް ވާހަކަތަކެކެވެ. މީގެ ދެ ހަފުތާ ކުރިންވެސް މައްކާގެ ދެކުނު ސަރަޙައްދުން ޙޫޘީންގެ ޑްރޯނެއް ވައްޓައިލި ކަމަށް ސަޢުދީން ބުނެފައިވާއިރު، މުޤައްދަސް އެއްވެސް ބިނާއަކަށް ޙަމަލާދިނުމުގެ ވިސްނުމެއް ނެތް ކަމަށް ޙޫޘީން ތަކުރާރުކޮށް ބުނެއެވެ.
މި ހާދިސާއާ ގުޅިގެން ރައްދު ދިނުމުގެ ގޮތުން ސަޢުދީ އިއްތިޙާދުން ވަނީ ޔަމަނުގެ ވެރިރަށް ޞަންޢާއަށާއި އެކި ސަރަޙައްދުތަކަށް ވަރުގަދަ ވައިގެ ޙަމަލާތަކެއް ދީފައެވެ. ބައިނަލްއަޤްވާމީ ގޮތުން ބަލައިގަންނަ ޔަމަން ސަރުކާރަށް ތާޢީދުކުރާ ފައުޖުތަކުގެ ތަރުޖަމާނަކު ވިދާޅުވީ، އެ އިއްތިޙާދުން ޞަންޢާގެ މުހިންމު އަސްކަރީ އަމާޒުތަކަކަށް ޙަމަލާދީފައިވާ ކަމަށެވެ. މީގެ އިތުރުން ސަޢުދީގެ ދެކުނުގެ ސަރަޙައްދަކަށް އަމާޒުކޮށް ޙޫޘީން ފޮނުވާލި ބެލިސްޓިކް މިސައިލެއްވެސް ވަނީ ވައިގެ ތެރޭގައި ދިފާޢުކޮށްފައެވެ.
ހަމައެއާއެކު، ޔަމަނުގައި ހުންނަ ސަޢޫދީ އިއްތިޙާދުގައި މައި މަރުކަޒަށް އަމާޒުކޮށް ގިނަ ޢަދަދެއްގެ ބެލިސްޓިކް މިސައިލާއި ޑްރޯން ބޭނުންކޮށްގެން ޙޫޘީން ވަރުގަދަ ޙަމަލާއެއް ދީފައިވާ ކަމަށް އެ ސަރަޙައްދުގެ މަޞްދަރުތަކުން ބުނެއެވެ.
މި ކުރިމަތިލުންތައް ވަރުގަދަވެގެން ގޮސްފައިވަނީ 2022 ވަނަ އަހަރު އދ މެދުވެރިވެގެން ޤާއިމުކުރި ސުލްޙައިގެ އެއްބަސްވުމަށްފަހު ހިނގަމުންދާ އެންމެ ނުރައްކާތެރި ހަމަނުޖެހުންތަކުގެ ގޮތުގައެވެ. މަސްރަޙު އަލުން ހޫނުވާން ފެށީ މިއަހަރުގެ ޖުލައި މަހު ސަޢުދީ ޢަރަބިއްޔާއާ ދެކޮޅަށް ޙޫޘީން ކަނޑުމަގުން ދަތިކުރުމުގެ ފިޔަވަޅުތަކެއް އަޅައި، ސަޢޫދީގެ ސަރަޙައްދުތަކަށާއި އުޅަނދުފަހަރަށް ޙަމަލާދޭން ފެށުމާ ގުޅިގެންނެވެ. ނަމަވެސް ދެ ޙަރަމްފުޅާއި ޙައްޖުވެރިންގެ ރައްކާތެރިކަން ކަށަވަރުކުރުމަށް އަޅަންޖެހޭ އެންމެހައި ފިޔަވަޅުތައް އަޅަމުން ގެންދާނެ ކަމުގެ ޔަޤީންކަން ސަޢުދީ އިއްތިޙާދުން ވަނީ ދީފައެވެ.